Transliteration

RINAP 3/1 Sennacherib 022, ex. 001 [Taylor Prism] (P313081)

&P313081 = RINAP 3/1 Sennacherib 22, ex. 01
#atf: lang akk
@tablet
@obverse
@column 1
1. {disz}{d}en-zu-szesz-mesz-eri-ba _lugal gal_-u2
2. _lugal_ dan-nu _lugal_ kisz-sza2-ti _lugal kur_ asz-szur{ki}
3. _lugal_ kib-rat _limmu2_-tim _re-e2-um_ it-pe-szu
4. mi-gir _dingir-mesz gal-mesz_ na-s,ir kit-ti
5. ra-'i-im mi-sza2-ri e-pisz u2-sa-a-ti
6. a-lik tap-pu-ut a-ki-i sa-hi-ru dam-qa-a-ti
7. et,-lum git2-ma-lum zi-ka-ru qar-du
8. a-sza2-red kal mal-ki rap-pu la-'i-it,
9. la ma-gi-ri mu-szab-ri-qu za-ma-a-ni
10. {d}asz-szur _kur_-u2 _gal_-u2 _lugal_-ut la sza2-na-an
11. u2-szat-li-ma-an-ni-ma _ugu_ gim-ri
12. a-szib pa-rak-ki u2-szar-ba-a _{gesz}tukul-mesz_-ia
13. ul-tu _a-ab-ba_ e-le-ni-ti sza sza2-lam {d}utu-szi
14. a-di tam-tim szap-li-ti sza s,i-it {d}utu-szi
15. gim-ri s,al-mat _sag-du_ u2-szak-nisz sze-pu-u2-a
16. u3 mal-ki szep-s,u-ti e-du-ru ta-ha-zi
17. da-ad2-me-szu2-un iz-zi-bu-ma
18. ki-ma su-tin-ni{muszen} ni-gi-is,-s,i
19. e-disz ip-par-szu2 a-szar la 'a-a-ri
$ single ruling
20. i-na mah-re-e ger-ri-ia sza {disz}{d}mes-a-szum2-na
21. _lugal_ {kur}kar2-{d}dun-ia2-asz3 a-di _erin2 hi-a_ elam-ma{ki}
22. re-s,i-szu2 i-na ta-mir-ti kisz{ki} asz2-ta-kan _bad5-bad5_-szu2
23. i-na _muru2_ tam-ha-ri szu-a-tu e-zib _karasz_-su
24. e-disz ip-par-szid-ma na-pisz-tusz e-t,i2-ir
25. _{gesz}gigir-mesz ansze-kur-ra-mesz_ {gesz}s,u-um-bi _{ansze}kunga-mesz_
26. sza i-na qit-ru-ub ta-ha-zi u2-masz-szi-ru
27. ik-szu-da _szu-min_-a-a a-na _e2-gal_-szu2 sza qe2-reb
28. babila2{ki} ha-disz e-ru-um-ma ap-te-ma
29. _e2_ ni-s,ir-ti-szu2 _ku3-sig17 ku3-babbar_ u2-nu-ut _ku3-sig17 ku3-babbar_
30. _na4_ a-qar-tu mim-ma szum-szu2 _nig2-szu nig2-gur11_
31. la ni-bi ka-bit-tu _gun_ {munus}_sza3-e2-gal-mesz_-szu2
32. _{lu2}tirum-mesz_ {lu2}man-za-az pa-ni _{lu2}nar-mesz_
33. {munus}_nar-mesz_ si-hir-ti um-ma-a-ni
34. ma-la ba-szu-u2 mut-tab-bi-lu-tu2 _e2-gal_-usz
35. u2-sze-s,a-am-ma szal-la-tisz am-nu i-na e-muq {d}asz-szur
36. _en_-ia 1(gesz2) 1(u) 5(disz) _iri-mesz_-szu2 dan-nu-ti _e2 bad3-mesz_
37. sza {kur}kal-di u3 4(disz) _me_ 2(u) _iri-mesz tur-mesz_
38. sza li-me-ti-szu2-nu al-me _kur_-ud asz2-lu-la szal-la-sun2
39. {lu2}ur2-bi {lu2}a-ra-mu {lu2}kal-du
40. sza qe2-reb unu{ki} nibru{ki} kisz{ki} {iri}hur-sag-kalam-ma
41. gu2-du8-a{ki} zimbir{ki} a-di _dumu-mesz iri_
42. _en_ hi-it,-t,i u2-sze-s,a-am-ma szal-la-tisz am-nu
43. i-na ta-a-a-ar-ti-ia {lu2}tu-'u-mu-na
44. {lu2}ri-hi-hu {lu2}ia-daq-qu {lu2}u2-bu-du
45. {lu2}gib-re-e {lu2}ma-la-hu {lu2}gu-ru-mu
46. {lu2}u2-bu-lum {lu2}da-mu-nu {lu2}gam-bu-lum
47. {lu2}hi-in-da-ru {lu2}ru-'u-u-a {lu2}pu-qu-du
48. {lu2}ha-am-ra-nu {lu2}ha-ga-ra-nu {lu2}na-ba-tu
49. {lu2}li-i'-ta-a-u2 {lu2}a-ra-mu la kan-szu-ti
50. mit-ha-risz ak-szud{ud} 2(disz) _me_ 8(disz) _lim un-mesz tur gal_
51. _nita_ u3 _munus ansze-kur-ra-mesz {ansze}kunga-mesz ansze-mesz_
52. _{ansze}gam-mal-mesz gu4-mesz_ u3 s,e-e-ni sza la ni-bi
53. szal-la-tu ka-bit-tu asz2-lu-la a-na qe2-reb _kur_ asz-szur{ki}
54. i-na me-ti-iq ger-ri-ia sza {disz}{d}muati-en-mu-mesz
55. {lu2}qi2-pi {iri}ha-ra-ra-te _ku3-sig17 ku3-babbar_ {gesz}mu-suk-kan-ni
56. _gal-mesz ansze-mesz {ansze}gam-mal-mesz gu4-mesz_ u3 s,e-e-ni
57. ta-mar-ta-szu2 ka-bit-tu am-hur ba-hu-la-ti
58. {iri}hi-rim-me _{lu2}kur2_ ak-s,i i-na _{gesz}tukul-mesz_ u2-szam-qit-ma
59. e-du ul e-zib pag-ri-szu-un i-na ga-szi-szi
60. a-lul-ma si-hir-ti _iri_ u2-szal-me na-gu-u2
61. szu-a-tu a-na esz-szu-ti as,-bat 1(disz)-en _gu4_
62. 1(u) _udu-nita2-mesz_ 1(u) _ansze {gesz}gesztin_ 2(u) _ansze zu2-lum-ma_
63. re-sze-ti-szu2 a-na _dingir-mesz_-ni _kur_ asz-szur{ki}
