Q000690 CDLI Literary 000690 (Nanshe A) composite

View composite artifact

38 witnesses, 0 aligned to the composite text

None of the witnesses of this composite have been aligned to the composite text yet. The composite transliteration is shown below.
1. iri{ki} na-nam iri{ki} na-nam me-bi na-pa3-de3
2. nina{ki} iri{ki} na-nam me-bi na-pa3-de3
3. iri{ki} ku3-ga iri{ki} na-nam me-bi na-pa3-de3
4. kur a-ta il2-la iri{ki} na-nam me-bi na-pa3-de3
5. e2 zi-da u4-bi na-e3-e nam-bi na-tar-re
6. iri{ki}-a nig2-du7-e pa na-mu-un-e3-e
7. garza ama {d}nansze-ke4 si na-an-sa2-sa2-e
8. nin-bi dumu eridu{ki}-ga tu-da
9. {d}nansze nin me kal-kal-la ki na-mu-un-gi4-gi4
10. agarin4 na-nam ama sa-hi-in na-nam
11. {d}nansze ama nig2 gal-gal-la na-nam
12. ama5 kalam-ma-ka dugud mu-un-de-gal2
13. erim3-ma szim-gin7 lal3 szu ta-hab2 mu-un-da-ab-du11
14. dug a nu-silig-ge mu-na-an-gub
15. {gi}pisan nig2 erim3-ma kalam-ma-ka
16. {d}nansze-er sahar-gar i7-da-gin7 ki mu-un-szi-ib2-us2
17. nin dub-dim4-dub-dim4-ma-am3
18. galga nig2 aratta{ki}-ka
19. {d}nansze nin pa5-kur5 pa5 an-sze3 gal2-la-am3
20. nu-siki mu-un-zu nu-mu-un-su mu-un-zu
21. lu2 lu2-ra a2 gal2-la mu-un-zu nu-siki-ka ama-a-ni
22. {d}nansze nu-mu-un-su-a sag en3 tar-ra-a-ni
23. e2 ur5-ur5-ra sa2 pa3-pa3-de3
24. nin-e lu2-kar-ra ur2-ra bi2-in-tum2-mu
25. si-ga-ar ki mu-na-ab-kin-kin-e
26. gi-gur szu DU-ni mu-na-ab-bulug3-e
27. {dug}szagan szu DU-ni ku-dun mu-na-tuku-tuku
28. geme2 si sa2 giri3-ni mu-un-dab5-ba
29. {d}nansze szul a2 zi-da tuku-ni im-ma-ni-in-sag5-e
30. nu-mu-un-su lu2 dam nu-tuku-ni
31. {d}nansze gesz-ur3-gin7 e2 zi-da im-ma-an-gur3-ru-nam
32. nin-da nig2-du7-e pa na-mu-un-e3-e
33. {d}nansze lagasz{ki}-a he2-gal2-la szu mu-un-da-an-pesz-e
34. szennu sza3 ku3-ge nam-mi-in-pa3
35. ur-{d}nansze en ki ag2 lagasz{ki} bara2-ge mu-da-ab-si
36. sipa-ra gidru mah mu-na-an-szum2
37. gu3-de2-a me kal-kal-la-na szu mu-na-ab-du7-du7
38. sipa sza3 ku3-ge bi2-in-pa3-da-ni
39. gu3-de2-a ensi2 lagasz{ki}-a-ke4
40. ab2 he-nun tigi-a mu-ni-gub
41. balag ku3 da-ba mu-ni-gub
42. szir3 ku3 szir3 ha-mun-na mu-un-na-du12-a
43. {uruda}kin-tur-re e2 im-mi-i-i
44. a2 dara3 nar gal-e szu mu-na-ab-tag-ge
45. e2 abzu-ta me nam-ta-ba
46. e2 sirara{ki}-ka szir3 ku3-ba me nun-ba mu-un-du12
47. ensi-ke4 ne-sag-ga2 mu-na-an-gen
48. esz-de2 ku3 mul-mul szu mu-na-ab-du8
49. engiz SZIM A mu-na-[...]
