RINAP 3/2 Sennacherib 140 composite (P467155)

object composite text
surface a
  beginning broken
1'. [...] x x [...] x x? x [...]
2'. qe2-reb hur-sza2-a-ni zaq-ru-ti _a-sza3_ nam-ra-s,i i-na _ansze-kur-ra_ ar-kab-ma _{gesz}gigir giri3-min_-ia i-na ti-ik-ka-ti u2-sza2-asz2-szi asz2-ru szup-szu-qu i-na _giri3-min_-ia2 ri-ma-nisz at-tag-gesz
3'. {iri}e2-{disz}ki-lam-za-ah {iri}ha-ar-disz-pi {iri}e2-{disz}ku-bat-ti _iri-mesz_-ni-szu2-nu _e2 bad3-mesz_ dan-nu-ti al-me _kur_-ud _ug3-mesz ansze-kur-ra-mesz ansze-kunga-mesz ansze-mesz gu4-mesz_ u3 _u8-udu-hi-a_ ul-tu qer-bi-szu2-un u2-sze-s,a-am-ma szal-la-tisz am-nu
4'. u3 _iri-mesz_-szu2-nu _tur-mesz_ sza ni-ba la i-szu-u2 ap-pul aq-qur u2-sze-me kar-mesz _e2 edin_ kul-ta-ri mu-sza2-bi-szu2-nu i-na {d}gesz-bar aq-mu-ma di-tal-lisz u2-sze-mi
5'. u2-ter-ma {iri}e2-{disz}ki-lam-za-ah szu-a-tu a-na bir-tu-ti as,-bat _ugu_ sza u4-me pa-ni _bad3-mesz_-szu2 u2-dan-nin-ma _ug3-mesz kur-kur_ ki-szit-ti _szu-min_-ia ina lib3-bi u2-sze-szib
6'. _ug3-mesz kur_ {lu2}kasz-szi-i u3 _kur_ {lu2}ia-su-bi-gal-la-a-a sza la-pa-an _{gesz}tukul-mesz_-ia ip-par-szid-du ul-tu qe2-reb _kur_-i u2-sze-ri-dam-ma ina {iri}har-disz-pi {iri}e2-{disz}ku-bat-ti u2-szar-me
7'. i-na _szu-min_ {lu2}szu-ut _sag_-ia _{lu2}en-nam_ {iri}ar-rap-ha am-nu-szu2-nu-ti _{na4}na-ru2-a_ u2-sze-pisz-ma li-i-tum ki-szit-ti _szu-min_ sza2 _ugu_-szu2-un asz2-tak-ka-nu s,e-ru-usz-szu2 u2-sza2-asz2-t,ir-ma ina qer-bi _iri_ ul-ziz
8'. pa-an ni-ri-ia2 u2-ter-ma a-na {kur}el-li-pi as,-s,a-bat har-ra-nu el-la-mu-u-a {disz}is-pa-ba-a-ra _lugal_-szu2-un _iri-mesz_-szu2 dan-nu-ti _e2_ ni-s,ir-ti-szu2 u2-masz-szir-ma a-na ru-qe2-e-ti in-na-bit
9'. gim-ri _kur_-szu _dagal_-ti _gin7 muru9_ as-hu-up {iri}mar-u2-bisz-ti {iri}ak-ku-ud-du _iri-mesz e2 lugal_-ti-szu2 a-di 3(u) 4(disz) _iri-mesz tur-mesz_ sza2 li-me-ti-szu2-nu al-me _kur_-ud ap-pul aq-qur ina {d}gesz-bar aq-mu
10'. _ug3-mesz tur gal nita_ u _munus ansze-kur-ra-mesz ansze-kunga-mesz ansze-mesz ansze-gam-mal-mesz gu4-mesz_ u3 _u8-udu-hi-a_ la-a mi-nam asz2-lu-lam-ma a-di la ba-szi-i u2-sza2-lik-szu2-ma u2-s,a-ah-hi-ir ma-a-su
11'. {iri}s,i-s,i-ir-tu2 {iri}ku-um-ma-ah-lum _iri-mesz_ dan-nu-ti a-di _iri-mesz_-ni _tur-mesz_ sza li-me-ti-szu2-nu {kur}e2-{disz}ba-ar-ru-u2 na-gu-u a-na gi-mir-ti-szu2 ul-tu qe2-reb _kur_-szu2 ab-tuq-ma _ugu_ mi-s,ir _kur_ asz-szur{ki} u2-rad-di