64. _en-mesz_-ia u2-kin da3-ri-szam
$ single ruling
65. i-na 2(disz)-e ger-ri-ia {d}asz-szur be-li2 u2-tak-kil-an-ni-ma
66. a-na _kur_ {lu2}kasz-szi-i u3 _kur_ {lu2}ia-su-bi-gal-la-a-a
67. sza ul-tu ul-la a-na _lugal-mesz ad-mesz_-ia la kit-nu-szu2
68. lu al-lik qe2-reb hur-sza2-a-ni zaq-ru-ti
69. _a-sza3_ nam-ra-s,i i-na _ansze-kur-ra_ ar-kab-ma
70. _{gesz}gigir giri3-min_-ia i-na ti-ik-ka-te u2-sza2-asz2-szi
71. asz2-ru szup-szu-qu i-na _giri3-min_-ia ri-ma-nisz at-tag-gisz
72. {iri}e2-{disz}ki-lam-za-ah {iri}ha-ar-disz-pi
73. {iri}e2-{disz}ku-bat-ti _iri-mesz_-szu2-nu _e2 bad3-mesz_-ni
74. dan-nu-ti al-me _kur_-ud _ug3-mesz ansze-kur-ra-mesz_
75. _{ansze}kunga-mesz ansze-mesz gu4-mesz_ u3 s,e-e-ni
76. ul-tu qer-bi-szu2-un u2-sze-s,a-am-ma szal-la-tisz am-nu
77. u3 _iri-mesz_-szu2-nu _tur-mesz_ sza ni-ba la i-szu-u2
78. ap-pul aq-qur u2-sze-me kar-mesz _e2 edin_ kul-ta-ri
79. mu-sza2-bi-szu2-nu i-na {d}gesz-bar aq-mu-ma di-tal-lisz
80. u2-sze-me u2-ter-ma {iri}e2-{disz}ki-lam-za-ah
81. szu-a-tu a-na {iri}bir-tu-ti as,-bat
82. _ugu_ sza u4-um pa-ni _bad3-mesz_-szu2 u2-dan-nin-ma
@column 2
1. _ug3-mesz kur-kur_ ki-szit-ti _szu-min_-ia ina _sza3_ u2-sze-szib
2. _ug3-mesz kur_ {lu2}kasz-szi-i u3 _kur_ {lu2}ia-su-bi-gal-la-a-a
3. sza la-pa-an _{gesz}tukul-mesz_-ia ip-par-szid-du
4. ul-tu qe2-reb _kur_-i u2-sze-ri-dam-ma
5. i-na {iri}har-disz-pi {iri}e2-{disz}ku-bat-ti u2-szar-me
6. i-na _szu-min_ {lu2}szu-ut _sag_-ia _{lu2}en-nam_ {iri}ar-rap-ha
7. am-nu-szu2-nu-ti _{na4}na-ru2-a_ u2-sze-pisz-ma
8. li-i-tum ki-szit-ti _szu-min_ sza _ugu_-szu2-un
9. asz2-tak-ka-nu s,e-ru-usz-szu2 u2-sza2-asz2-t,ir-ma
10. i-na qer-bi _iri_ ul-ziz pa-an ni-ri-ia u2-ter-ma
11. a-na {kur}el-li-pi as,-s,a-bat har-ra-nu
12. el-la-mu-u2-a {disz}is-pa-ba-a-ra _lugal_-szu-un
13. _iri-mesz_-szu2 dan-nu-ti _e2_ ni-s,ir-ti-szu2
14. u2-masz-szir-ma a-na ru-qe2-e-ti in-na-bit
15. gim-ri _kur_-szu2 _dagal_-tim _gin7 muru9_ as-hu-up
16. {iri}mar-u2-bisz-ti {iri}ak-ku-ud-du _iri-mesz_-ni
17. _e2 lugal_-ti-szu2 a-di 3(u) 4(disz) _iri-mesz tur-mesz_
18. sza li-me-ti-szu2-nu al-me _kur_-ud ap-pul aq-qur
19. i-na {d}gesz-bar aq-mu _ug3-mesz tur gal nita_ u _munus_
20. _ansze-kur-ra-mesz {ansze}kunga-mesz ansze-mesz {ansze}gam-mal-mesz_
21. _gu4-mesz_ u3 s,e-e-ni a-na la mi-nam asz2-lu-lam-ma
22. a-di la ba-szi-i u2-sza2-lik-szu-ma u2-s,a-hir _kur_-su
23. {iri}s,i-s,i-ir-tu {iri}ku-um-ma-ah-lum _iri-mesz_-ni
24. dan-nu-ti a-di _iri-mesz tur-mesz_ sza li-me-ti-szu2-nu
25. {kur}e2-{disz}ba-ar-ru-u2 na-gu-u a-na gi-mir-ti-szu2
26. ul-tu qe2-reb _kur_-szu2 ab-tuq-ma _ugu_ mi-s,ir _kur_ asz-szur
27. u2-rad-di {iri}el-en-za-asz2 a-na _iri lugal_-u2-ti
28. u3 dan-na-at na-ge-e szu-a-tu as,-bat-ma
29. _mu_-szu2 mah-ra-a u2-na-kir-ma {iri}kar-{disz}{d}3(u)-pap-mesz-su
30. at-ta-bi ni-bit-su _ug3-mesz kur-kur_ ki-szit-ti _szu-min_-ia
31. i-na lib3-bi u2-sze-szib i-na _szu-min_ {lu2}szu-ut _sag_-ia
32. _{lu2}en-nam_ {iri}har-har am-nu-ma u2-rap-pisz ma-a-ti
33. i-na ta-a-a-ar-ti-ia sza {kur}ma-da-a-a ru-qu-te
34. sza i-na _lugal-mesz ad-mesz_-ia ma-am-man la isz-mu-u2
35. zi-kir _kur_-szu2-un man-da-ta-szu2-nu ka-bit-tu am-hur
36. a-na ni-ri be-lu-ti-ia u2-szak-ni-su-nu-ti
$ single ruling
37. i-na szal-szi ger-ri-ia a-na {kur}hat-ti lu al-lik
38. {disz}lu-li-i _lugal_ {iri}s,i-du-un-ni pul-hi me-lam-me
39. be-lu-ti-ia is-hu-pu-szu-ma a-na ru-uq-qi2
40. qa-bal tam-tim in-na-bit-ma szad-da-szu2 e-mid
41. {iri}s,i-du-un-nu _gal_-u2 {iri}s,i-du-un-nu _tur_
42. {iri}e2-zi-it-ti {iri}s,a-ri-ip-tu {iri}ma-hal-li-ba
43. {iri}u2-szu-u2 {iri}ak-zi-bi {iri}ak-ku-u2
44. _iri-mesz_-szu2 dan-nu-ti _e2 bad3-mesz_ a-szar ri-i-ti
45. u3 masz-qi2-ti _e2_ tuk-la-te-szu2 ra-szub-bat _{gesz}tukul_ {d}asz-szur