50. ninda kum2 ninda te-en-na si mu-un-na-ab-sa2-e
51. SUR x KA? gir4-ra-ka mu-na-an-DU
52. [...] x {gesz}mar mah-e gu3 nun mu-na-ab-be2
53. nig2-szum-ma utul2 gal-la u3-um-de6
54. a sed4-de3 i7-sirara{ki}-ta u3-um-de6
55. nig2 asil3-la2 lagasz{ki}-ta u3-um-de6
56. kurun a2-dam-ta u3-um-de6
57. gir4 gal unu2 gal-da sa2-a-ni
58. {d}nansze esz3 nidba-ka-ni szeg11 an-da-gi4-gi4
59. nin bur-szu-ma {d}en-lil2-la2-ke4
60. {d}nansze nin he2-gal2-la kalam-ma ti-la-am
61. |TUM.GAG.MUNUS| dumu {d}en-ki-ka3-ke4
62. munus zi e2 zi-sze3 lu2 szi-in-ga2-ga2
63. munus zi e2 zi-sze3 lu2 mu-un-gar-ra-ta
64. bur-sag-ta sa2-du11 nig2 u4-da e2-a si ba-sa2
65. bi-lu-da-ba sze nu-um-si-ge
66. dug ba-a-su3 a nu-um-de2
67. lu2 sa2-du11-ba um-ma-gub-ba szu dirig la-ba-gid2-i-de3
68. u2-ta ba-a a-ta ba-a
69. sa2-du11-ge tak4-a e2-e musz3 tum2-ma
70. ku6 za3-ga-ka sag-bi zi-ga
71. {gi}en3-bar GAN2 1(disz)-e sag-bi-ta gid2-i-de3
72. {gesz}eszx(LAM) u2 sig7-sig7 {gesz}kiri6-ka sza3-bi szu ti-a
73. u3-um-dib ka-ge nu-tag-ge
74. ninda esz3 dag-gi4-a nidba-sze3 nu-u8-il2-i
75. kasz sag szum2-ma lu2 im-mi-in-DU a sed6-de3 szu nu-um-DU
76. ne-sag gar-ra-bi si im-sa2-e musz3 nu-tum2-mu-da
77. i3 gur3-ru he2-em e2-e i3 ba-an-dib-ba
78. ga gur3-ru he2-em e2-e ga ba-an-dib-ba
79. ku6-da kas4 lu2 a2 u4-da-ka he2-a
80. u2 il2 edin-na nig2-tum2-ni
81. e2 nin-a-na-ka um-ma-an-dib-ba
82. ub-da a-gub-gub da a-gub-gub
83. eme-ta gal2-la inim gi inim kur2 di
84. e2 {d}nansze-ka bar-ra ku4-ku4 sza3-ga nu-e3-e
85. sag en3 tar e2 {d}nansze-ka dumu {d}utu tu-da
86. inim-bi-ta en {d}hendur-sag-ga2-ke4 us2-am3 im-da-ab-ra
87. lugal-e zi du11-ga mu-un-zu erim2 du11-ga mu-un-zu
88. {d}hendur-sag-ga2-ke4 zi du11-ga mu-un-zu erim2 du11-ga mu-un-zu
89. x x du11-ga-bi erim2-e im-gi16-ib-a gesz mu-na-an-du3
90. {d}nin-x KA dumu ur-sag szul {d}suen-na-ke4
91. {d}nansze-er inim-gar hul-bi-a GI mu-na-an-du3-e
92. nin du11-ga zi-da me-ni nu-kar2-kar2
93. {d}nansze kur-kur-ra me-tesz2 he2-i-i
94. za3-mu u4 garza-ka
95. nin-e bar ku3-ga a bi2-in-de2
96. u4 bur szukur2-ra2 igi kar2-kar2-de3
97. {d}nansze-e sag-e kurum7-ma igi ba-ni-ib-kar2-kar2
98. dub-sar mah-a-ni {d}nisaba-ke4
99. dub kal-kal du10-ba nam-mi-in-gar
100. gi-dub-ba ku3-sig17 szu ba-szi-in-ti
101. {d}nansze-er sag-e gu dili-a si mu-na-ab-sa2-e
102. kusz la2 kusz-ni-ta mu-na-da-an-ku4-ku4
103. gada la2 gada-ni-ta mu-na-da-an-dib-be2
