Transliteration
&P462929 = RINAP 4 Esarhaddon 079 composite
#atf: lang akk
@object composite text
@surface a
1. {disz}asz-szur-szesz-szum2-na _lugal gal_-u2 _lugal_ dan-nu _lugal_ kisz-sza2-ti _lugal kur_ asz-szur{ki}
2. _szagina_ babila2{ki} _lugal kur_ szu-me-ri u3 uri{ki}
3. _re-e2-um_ ki-i-nu sza _ug3-mesz_ dal-ha-a-ti u2-taq-qi-nu u2-sze-s,i-szi-na-ti nu-u-ru
4. sza _dingir-mesz gal-mesz_ ba-nu-u2 e-pe-szu2 ud-du-szu isz-ru-ku szi-rik-tusz
5. ba-nu-u2 _e2_ an-szar2 e-pisz e2-sag-il2 u3 babila2{ki}
6. mu-szak-lil ma-ha-zi ka-li-szu2-nu mu-ud-disz s,a-lam _dingir-mesz gal-mesz_
7. sza2 _dingir-mesz kur-kur_ szal-lu-tu ul-tu qe2-reb _kur_ asz-szur{ki} a-na asz2-ri-szu2-nu u2-ter-ru
8. e2-gaszan-kalam-ma _e2_ {d}isz-tar {iri}limmu2-dingir be-el-ti-szu2 za-ha-la-a u2-szal-bisz-ma u2-nam-me-ru _gin7_ u4-me
9. _ur-mah-mesz_ an-ze-e na-'i-i-ri {d}lah3-me {d}ku-ri-bi
10. sza _ku3-babbar?_ u _uruda_ u2-sze-pisz-ma ne2-reb _ka2-mesz_-sza2 ul-ziz
11. _lugal_ sza2 ina tu-kul-ti an-szar2 {d}sin {d}utu {d}ag {d}marduk {d}1(u)-5(disz) sza nina{ki} {d}1(u)-5(disz) sza {iri}limmu2-dingir
12. ul-tu tam-tim e-li-ti a-di tam-tim szap-li-ti i-sza2-risz it-tal-lak-u-ma
13. kul-lat na-ki-re-e-szu2 u ma-al-ki la kan-szu-ti-szu2 u2-szak-ni-szu2 sze-pu-usz-szu2
14. ka-szid {iri}s,i-du-nu sza2 ina _muru2_ tam-tim na-du-u2 sa-pi-in gi-mir da-ad2-me-szu
15. sza2-lil {iri}ar-za-a sza i-te-e na-hal {kur}mu-us,-ri sza {disz}a-su-hi-li _lugal_-szu
16. a-di ma-li-ke-e-szu2 bi-re-e-ti id-du-u a-na _kur_ asz-szur{ki} u2-ra-a
17. u3 {disz}te-usz-pa-a {kur}gi-mir-a-a ina _ki_-tim {kur}hu-bu-usz-nu
18. a-di gi-mir um-ma-ni-szu2 u2-ra-as-si-bu i-na _{gesz}tukul_
19. ka-bi-is _ug3-mesz_ {kur}hi-lak-ki la kan-szu-ti t,a-rid {disz}{d}ag-numun-zi-si-sa2 _dumu_ {disz}{d}marduk-a-szum2-na
20. na-bi-i' {kur}e2-da-ku-ri sza qe2-reb {kur}kal-di a-a-bi babila2{ki}
21. ka-mu-u2 {disz}{d}sza2-masz-ib-ni _lugal_-szu is-hap-pu hab-bi-lu
22. {iri}ha-an-da-su {iri}ma-ga-la-nu {iri}al-pi-ia-na {iri}di-ih-ra-nu
23. {iri}qa-ta-bu-u' {iri}pa-de-e {iri}u2-de-ri _iri-mesz_ dan-nu-ti sza na-ge-e {kur}ba-az-zi
24. a-di _iri-mesz_ s,e-eh-ru-ti sza li-me-ti-szu2 al-me ak-szu-ud asz2-lu-la szal-lat-su-un
25. ap-pu-ul aq-qur ina {d}gesz-bar aq-mu da-a'-isz {kur}bar-na-ki _{lu2}kur2_ ak-s,u
26. a-szi-bu-ti {kur}du6-a-szur-ri sza ina pi-i _ug3-mesz_
27. {kur}mi-hi-ir-a-nu {kur}pi-it-ta-nu i-nam-bu-u zi-kir-szu2
28. mu-sap-pi-ih _ug3-mesz_ {kur}man-na-a-a gu-tu-u2 la sa-an-qu
29. {kur}pa-tu-usz-ar-ra na-gu-u2 sza i-te-e _e2-mun_ sza qe2-reb {kur}ma-da-a-a ru-qu-ti
30. sza pa-a-t,i {kur}bi-ik-ni sza i-na _lugal-mesz ad-mesz_-ia
31. mam2-ma la ik-bu-su _ki_-tim ma-a-ti-szu2-un
32. {disz}szi-dir-pa-ar-ni {disz}e-pa-ar-ni _{lu2}en-iri-mesz_ dan-nu-ti
33. sza la kit-nu-usz a-na ni-ri sza2-a-szu2-nu a-di _ug3-mesz_-szu2-nu
$ n lines broken
34'. [...] lib3-bi
35'. [...]-x-e-ma
36'. [...] _lu pa a_ x [...] _lu az zu ta_
37'. [...] x _a_ szu-a-tu2 [...] _e2-ki-na2-mesz_
38'. a-na mul-ta-'u-u2-ti {disz}asz-szur-du3-a _dumu lugal gal_
39'. sza2 _e2_ ri-du-ti _dumu_ na-ram-ia sza asz-szur {d}sin {d}utu {d}en {d}ag {d}u-gur {d}1(u)-5(disz) sza nina{ki} {d}1(u)-5(disz) sza {iri}limmu2-dingir _mu_-szu2 iz-ku-ru a-na e-pesz _lugal_-ti
40'. [...] x-szu2 s,e-eh-ru-te ma-gal usz-rab-bi
41'. _e2-gal_ szu-a-tu ul-tu _usz8_-sza2 a-di _gaba-dib_-sza2 ar-s,ip u2-szak-lil
42'. _gesz-ur3-mesz {gesz}eren-mesz mah-mesz_ tar-bit {kur}ha-ma-nim u2-szat-ri-s,a e-li-szin
43'. _{gesz}ig-mesz {gesz}szur-min3_ sza e-re-si _du10-ga_ u2-rat-ta-a _ka2-mesz_-szin
44'. a-na tab-rat kisz-szat _ug3-mesz_ lu-le-e usz-mal-li
45'. _mu-sar_ szi-t,ir _mu_-ia u3 szi-t,ir _mu_ {disz}asz-szur-du3-ibila _dumu man gal_ sza _e2_ ri-du-ti
46'. _dumu_ na-ram-ia u2-sza2-asz2-t,ir-ma ina qe2-reb-sza2 asz2-kun
47'. [...] e-nu-ma _e2-gal_ sza2-a-tu i-lab-bi?-ru-ma in-na-hu
48'. [...] szu-szib
49'. [...] _i3-gesz szesz2_
50'. _{udu}siskur bala_-qi2 it-ti _mu-sar_-e szi-t,ir _mu_-szu2 lisz-kun
51'. {d}nin-urta _dumu_ {d}en-lil2 ik-ri-bi-szu i-szem-me