46. _en_-ia is-hu-pu-szu2-nu-ti-ma ik-nu-szu2 sze-pu-u2-a
47. {disz}tu-ba-a'-lum i-na _{gesz}gu-za lugal_-u2-ti
48. _ugu_-szu2-un u2-sze-szib-ma _gun_ man-da-tu be-lu-ti-ia
49. szat-ti-szam la ba-at,-lu u2-kin s,e-ru-usz-szu2
50. sza {disz}mi-in-hi-im-mu {iri}sam-si-mu-ru-na-a-a
51. {disz}tu-ba-a'-lum {iri}s,i-du-un-na-a-a
52. {disz}ab-di-li-i'-ti {iri}a-ru-da-a-a
53. {disz}u2-ru-mil-ki {iri}gu-ub-la-a-a
54. {disz}mi-ti-in-ti {iri}as-du-da-a-a
55. {disz}bu-du-dingir {kur}e2-{disz}am-ma-na-a-a
56. {disz}kam-mu-su-na-ad-bi {kur}ma-'a-ba-a-a
57. {disz}{d}a-a-ram-mu {kur}u2-du-um-ma-a-a
58. _lugal-mesz kur_ mar-tu{ki} ka-li-szu2-un _igi-sa2_-e szad-lu-ti
59. ta-mar-ta-szu2-nu ka-bit-tu a-di 4(disz)-szu2 a-na mah-ri-ia
60. isz-szu-nim-ma isz-szi-qu _giri3-min_-ia u3 {disz}s,i-id-qa-a
61. _lugal_ {iri}is-qa-al-lu-na sza la ik-nu-szu2
62. a-na ni-ri-ia _dingir-mesz e2 ad_-szu2 sza2-a-szu2 _dam_-su
63. _dumu-mesz_-szu2 _dumu-munus-mesz_-szu2 _szesz-mesz_-szu2 _numun e2 ad_-szu2
64. as-su-ha-ma a-na _kur_ asz-szur{ki} u2-ra-asz2-szu2
65. {disz}lugal-lu-da3-ri _dumu_ {disz}ru-kib-ti _lugal_-szu2-nu mah-ru-u2
66. _ugu un-mesz_ {iri}is-qa-al-lu-na asz2-kun-ma
67. na-dan _gun_ kad3-re-e be-lu-ti-ia e-mid-su-ma
68. i-sza2-a-at, ab-sza2-a-ni i-na me-ti-iq ger-ri-ia
69. {iri}e2-da-gan-na {iri}ia-ap-pu-u2
70. {iri}ba-na-a-a-bar-qa {iri}a-zu-ru _iri-mesz_-ni
71. sza {disz}s,i-id-qa-a sza a-na _giri3-min_-ia ar2-hisz
72. la ik-nu-szu2 al-me _kur_-ud asz2-lu-la szal-la-su-un
73. _{lu2}szagina-mesz {lu2}nun-mesz_ u3 _ug3-mesz_ {iri}am-qar-ru-na
74. sza {disz}pa-di-i _lugal_-szu2-nu _en_ a-de-e u3 ma-mit
75. sza _kur_ asz-szur{ki} bi-re-tu _an-bar_ id-du-ma
76. a-na {disz}ha-za-qi-a-u2 {kur}ia-u2-da-a-a
77. id-di-nu-szu2 nak-risz a-na an-zil-li i-pu-szu2
78. ip-lah3 lib-ba-szu2-un _lugal-mesz_ {kur}mu-s,u-ri
79. _{lu2}erin2-mesz {gesz}pan {gesz}gigir-mesz ansze-kur-ra-mesz_
80. sza _lugal_ {kur}me-luh-hi e-mu-qi2 la ni-bi
81. ik-te-ru-nim-ma il-li-ku re-s,u-su-un
82. i-na ta-mir-ti {iri}al-ta-qu-u2
83. el-la-mu-u2-a si-id-ru szit-ku-nu
@column 3
1. u2-sza2-'a-lu _{gesz}tukul-mesz_-szu2-un i-na tukul-ti {d}asz-szur
2. _en_-ia it-ti-szu2-un am-da-hi-is,-ma asz2-ta-kan
3. _bad5-bad5_-szu2-un _{lu2}en {gesz}gigir-mesz_ u3 _dumu-mesz lugal_
4. {kur}mu-s,u-ra-a-a a-di _{lu2}en {gesz}gigir-mesz_ sza _lugal_ {kur}me-luh-hi
5. bal-t,u-su-un i-na _muru2_ tam-ha-ri ik-szu-da
6. _szu-min_-a-a {iri}al-ta-qu-u2 {iri}ta-am-na-a
7. al-me _kur_-ud asz2-lu-la szal-la-sun2 a-na {iri}am-qar-ru-na
8. aq-rib-ma _{lu2}szagina-mesz {lu2}nun-mesz_ sza hi-it,-t,u
9. u2-szab-szu-u2 a-duk-ma i-na di-ma-a-ti
10. si-hir-ti _iri_ a-lul pag-ri-szu2-un _dumu-mesz iri_
11. e-pisz an-ni u3 gil2-la-ti a-na szal-la-ti am-nu
12. si-it-tu-te-szu2-nu la ba-bil hi-t,i-ti
13. u3 gul-lul-ti sza a-ra-an-szu2-nu la ib-szu-u2
14. usz-szur-szu2-un aq-bi {disz}pa-di-i _lugal_-szu2-nu
15. ul-tu qe2-reb {iri}ur-sa-li-im-mu u2-sze-s,a-am-ma
16. i-na _{gesz}gu-za_ be-lu-ti _ugu_-szu2-un u2-sze-szib-ma
17. man-da-at-tu be-lu-ti-ia u2-kin s,e-ru-usz-szu2
18. u3 {disz}ha-za-qi-a-u2 {kur}ia-u2-da-a-a
19. sza la ik-nu-szu2 a-na ni-ri-ia 4(u) 6(disz) _iri-mesz_-szu2 dan-nu-ti
20. _e2 bad3-mesz_ u3 _iri-mesz tur-mesz_ sza li-me-ti-szu2-nu
21. sza ni-ba la i-szu-u2 i-na szuk-bu-us a-ram-me
22. u3 qit-ru-ub szu-pi-i mit-hu-us, zu-uk _giri3-min_
23. pil-szi nik-si u3 kal-ban-na-te al-me _kur_-ud
24. 2(disz) _me lim_ 1(disz) _me_ 5(u) _ug3-mesz tur gal nita_ u3 _munus_
25. _ansze-kur-ra-mesz {ansze}kunga-mesz ansze-mesz {ansze}gam-mal-mesz_
26. _gu4-mesz_ u3 s,e-e-ni sza la ni-bi ul-tu qer-bi-szu2-un
27. u2-sze-s,a-am-ma szal-la-tisz am-nu sza2-a-szu2 _gin7 muszen_ qu-up-pi