104. kusz la2 kusz-ni-ta nu-mu-na-da-an-ku4-ku4
105. gada la2 gada-ni-ta nu-mu-na-da-an-dib-be2
106. lu2 dub gub-ba za3 hun-ga2-bi
107. igi du8 lu2-inim-ma-be2-e-ne
108. lu2-inim-ma e2 sah7-a-na-ka gu3 mu-ni-ib-de2-a
109. sag balag-ga2 ki-gub-ba-ni-sze3 musz3 ba-szi-in-tum2-mu
110. lugal sag zi-da en3 tar-tar {d}ha-ia3 lu2 dub-ba-ke4
111. sag zi nin-a-na bi2-in-du11-ga im-ma bi2-in-gub-be2
112. geme2 nin-a-na nu-um-mi-in-du11-ga im-ma bi2-in-kid2-kid2
113. dug-dug a nu-de2-e giri3 si nu-sa2-e
114. {gesz}bugin nig2-silag-ga2 nu-luh-ha
115. e2 ge6 u3-na-ka izi dib-ba
116. e2 an-bar7-ka mu7-mu7 gar-ra
117. szita-esz3-a bala gub-ba-ni
118. ki-gub-ba-ni-sze3 musz3 ba-szi-in-tum2-mu
119. susbu lu2 szukur2-ra2 bala-a re inim gar mu-un-gar-ra
120. u3 sanga e2-a mu-un-ti-la re
121. szir3 ku3 inim sza3-ga gal2-la-ni pa nu-um-mi-in-e3-a
122. mu-un-zu-a-ra nu-mu-un-zu-a-ra um-ma-na-ra-an-ba
123. garza ama {d}nansze-ke4 pa e3 mu-da-ak-e
124. inim-inim-ma-bi dirig nu-ga2-ga2
125. garza-bi-sze3 la-ba-an-tah-e
126. me-bi me na-me lu2 nu-dub-dub-e
127. ur5 nig2-nam-bi nu-dub-dub-e-a-asz
128. e2 {d}nansze-ka dub nu-um-ku4-ku4
129. kar-ra lu2 mu-un-dib-be2
130. e2 {d}nansze-ka i7-lu2-ru-gu2 lu2 mu-un-dadag
131. esz-bar kin szir3 ku3 KA abzu-ta um-ta-e3-a-ra
132. |EZEN.MUSZ3|-e szir3 im-ta-zu-zu
133. enkum ninkum szu-luh im-da-pa3-de3
134. inim tur-bi du11-ga |KAxX|-a dirig gar-ra
135. inim-inim-ma-bi la-ba-an-tah-e
136. ka du3-a nig2-a2-zi du11-ga gu2-bi nu-mu-un-szi-ib-zi
137. szu dirig DU-a szu mah gid2-i-de3
138. szu KA-ta sa2-a nig2-a2-zi dim2-e
139. usz gar-ra szu i-ni-ib-bala-e-a in dub-ba kur2-ra
140. ki nam-erim2-ma-sze3 sag gid2-i
141. sag nig2-sag3 KA nig2-ku5 ak-a nig2-szab-ta ba-a
142. na4 tur-re na4 gu-la-ar szu ba-an-zi-ga
143. {gesz}ba-an tur-re {gesz}ba-an gu-la-ar szu ba-an-zi-ga
144. nig2 un-tuku nig2 al ba-an-e-a
145. un-gu7 i3-gu7-bi li-bi2-in-du11-ga
146. un-nag i3-nag-bi li-bi2-in-du11-ga
147. utul2 ga-mu-ra-ab-gub-ba kasz ga-mu-ra-ab-sur-ra
148. geme2 dingir-ra szu la2-a re e2-ta KA gi4-a
149. nir nu-gal2 e2-a ti-la re igi-tum4 la2 ak-a
150. kesz2-ra2 ga-gu7 um-mi-in-du11-ga
151. kesz2-ra2 ga-nag um-mi-in-du11-ga
152. {d}nansze ninda i3 nunuz dalla-ka
153. ki a2 zi-ga-ka lu2 la-ba-an-gu7-e
154. lu2 a2 zi-ga um-mi-in-gu7-a inim-bi la-ba-an-tum3
155. igi TUM zu2 guz giri3 ki te-te
156. nu-mu-e-se3-ge nu-mu-e-da-sa2-e
157. a2-gal2-la lu2-ra [...]
158. a2-tuku e-sir2-ra gi du3-a
159. lu2 dam tuku nu-mu-un-su-ra dam-a-ni mu-na-ra-x x
160. u4 ib2-ba-na zu2 mu-un-li9-a
161. u4 su-mu-ug-ga-na a-tar mu-un-da-ak-e
162. nin-ra KA x-a-ni nu-um-ma-an-zi-zi
163. nin sag en3 tar kur-kur-ra-ke4
164. in-nin ama {d}nansze sza3-ba igi mi-ni-in-gal2
165. nu-siki ka sag-ga2 ak nu-mu-su GIL ag2-ge26-da
166. ki-gul-la a2-tuku-ur2 ga2-ga2-da
167. a2-tuku a2 nu-tuku-ra ga2-ga2-da
168. ama dumu-ni gu3 a2 zi de2-a
169. dumu ama-a-ni-ir ka du3-a du11-ga
170. szesz-ban3-da szesz-gal-a-ni-ir inim gaba-na du11-ga a-a-ra inim gi4-a
171. nin USZ gid2-da lu2 szu nu2-a
172. {d}nansze USZ gid2-da lu2 szu gal2-la-a
173. sza3 kalam-ma gi hal-hal-la-gin7 {d}nansze igi mi-ni-in-gal2
174. SZE3-bi za3 lu2-bi i3-gal2
175. nimgir-a-ni en {d}hendur-sag-ga2-ke4 zu2 kesz2 mu-na-ab-ak
176. {d}lamma-a-ni {d}dumu-tur-szu-gi4 gesz-la2-bi nu-mu-un-DU
177. {d}udug ka gi gub-ba ka gi en-nu-ug3 ak-e
178. e2 sirara{ki}-a a su3-a-ni
179. e2 an-bar7-ka e2 sa la2-a-ni
180. {d}nansze inim-bi sa2-e-bi mu-un-NE-[...]
181. u3-luh-ha su3-su3 abzu sza3-ga nir-gal2 x x
182. gi-gun4-na e2 {d}nansze-ka en gaba gi nu-tuku
183. a2 ag2-ga2-bi e2 {d}nansze-ta
184. lugal-e en {d}hendur-sag-ga2 nam-ma-da-ra-e3
185. i-bi2 dugud-gin7 ki am3-u2-us2
186. inim-bi dungu sir2-sir2 an-da im-da-la2
187. bulug nam-dam-ma tesz2-bi ba-dab5
188. lugal-e en {d}hendur-sag-ga2-ke4 tesz2-bi ba-ra-si-il
189. zi-du zi-du-a bi2-in-gub-be2
190. erim2-du ki-erim2-e ba-ab-szum2-mu
191. di nu-siki-ka i-ni-in-ku5-de3
192. di nu-mu-un-su-ka ba-da-ab-us2-e
193. di ama dumu-ka-kam si im-sa2-e
194. tukum-bi ama dumu-ni-ir
195. in-tuku mu-da-an-gu7 in-tuku mu-da-an-nag
196. in-bul-bul-a-ni ka-na im-bu
197. za3-bi-a lu2 sa2-du11-ga-bi mu-un-da-an-tusz-a
198. u2 il2 edin-na nig2-tum2-a-ni ama-ni la-ba-ni-in-dib
199. ama iri gu-la mu-un-tu-da-ni-ir
200. igi sza-ra gu2 szub-bi-a inim la-ba-an-na-ni-in-du11
201. tukum-bi ama dumu-ni-ir
202. ki a2 zi-ga-ka gu3 ba-da-an-de2
203. ama [...]-ni szu im-ma-ra-an-si-ig
204. ubur ga gal2-la-ni a ba-da-an-nag
205. ama-ba inim kin-e inim i3-kin-kin
206. nin KA bulug-ga-ke4 ki e3 x IN x x
207. lugal nig2-si-sa2-e ki ag2 {d}hendur-sag-ga2-ke4
208. inim-inim-ma-bi si um-mi-in-sa2 di-bi igi u3-[...]