28. qe2-reb {iri}ur-sa-li-im-mu _iri lugal_-ti-szu2
29. e-sir2-szu2 {iri}hal-s,u-_mesz_ ugu_-szu2 u2-rak-kis-ma
30. a-s,e-e _ka2-gal iri_-szu2 u2-ter-ra ik-ki-bu-usz _iri-mesz_-szu2
31. sza asz2-lu-la ul-tu qe2-reb _kur_-szu2 ab-tuq-ma
32. a-na {disz}mi-ti-in-ti _lugal_ {iri}as-du-di
33. {disz}pa-di-i _lugal_ {iri}am-qar-ru-na u3 {disz}gissu-en
34. _lugal_ {iri}ha-zi-ti ad-din-ma u2-s,a-ah-hir _kur_-su
35. e-li _gun_ mah-ri-ti na-dan szat-ti-szu2-un
36. man-da-at-tu kad3-re-e be-lu-ti-ia u2-rad-di-ma
37. u2-kin s,e-ru-usz-szu2 szu-u2 {disz}ha-za-qi-a-u2
38. pul-hi me-lam-me be-lu-ti-ia is-hu-pu-szu-ma
39. {lu2}ur2-bi u3 _{lu2}erin2-mesz_-szu2 _saga-mesz_ sza a-na dun-nun
40. {iri}ur-sa-li-im-mu _iri lugal_-ti-szu2 u2-sze-ri-bu-ma
41. ir-szu-u2 til-la-a-ti it-ti 3(u) _gun ku3-sig17_
42. 8(disz) _me gun ku3-babbar_ ni-siq-ti gu-uh-li
43. tak2-kas3-si _{na4}an-za-gul-me gal-mesz {gesz}na2-mesz zu2_
44. _{gesz}gu-za-mesz_ ne2-me-di _zu2 kusz am-si zu2 am-si_
45. _{gesz}esi {gesz}tug2_ mim-ma szum-szu2 ni-s,ir-tu ka-bit-tu
46. u3 _dumu-munus-mesz_-szu2 {munus}_ug3-mesz e2-gal_-szu2 _{lu2}nar-mesz_
47. {munus}_nar-mesz_ a-na qe2-reb nina{ki} _iri_ be-lu-ti-ia
48. _egir_-ia u2-sze-bi-lam-ma a-na na-dan man-da-at-te
49. u3 e-pesz _ARAD2_-u2-ti isz-pu-ra rak-bu-szu2
$ single ruling
50. i-na 4(disz)-e ger-ri-ia {d}asz-szur be-li2 u2-tak-kil-an-ni-ma
51. um-ma-na-te-ia gap-sza2-te ad-ke-ma a-na {kur}e2-{disz}ia-kin7
52. a-la-ku aq-bi i-na me-ti-iq ger-ri-ia
53. sza {disz}szu-zu-bi {lu2}kal-da3-a-a a-szib qe2-reb {i7}a-gam-me
54. i-na {iri}bi-it-tu-u2-tu asz2-ta-kan _bad5-bad5_-szu2
55. szu-u2 hur-ba-szu2 _me3_-ia _ugu_-szu2 im-qut-ma
56. it-ru-ku lib-bu-szu2 ki-ma az-za-ri e-disz ip-par-szid-ma
57. ul in-na-mir a-szar-szu2 pa-an ni-ri-ia u2-ter-ma
58. a-na {kur}e2-{disz}ia-kin7 as,-s,a-bat har-ra-nu
59. szu-u2 {disz}{d}marduk-ibila-szum2-na sza i-na a-lak ger-ri-ia
60. mah-re-e _bad5-bad5_-szu2 asz2-ku-nu-ma u2-par-ri-ru
61. el-lat-su ri-gim _{gesz}tukul-mesz_-ia dan-nu-ti
62. u3 ti-ib _me3_-ia ez-zi e-dur2-ma
63. _dingir-mesz_ ma-rak _kur_-szu2 i-na _ki-tusz_-szu2-nu id-ke-ma
64. qe2-reb _{gesz}ma2-mesz_ u2-szar-kib-ma a-na {iri}na-gi-te-raq-qi2
65. sza qa-bal tam-tim is,-s,u-risz ip-pa-risz _szesz-mesz_-szu2
66. _numun e2 ad_-szu2 sza u2-masz-szi-ru a-hi tam-tim
67. a-di si-it-ti _ug3-mesz kur_-szu2 ul-tu {kur}e2-{disz}ia-kin7
68. qe2-reb {i7}a-gam-me u ap-pa-ra-a-te u2-sze-s,a-am-ma
69. szal-la-tisz am-nu u2-ter-ma _iri-mesz_-szu2 ap-pul aq-qur
70. u2-sze-me kar-mesz _ugu en_ sa-li-me-szu2 _lugal_ {kur}elam-ma{ki}
71. na-mur-ra-tum at-bu-uk i-na ta-a-a-ar-ti-ia
72. {disz}{d}asz-szur-na-din-mu _dumu_ resz-tu-u2 tar-bit bir-ki-ia
73. i-na _{gesz}gu-za_ be-lu-ti-szu2 u2-sze-szib-ma
74. _dagal_-tum _kur eme-gi7_ u uri{ki} u2-szad-gil pa-nu-usz-szu2
$ single ruling
75. i-na 5(disz) ger-ri-ia ba-hu-la-te {iri}tu-mur-ri
76. {iri}sza2-ru-um {iri}e-za-ma {iri}kib-szu2 {iri}hal-bu-da
77. {iri}qu-u-a {iri}qa-na sza _gin7_ qin-ni _ti8_{muszen} a-sza2-red
78. _muszen hi-a_ s,e-er zuq-ti {kur}ni-pur _kur_-i mar-s,i
79. szu-bat-sun2 szit-ku-na-at-ma la kit-nu-szu2 a-na ni-ri
80. i-na _giri3-min_ {kur}ni-pur ka-ra-szi u2-sza2-asz2-kin-ma
81. it-ti {lu2}qur-bu-ti _giri3-min_-ia na-as-qu-ti
@column 4
1. u3 _{lu2}erin2-mesz me3_-ia la ga-me-lu-ti
2. a-na-ku _gin7 am_ ek-di pa-nu-usz-szu2-un as,-bat
3. hur-ri na-hal-li na-at-bak _kur_-i me-le-e
4. mar-s,u-ti i-na _{gesz}gu-za_ asz2-ta-am-di-ih
5. a-szar a-na _{gesz}gu-za_ szup-szu-qu i-na _giri3-min_-ia asz2-tah-<hi>-it,
6. _gin7_ ar-me a-na zuq-ti sza2-qu-ti s,e-ru-usz-szu2-un
7. e-li a-szar bir-ka-a-a ma-na-ah-tu i-sza2-a
8. s,e-er _na4 kur_-i u2-szib-ma _a-mesz_ {kusz}na-a-di ka-s,u-te
9. a-na s,u-um-me-ia lu asz2-ti i-na _szu-si-mesz_
10. hur-sza2-a-ni ar-de-szu2-nu-ti-ma asz2-ta-kan
11. tah-ta-szu2-un _iri-mesz_-szu2-nu _kur_-ma asz2-lu-la szal-la-sun2
12. ap-pul aq-qur i-na {d}gesz-bar aq-mu pa-an ni-ri-ia
13. u2-ter-ma s,e-er {disz}ma-ni-ia-e _lugal_ {iri}uk-ki
14. szad-da-a-a-e la kan-sze as,-s,a-bat har-ra-nu
15. ur-hi la pe-tu-ti t,u-di pa-asz2-qu-ti sza la-pa-an
16. _kur-mesz_ mar-s,u-ti ul-la-nu-u2-a qe2-reb-szu2-un
17. ma-am-man la il-li-ku _lugal-mesz_ pa-ni mah-ru-ti
18. i-na _giri3-min_ {kur}a-na-ra u3 {kur}up-pa szad-di-i dan-nu-ti
19. ka-ra-szi u2-sza2-asz2-kin-ma a-na-ku i-na _{gesz}gu-za_ ne2-me-di
20. it-ti _{lu2}erin2-mesz_ ta-ha-zi-ia git2-ma-lu-ti
21. i-na ne-re-bi-szu2-un pi-qu-ti szu-nu-hi-isz
22. e-ru-um-ma mar-s,i-isz e-te-el-la-a _szu-si-mesz kur_-i
23. pa-asz2-qa-a-te szu-u2 {disz}ma-ni-ia-e tur-bu-u'
24. _giri3-min erin2 hi-a_-ia e-mur-ma {iri}uk-ku _iri lugal_-ti-szu
25. e-zib-ma a-na ru-qe2-e-ti in-na-bit {iri}uk-ku
26. al-me _kur_-ud asz2-lu-la szal-la-su mim-ma szum-szu _nig2-szu nig2-gur11_
27. ni-s,ir-ti _e2-gal_-szu2 ul-tu qer-be2-e-szu
28. u2-sze-s,a-am-ma szal-la-tisz am-nu u3 3(u) 3(disz) _iri-mesz_-ni
29. sza pa-a-t,i na-gi-szu2 _kur_-ma _ug3-mesz ansze-mesz gu4-mesz_
30. u3 s,e-e-ni ul-tu qer-bi-szu2-un asz2-lu-la
31. ap-pu-ul aq-qur i-na {d}gesz-bar aq-mu
$ single ruling
32. i-na 6(disz) ger-ri-ia si-it-ti _ug3-mesz_ {kur}e2-{disz}ia-kin7
33. sza la-pa-an _{gesz}tukul-mesz_-ia dan-nu-te _gin7_ ser2-re-me
34. ig-ru-ru _dingir-mesz_ ma-rak _kur_-szu2-un i-na _ki-tusz_-szu2-nu id-ku-ma
35. tam-tum _gal_-tum sza s,i-it {d}utu-szi e-bi-ru-ma
36. i-na {iri}na-gi-ti sza {kur}elam-ma{ki} id-du-u2 szu-bat-sun2
37. i-na _{gesz}ma2-mesz_ {kur}hat-ti tam-tum lu e-bir {iri}na-gi-tu2
38. {iri}na-gi-tu2-di-i'-bi-na a-di {kur}hi-il-mu {kur}pil-la-tu2
39. u3 {kur}hu-pa-pa-nu na-ge-e sza {kur}_elam-ma{ki} kur_-ud
40. _ug3-mesz_ {kur}e2-{disz}ia-kin7 a-di _dingir-mesz_-szu2-nu u3 _ug3-mesz_
41. sza _lugal_ {kur}elam-ma{ki} asz2-lu-lam-ma la e-zi-ba
42. mul-tah-t,u qe2-reb _{gesz}ma2-mesz_ u2-szar-kib-ma
43. a-na a-ha-an-na-a u2-sze-bi-ra-ma u2-sza2-as,-bi-ta
44. har-ra-an _kur_ asz-szur{ki} _iri-mesz_ sza qe2-reb na-ge-e
45. sza2-tu-nu ap-pul aq-qur i-na {d}gesz-bar aq-mu a-na _du6_ u kar-me
46. u2-ter i-na ta-a-a-ar-ti-ia {disz}szu-zu-bu
47. _dumu_ babila2{ki} sza i-na e-szi-ti ma-a-te be-lu-tu
48. _kur eme-gi7_ u uri{ki} ra-ma-nu-usz u2-ter-ru
49. i-na _me3 edin bad5-bad5_-szu2 asz2-kun bal-t,u-su i-na _szu-min_
50. as,-bat-su szum-man-nu u3 bi-re-tu _an-bar_ ad-di-szu-ma
51. a-na _kur_ asz-szur{ki} u2-ra-asz2-szu2 _lugal_ {kur}elam-ma{ki} sza _a2-min_-szu2
52. is-hu-ru-ma il-li-ku re-s,u-su _bad5-bad5_-szu2 asz2-kun
53. _illat-mesz_-szu2 u2-sap-pi-ih-ma u2-par-ri-ir pu-hur-szu2
$ single ruling
54. i-na 7(disz)-e ger-ri-ia {d}asz-szur be-li2 u2-tak-kil-an-ni-ma
55. a-na {kur}e-lam-ti lu al-lik {iri}e2-{disz}ha-'i-i-ri
56. {iri}ra-s,a-a _iri-mesz_ sza mi-s,ir _kur_ asz-szur{ki}
57. sza i-na tar-s,i _ad_-ia e-la-mu-u2 e-ki-mu da-na-nisz
58. i-na me-ti-iq ger-ri-ia _kur_-ud asz2-lu-la szal-la-sun2
59. _erin2-mesz_ szu-lu-ti-ia u2-sze-rib qe2-reb-szu2-un a-na mi-s,ir
60. _kur_ asz-szur{ki} u2-ter-ra-ma _szu-min {lu2}gal_ {iri}hal-s,u bad3-an{ki}
61. am-nu {iri}bu-be2-e {iri}dun-ni-{d}utu {iri}e2-{disz}ri-si-ia
62. {iri}e2-ah-la-me-e {iri}du-ru {iri}dan-nat-{disz}su-la-a-a
63. {iri}szi-li-ib-tu {iri}e2-{disz}a-s,u-si {iri}kar-{disz}numun-ba-sza2
64. {iri}e2-{disz}gi-is,-s,i {iri}e2-{disz}kat3-pa-la-ni {iri}e2-{disz}im-bi-ia
65. {iri}ha-ma-a-nu {iri}e2-{disz}ar-ra-bi {iri}bu-ru-tu
66. {iri}dim-tu2-sza-{disz}su-la-a-a {iri}dim-tu2-sza-{disz}{d}dumu-e2-kar-ir