209. nam-tag-bi ugu ama dumu-ka-ka i-im-ga2-ga2-de3
210. a2 nam-tag dugud-da nu-mu-un-da-il2-i-da
211. lu2-ulu3-bi dingir a-ra-zu-a nu-um-ma-an-tuku-tuku
212. tukum-bi ama dumu-ni-ir
213. in-tuku nu-mu-da-an-gu7 in-tuku nu-mu-da-an-nag
214. in-bul-bul-a-ni ka-na nu-um-bu
215. za3-bi-a lu2 sa2-du11-ga-bi nu-mu-da-an-tusz-a
216. u2 il2 edin-na nig2-tum2-a-ni ama-ni ba-ni-in-dib
217. ama iri gu-la mu-un-tu-da-ni-ir
218. igi sza-ra gu2 szub-bi-a inim ba-na-ni-in-du11
219. lugal nig2-a2-zi-ga hul gig {d}hendur-sag-ga2-ke4
220. lu2-ulu3-bi a-gin7 ki-lul-la im-mi-in-e
221. dumu-bi-ra sze-gin7 sahar sis za3 mu-na-an-tag-ge
222. inim ama ugu-na mu-un-da-an-ba-a lu2 im-ma-ab-szum2-mu
223. in dub-ba inim gi-na-a-kam
224. gal-zu inim si sa2-a-bi
225. nin um-ma lagasz{ki} ki gar-ra
226. {d}ga2-tum3-du10-da [...] KA-bi [...]
227. {d}nansze-er inim si sa2-bi KA [...] mu-na-ab-[...]
228. nin mah-am3 inim-ma-ni x [...]
229. nin {d}en-lil2-gin7 nam tar [...]
230. bara2 sirara{ki}-ka [...] x x
231. me-ni szen-szen-na igi-ni i-ni-gal2
232. e2 abzu-ta me nam-ta-ba
233. sirara{ki}-sze3 dingir lagasz{ki}-a gu2 mu-un-na-si-si
234. na4 gi-na ku3 la2-e-de3 gi-gur gi-na gub-bu-de3
235. {gesz}ba-an inim gi-na kur-kur-ra szu ba-an-ga2-ga2-ne
236. sipa mas-su kalam-ma x gal2 kur-kur-ra
237. {d}isztaran di si sa2-a kalam-a ti-la-am3
238. KA x x [...] {d}nin-gesz-zi-da-ke4 [...] mi-ni-in-dab5
239. [...] x si im-sa2-e-de3
240. [...] x ib2-ta-ba-ba-e
241. na4 gi-na ku3 la2-e-de3 gi-gur gi-na gub-bu-de3
242. {gesz}ba-an inim gi-na kur-kur-ra szu ba-ga2-ga2-ne
243. [...] mah-a mar-za gal-gal-la-kam
244. [...] x A szu? SZUL gesz x ga
245. [...]-ra erim3 gar-gar-ra
246. [...] dug a nu-silig-ge-dam
247. [...] {gi}pisan-a musz3 nu-tum2-mu-da
248. [...] nin erim3-ma-ke4
249. [...] mah-a-ni um-mi-in-gar ku-dun-bi tuku-tuku-da
250. nimgir-a-ni en {d}hendur-sag-ga2 a2-bi mu-da-an-ag2
251. nin-gu10 me-zu me mah-am3 me-a dirig-ga-am3
252. {d}nansze me-zu me na-me nu-un-ga-an-da-sa2
253. an lugal-e igi hul2-la-ni mu-un-szi-bar-bar-re
254. {d}en-lil2-da bara2 nam tar-re-da mu-un-da-an-tusz-a
255. a-a {d}en-ki-ke4 nam i-ri-in-tar
256. {d}nansze dumu eridu{ki}-ga tu-da za3-mi2-zu du10-ga-am3

Witnesses not aligned to the composite text

Cite this Artifact

CDLI contributors. 2026. “Q000690 CDLI Literary 000690 (Nanshe A) Composite.” Cuneiform Digital Library Initiative. October 6, 2026. https://cdli.earth/artifacts/composites-score/Q000690.
CDLI contributors. (2026, October 6). Q000690 CDLI Literary 000690 (Nanshe A) composite. Cuneiform Digital Library Initiative. https://cdli.earth/artifacts/composites-score/Q000690
CDLI contributors (2026) Q000690 CDLI Literary 000690 (Nanshe A) composite, Cuneiform Digital Library Initiative. Available at: https://cdli.earth/artifacts/composites-score/Q000690 (Accessed: October 6, 2026).
@misc{CDLI2026Q000690,
	note = {[Online; accessed 2026-10-06]},
	author = {{CDLI contributors}},
	year = {2026},
	month = {oct 6},
	title = {Q000690 {CDLI} {Literary} 000690 ({Nanshe} {A}) composite},
	url = {https://cdli.earth/artifacts/composites-score/Q000690},
	howpublished = {https://cdli.earth/artifacts/composites-score/Q000690},
}


TY  - ELEC
AU  - CDLI contributors
DA  - 2026/10/6/
PY  - 2026
ID  - temp_id_024530990662
M1  - 2026/10/6/
TI  - Q000690 CDLI Literary 000690 (Nanshe A) composite
UR  - https://cdli.earth/artifacts/composites-score/Q000690
ER  -

Cite this Artifact

CDLI contributors. 2026. “Q000690 CDLI Literary 000690 (Nanshe A) Composite.” Cuneiform Digital Library Initiative. October 6, 2026. https://cdli.earth/artifacts/composites-score/Q000690.
CDLI contributors. (2026, October 6). Q000690 CDLI Literary 000690 (Nanshe A) composite. Cuneiform Digital Library Initiative. https://cdli.earth/artifacts/composites-score/Q000690
CDLI contributors (2026) Q000690 CDLI Literary 000690 (Nanshe A) composite, Cuneiform Digital Library Initiative. Available at: https://cdli.earth/artifacts/composites-score/Q000690 (Accessed: October 6, 2026).
@misc{CDLI2026Q000690,
	note = {[Online; accessed 2026-10-06]},
	author = {{CDLI contributors}},
	year = {2026},
	month = {oct 6},
	title = {Q000690 {CDLI} {Literary} 000690 ({Nanshe} {A}) composite},
	url = {https://cdli.earth/artifacts/composites-score/Q000690},
	howpublished = {https://cdli.earth/artifacts/composites-score/Q000690},
}


TY  - ELEC
AU  - CDLI contributors
DA  - 2026/10/6/
PY  - 2026
ID  - temp_id_014477231960
M1  - 2026/10/6/
TI  - Q000690 CDLI Literary 000690 (Nanshe A) composite
UR  - https://cdli.earth/artifacts/composites-score/Q000690
ER  -
This website uses essential cookies that are necessary for it to work properly. These cookies are enabled by default.