67. {iri}har-ri-asz2-la-ke-e {iri}rab-ba-a-a
68. {iri}ra-a-su {iri}ak-ka-ba-ri-na {iri}du6-{disz}u2-hu-ri
69. {iri}ha-am-ra-nu {iri}na-di-tu a-di _iri-mesz_-ni
70. sza ne2-re-bi sza {iri}e2-{disz}bu-na-ki {iri}du6-{d}hu-um-bi
71. {iri}dim-tu2-sza-{disz}du-me-dingir {iri}e2-{disz}u2-bi-ia
72. {iri}ba-al-ti-li-szir {iri}ta-qab-li-szir
73. {iri}sza-na-qi-da-te {iri}ma-su-tu2-szap-li-ti
74. {iri}sa-ar-hu-de-ri {iri}a-lum-sza-_gaszan-e2_
75. {iri}e2-{disz}pap-mesz-szum2-na {iri}il-te-u2-ba
76. 3(u) 4(disz) _iri-mesz_ dan-nu-ti a-di _iri-mesz tur-mesz_
77. sza li-me-ti-szu2-nu sza ni-ba la i-szu-u2
78. al-me _kur_-ud asz2-lu-la szal-la-sun2 ap-pul aq-qur
79. i-na {d}gesz-bar aq-mu qu-tur naq-mu-ti-szu2-nu
80. _gin7 muru9_ kab-ti pa-an _an_-e rap-szu-ti
81. u2-szak-ti-im isz-me-ma ki-szit-ti _iri-mesz_-szu2
@column 5
1. {disz}nig2-du-{d}na-hu-un-du {lu2}e-la-mu-u2
2. im-qut-su hat-tum si-it-ti _iri-mesz_-szu2
3. a-na dan-na-a-te u2-sze-rib szu-u2 {iri}ma-dak-tu
4. _iri lugal_-ti-szu2 e-zib-ma a-na {iri}ha-i-da-la
5. sza qe2-reb _kur-mesz su3-mesz_ is,-s,a-bat har-ra-nu
6. a-na {iri}ma-dak-ti _iri lugal_-ti-szu2 a-la-ku aq-bi
7. {iti}tam-hi-ri _en-te-na_ dan-nu e-ru-ba-am-ma
8. sza2-mu-tum ma-at-tum u2-sza2-az-ni-na _szeg3-mesz_-sza2
9. _szeg3-mesz_ u3 szal-gi na-ah-lu na-at-bak _kur_-i a-du-ra
10. pa-an ni-ri-ia u2-ter-ma a-na nina{ki} as,-s,a-bat
11. har-ra-nu i-na u4-me-szu-ma i-na qi2-bit {d}asz-szur _en_-ia
12. {disz}nig2-du-{d}na-hu-un-du _lugal_ {kur}elam-ma{ki} 3(disz) _iti-mesz_
13. ul u2-mal-li-ma i-na u4-me la szi-im-ti-szu2
14. ur-ru-hi-isz im-tu-ut _egir_-szu2 {disz}um-man-me-na-nu
15. la ra-asz2 t,e3-e-me u3 mil-ki
16. _szesz_-szu2 dup-pu-us-su-u2 i-na _{gesz}gu-za_-szu2 u2-szib-ma
$ single ruling
17. i-na 8(disz)-e ger-ri-ia _egir_ {disz}szu-zu-bi is-se-hu-ma
18. _dumu-mesz babila2{ki} gal5-la2-mesz_ lem-nu-ti _ka2-gal-mesz iri_
19. u2-di-lu ik-pu-ud lib-ba-szu2-nu a-na e-pesz _{gesz}la2_
20. {disz}szu-zu-bu {lu2}kal-da3-a-a et,-lum dun-na-mu-u2
21. sza la i-szu-u2 bir-ki _{lu2}ARAD2_ da-gil2 pa-an _{lu2}en-nam_
22. {iri}la-hi-ri {lu2}a-ra-me hal-qu mun-nab-tu2 a-mir da-me
23. hab-bi-lu s,e-ru-usz-szu2 ip-hu-ru-ma qe2-reb {i7}a-gam-me
24. u2-ri-du-ma u2-szab-szu-u si-hu a-na-ku ni-tum al-me-szu2-ma
25. nap-sza2-tusz u2-si-qa la-pa-an hat-ti u3 ne2-eb-re-te
26. a-na {kur}elam-ma{ki} in-na-bit ki-i ri-kil-ti
27. u3 gil2-la-ti s,e-ru-usz-szu2 ba-szi-i ul-tu {kur}elam-ma{ki}
28. i-hi-szam-ma qe2-reb szu-an-na{ki} e-ru-ub _{lu2}babila2{ki}-mesz_
29. a-na la si-ma-ti-szu2 i-na _{gesz}gu-za_ u2-sze-szi-bu-szu2
30. be-lut _kur eme-gi7_ u3 uri{ki} u2-szad-gi-lu pa-ni-szu2
31. _e2 nig2-gur11_ sza e2-sag-il2 ip-tu-ma _ku3-sig17 ku3-babbar_
32. sza {d}en u {d}zar-pa-ni-tum _nig2-szu e2 dingir-mesz_-szu2-nu u2-sze-s,u-ni
33. a-na {disz}um-man-me-na-nu _lugal_ {kur}elam-ma{ki} sza la i-szu-u2
34. t,e3-e-mu u3 mil-ku u2-sze-bi-lu-usz t,a-a'-tu2
35. pu-uh-hir um-man-ka di-ka-a _karasz_-ka
36. a-na babila2{ki} hi-szam-ma i-da-a-ni i-zi-iz-ma
37. tu-kul-ta-ni lu at-ta szu-u2 {lu2}e-la-mu-u2
38. sza i-na a-lak ger-ri-ia mah-ri-ti sza {kur}elam-ma{ki}
39. _iri-mesz_-szu2 ak-szu-du-ma u2-ter-ru a-na kar-me
40. lib-bu-usz ul ih-su-us t,a-a'-tu2
41. im-hur-szu2-nu-ti-ma _erin2 hi-a_-szu2 _karasz_-su u2-pa-hir-ma
42. _{gesz}gigir-mesz_ {gesz}s,u-um-bi e-szu-ra _ansze-kur-ra-mesz_
43. _{ansze}kunga-mesz_ is-ni-qa s,i-in-di-szu2 {kur}par-su-asz2
44. {kur}an-za-an {kur}pa-sze-ru {kur}el-li-pi {lu2}ia-as-il3
45. {lu2}la-kab-ra {lu2}ha-ar-zu-nu {lu2}du-um-mu-qu
46. {lu2}su-la-a-a {lu2}sa-am-u2-na _dumu_ {disz}{d}mes-a-szum2-na
47. {kur}e2-{disz}a-di-ni {kur}e2-{disz}a-muk-ka-na {kur}e2-{disz}szil-la-na
48. {kur}e2-{disz}sa-a-la ud-ud-ag{ki} {iri}la-hi-ru {lu2}pu-qu-du
49. {lu2}gam-bu-lum {lu2}ha-la-tum {lu2}ru-'u-u2-a
50. {lu2}u2-bu-lum {lu2}ma-la-hu {lu2}ra-pi-qu
51. {lu2}hi-in-da-ru {lu2}da-mu-nu kit-ru _gal_-u2
52. ik-te-ra it-ti-szu2 gi-ip-szu-su-un u2-ru-uh
53. _kur_ uri{ki} is,-ba-tu-nim-ma a-na babila2{ki} te-bu-ni
54. a-di {disz}szu-zu-bi {lu2}kal-da3-a-a _lugal_ babila2{ki}
55. a-na a-ha-mesz iq-ru-bu-ma pu-hur-szu2-nu in-nen-du
56. ki-ma ti-bu-ut a-ri-bi ma-a'-di sza pa-an szat-ti
57. mit-ha-risz a-na e-pesz tuq-ma-te te-bu-ni s,e-ru-u-a
58. _sahar-hi-a giri3-min_-szu2-nu ki-ma _muru9_ kab-ti
59. sza dun-ni e-ri-ia-ti pa-an _an_-e rap-szu-te ka-tim
60. el-la-mu-u2-a ina {iri}ha-lu-le-e sza ki-szad {i7}idigna
61. szit-ku-nu si-dir-ta pa-an masz-qi2-ia s,ab-tu-ma
62. u2-sza2-'a-lu _{gesz}tukul-mesz_-szu2-un a-na-ku a-na {d}asz-szur
63. {d}3(u) {d}utu {d}en {d}muati {d}u-gur {d}inanna sza nina{ki}
64. {d}inanna sza {iri}limmu2-dingir _dingir-mesz_ ti-ik-li-ia
65. a-na ka-sza2-di _{lu2}kur2_ dan-ni am-hur-szu2-nu-ti-ma
66. su-pe-e-a ur-ru-hi-isz isz-mu-u2 il-li-ku
67. re-s,u-ti la-ab-bisz an-na-dir-ma at-tal-bi-sza2
68. si-ri-ia-am hu-li-ia-am si-mat s,i-il-ti
69. a-pi-ra ra-szu-u2-a i-na _{gesz}gigir me3_-ia
70. s,ir-ti sa-pi-na-at za-'i-i-ri i-na ug-gat
71. lib-bi-ia ar-ta-kab ha-an-t,isz _{gesz}pan_ dan-na-tu2
72. sza {d}asz-szur u2-szat-li-ma i-na _szu-min_-ia as,-bat
73. {gesz}szil-ta-hu pa-ri-i' nap-sza2-ti at-muh rit-tu-u-a
74. s,e-er gi-mir um-ma-na-te na-ki-ri lem-nu-ti
75. u4-mi3-isz s,ar-pisz al-sa-a _gin7_ {d}iszkur asz2-gu-um
76. i-na qi2-bit {d}asz-szur _en gal en_-ia a-na szid-di u pu-ti
77. _gin7_ ti-ib me-he-e szam-ri a-na _{lu2}kur2_ a-zi-iq
78. i-na _{gesz}tukul-mesz_ {d}asz-szur _en_-ia u3 ti-ib _me3_-ia ez-zi
79. i-rat-su-un a-ne2-e'-ma suh-hur-ta-szu2-nu asz2-kun
80. _erin2 hi-a_ na-ki-ri i-na us,-s,i mul-mul-li
81. u2-sza2-qir-ma gim-ri _adda-mesz_-szu2-nu u2-pal-li-sza2
82. _ud_-zi-zi-isz {disz}{d}hu-um-ban-un-da-sza2 _{lu2}nimgir2_
83. sza _lugal_ {kur}elam-ma{ki} et,-lum pit-qu-du mu-ma-'e-er
84. _erin2 hi-a_-szu2 tu-kul-ta-szu2 _gal_-u2 a-di _{lu2}gal-mesz_-szu2
85. sza _gir2_ szib-bi _ku3-sig17_ szit-ku-nu
86. u3 i-na _har-mesz_ as-pi _ku3-sig17_ ru-usz-szi-i
87. ruk-ku-sa rit-ti-szu2-un ki-ma szu-u2-ri
88. ma-ru-ti sza na-du-u2 szum-man-nu
@column 6
1. ur-ru-hi-isz u2-pal-liq-szu2-nu-ti-ma asz2-ku-na tah-ta-szu2-un
2. ki-sza2-da-te-szu2-nu u2-na-kis as-lisz aq-ra-a-ti
3. nap-sza2-te-szu2-nu u2-par-ri-i' qu3-u'3-isz ki-ma _illu_
4. gap-szi sza sza2-mu-tum si-ma-ni u3-mun-ni-szu2-nu u2-szar-da-a
5. s,e-er er-s,e-ti sza2-di-il-ti la-as-mu-ti
6. mur-ni-is-qi s,i-mit-ti ru-ku-bi-ia i-na da-me-szu2-nu
7. gap-szu-ti i-szal-lu-u2 {d}i7-isz sza _{gesz}gigir me3_-ia
8. sa-pi-na-at rag-gi u3 s,e-ni da-mu u par-szu2
9. ri-it-mu-ku ma-gar-ru-usz pag-ri qu-ra-di-szu2-nu
10. ki-ma ur-qi2-ti u2-mal-la-a _edin_ sa-ap-sa-pa-te
11. u2-na-kis-ma bal-ta-szu2-un a-bu-ut ki-ma bi-ni
12. qisz-sze-e si-ma-ni u2-na-kis qa-ti-szu2-un
13. _har-mesz_ as-pi _ku3-sig17 ki-sag_ eb-bi sza2 rit-ti-szu2-nu
14. am-hur i-na nam-s,a-ri zaq-tu-ti hu-s,a-an-ni-szu2-nu
15. u2-par-ri-i' _gir2-mesz_ szib-bi _ku3-sig17 ku3-babbar_ sza2 _muru2-mesz_-szu2-nu
16. e-kim si-it-ti _{lu2}gal-mesz_-szu2 a-di {disz}{d}muati-mu-gar-un
17. _dumu_ {disz}{d}marduk-ibila-szum2-na sza la-pa-an _me3_-ia ip-la-hu
18. id-ku-u2 _a2-min_-szu2-un bal-t,u-su-un ina _muru2_ tam-ha-ri
19. it-mu-ha _szu-min_-a-a _{gesz}gigir-mesz_ a-di _ansze-kur-ra-mesz_-szi-na
20. sza i-na qit-ru-ub _me3_ dan-ni ra-ki-bu-szin de-ku-ma
21. u3 szi-na musz-szu-ra-ma ra-ma-nu-usz-szin
22. it-ta-na-al-la-ka mit-ha-risz u2-ter-ra
23. a-di 2(disz) _danna ge6_ il-li-ku da-ak-szu2-nu ap-ru-us
24. szu-u2 {disz}um-ma-an-me-na-nu _lugal_ {kur}elam-ma{ki}
25. a-di _lugal_ babila2{ki} {lu2}na-sik-ka-ni sza {kur}kal-di
26. a-li-kut _a2-min_-szu2 hur-ba-szu2 _me3_-ia ki-ma-le-e
27. zu-mur-szu2-un is-hu-up {gesz}za-ra-te-szu2-un u2-masz-sze-ru-ma
28. a-na szu-zu-ub _zi-mesz_-szu2-nu pag-ri _erin2 hi-a_-szu2-nu
29. u2-da-'i-i-szu2 e-ti-qu ki-i sza at-mi _tu_{muszen}
30. kusz-szu-di i-tar-ra-ku lib-bu-szu2-un szi-na-te-szu2-un
31. u2-s,ar-ra-pu qe2-reb _{gesz}gigir-mesz_-szu2-nu u2-masz-sze-ru-ni
32. zu-u2-szu2-un a-na ra-da-di-szu2-nu _{gesz}gigir-mesz_
33. _ansze-kur-ra-mesz_-ia u2-ma-'e-er _egir_-szu2-un
34. mun-na-rib-szu2-nu sza a-na nap-sza2-a-te u2-s,u-u2
35. a-szar i-kasz-sza2-du u2-ra-sa-bu i-na _{gesz}tukul_
$ single ruling
36. i-na u4-me-szu-ma ul-tu _e2-gal muru2 iri_ sza nina{ki}
37. a-na ri-mit _lugal_-ti-ia u2-szak-li-lu
38. a-na tab-ra-a-te kisz-szat _ug3-mesz_ lu-le-e u2-ma-lu-szi
39. _e2-gal_ ku-tal-li sza a-na szu-te-szur ka-ra-szi
40. pa-qa-a-di _ansze-kur-ra-mesz_ sa-na-qi2 mim-ma szum-szu2
41. u2-sze-pi-szu2 _lugal-mesz_ a-li-kut mah-ri _ad-mesz_-ia
42. tam-lu-sza2 ul ib-szi szu-bat-sa s,u-uh-hu-rat-ma
43. la nu-ku-lat e-pisz-tasz la-ba-risz u4-me tem-me-en-sza2
44. e-nisz-ma isz-da-a-sza2 ir-ma-a i-qu-pa re-sza2-a-sza2
45. _e2-gal_ sza2-a-tu a-na si-hir-ti-sza2 aq-qur
46. ki-szub-bu-u2 ma-a'-du ul-tu qe2-reb u2-szal-li
47. u3 ta-mir-ti _iri gim_ a-tar-tim-ma lu as,-ba-ta
48. i-na muh-hi lu u2-rad-di masz-kan2 _e2-gal_ mah-ri-ti
49. e-zib-ma i-na qaq-qa-ri u2-szal-li sza ul-tu
50. mal-di _i7_ as,-ba-ta tam-la-a usz-mal-li 2(disz) _me_ ti-ib-ki
51. a-na e-la-ni u2-szaq-qi2 re-e-su ina _iti_ sze-me-e
52. u4-mu mit-ga-ri s,e-er tam-le-e sza2-a-tu
53. i-na nik-lat lib-bi-ia _e2-gal_ {na4}pi-i-li
54. u3 {gesz}ere-ni ne2-pesz-ti {kur}hat-ti u3 _e2-gal_
55. s,i-ir-tu ep-szet _kur_ asz-szur{ki} sza _ugu_ mah-ri-ti
56. ma-a'-disz szu-tu-rat ra-ba-ta u3 nak-lat
57. i-na szi-pir _{lu2}szitim-gal_-le-e en-qu-ti
58. a-na mu-szab be-lu-ti-ia u2-sze-pisz _gesz-ur3-mesz_
59. {gesz}ere-ni s,i-ru-ti tar-bit {kur}ha-ma-nim _kur_-i el-li
60. u2-szat-ri-s,a e-li-szin _{gesz}ig-mesz_ li-ia-ri
61. me-ser _uruda_ nam-ri u2-rak-kis-ma u2-rat-ta-a
62. _ka2-mesz_-szin i-na {na4}pi-i-li pe-s,e-e
63. sza i-na er-s,e-et {iri}ba-la-t,a-a-a in-nam-ru
64. _{d}alad-{d}lamma-mesz_ s,i-ru-ti u2-sze-pisz-ma im-na
65. u3 szu-me-la u2-sza2-as,-bi-ta _si-gar_-szin a-na szu-te-szur
66. s,al-mat _sag-du_ pa-qa-di mur-ni-is-qi2 _{ansze}kunga-mesz_ a-ga-li-i
67. til-li _{gesz}gigir-mesz_ {gesz}at-ta-ra-te e-req-qi2 isz-pa-a-te
68. til-pa-na-a-te u3 us,-s,i mim-ma szum-szu2 u2-nu-ut _me3_
69. na-as,-ma-di _ansze-kur-ra-mesz {ansze}kunga-mesz_ sza2 e-mu-qi2
70. ra-ba-a-te i-szu-u2 szuk-nu-sze a-na ni-ri ki-sal-la-sza2
71. _ka2_-nu-u2 ma-gal usz-rab-bi _e2-gal_ sza2-a-tu2 ul-tu2 usz-sze-sza2
72. a-di na-bur-ri-sza2 ar-s,ip u2-szak-lil _mu-sar_-e
73. szi-t,ir _mu_-ia i-na qer-bi-sza2 asz2-kun a-na ar2-kat3 _u4-mesz_
74. i-na _lugal-mesz dumu-mesz_-ia sza {d}asz-szur u3 {d}inanna
75. a-na _re-e2-um kur_ u3 _ug3-mesz_ i-nam-bu-u zi-kir-szu2
76. e-nu-ma _e2-gal_ sza2-a-tu i-lab-bi-ru-ma en-na-hu
77. _nun_ ar-ku-u2 an-hu-sa lu-ud-disz _mu-sar_-e
78. szi-t,ir _mu_-ia li-mur-ma _i3-gesz_ lip-szu-usz _{udu}siskur_
79. liq-qi2 a-na asz2-ri-szu lu-ter {d}asz-szur u3 {d}inanna
80. ik-ri-bi-szu2 i-szem-mu-u mu-nak-kir szit,-ri-ia
81. u3 _mu_-ia {d}asz-szur _en gal ad dingir-mesz_
82. nak-risz li-zi-is-su _{gesz}gidru_ u3 _{gesz}gu-za_
83. li-kim-szu-ma lis-ki-pa _bala_-szu2
$ single ruling
84. {iti}szu-numun-na li-mu {disz}ga-hi-lu
85. _{lu2}en-nam_ {iri}ha-ta-rik2-ka