12'. {iri}el-en-za-asz2 a-na _iri lugal_-ti u3 dan-na-at na-ge-e szu-a-te as,-bat-ma _mu_-szu2 mah-ra-a u2-nak-kir-ma {iri}kar-{disz}{d}suen-szesz-mesz-eri-ba at-ta-bi ni-bit-su
13'. _ug3-mesz kur-kur_ ki-szit-ti _szu-min_-ia i-na lib3-bi u2-sze-szib i-na _szu-min_ {lu2}szu-ut _sag_-ia _{lu2}en-nam_ {iri}har-har am-nu-ma u2-rap-pisz ma-a-ti
14'. i-na ta-a-a-ar-ti-ia sza {kur}ma-da-a-a ru-qu-ti sza i-na _lugal-mesz ad-mesz_-ia ma-am-man la isz-mu-u zi-kir _kur_-szu2-un man-da-at-ta-szu2-un ka-bit-tu am-hur a-na ni-ri be-lu-ti-ia u2-szak-ni-su-nu-ti
15'. i-na szal-szi ger-ri-ia a-na {kur}ha-at-ti lu al-lik {disz}lu-li-i _lugal_ {iri}s,i-du-un-ni pul-hi me-lam-me be-lu-ti-ia2 is-hu-up-szu2-ma a-na ru-uq-qi2 _murub4_ tam-tim in-na-bit
16'. {iri}s,i-du-un-nu _gal_-u2 {iri}s,i-du-un-nu s,e-eh-ru {iri}e2-zi-it-te {iri}s,a-ri-ip-tu2 {iri}ma-hal-li-ba {iri}u2-szu-u2 {iri}ak-zi-bi {iri}ak-ku-u
17'. _iri-mesz_-szu2 dan-nu-ti _e2 bad3-mesz_-ni a-szar ri-i-ti u3 masz-qi2-ti _e2_ tuk-la-a-te-szu2 ra-szub-bat _{gesz}tukul_ {d}asz-szur _en_-ia is-hu-up-szu2-nu-ti-ma ik-nu-szu2 sze-pu-u-a
18'. {disz}tu-ba-a'-lu i-na _{gesz}gu-za lugal_-ti-szu2 _ugu_-szu2-un u2-sze-szib-ma _gun_ man-da-at-tu2 be-lu-ti-ia2 szat-ti-szam la ba-t,a-lu u2-kin s,e-ru-usz-szu2
19'. sza {disz}mi-nu-hi-im-mu {iri}sam-si-mu-ru-na-a-a {disz}tu-ba-a'-lu {iri}s,i-du-un-na-a-a {disz}ab-di-li-i'-ti {iri}a-ru-da-a-a {disz}u2-ru-mil-ki {iri}gu-ub-la-a-a
20'. {disz}mi-ti-in-ti {iri}as-du-da-a-a {disz}bu-du-dingir {kur}e2-am-ma-na-a-a {disz}kam-mu-su-na-ad-bi {kur}ma-'a-ba-a-a {disz}{d}a-a-ram-mu {kur}u2-du-um-ma-a-a
21'. _lugal-mesz_-ni _kur_ mar-tu{ki} ka-li-szu2-nu _igi-sa2_-e szad-lu-ti ta-mar-ta-szu2-nu ka-bit-tu a-di 4(disz)-szu2 a-na mah-ri-ia isz-szu-nim-ma isz-szi-qu _giri3-min_-ia
22'. u3 {disz}s,i-id-qa-a _lugal_ {iri}is-qa-lu-na sza la ik-nu-szu2 a-na ni-ri-ia2 _dingir-mesz e2 ad_-szu2 sza2-a-szu _dam_-su _dumu-mesz_-szu2 _dumu-munus-mesz_-szu2 _szesz-mesz_-szu2 _numun e2 ad_-szu2 as-su-ha-am-ma a-na _kur_ asz-szur{ki} u2-ra-asz2-szu2
23'. {disz}lugal-lu-da3-ri _dumu_ {disz}ru-kib-ti _lugal_-szu2-nu mah-ru-u2 _ugu ug3-mesz_ {iri}is-qa-lu-na asz2-kun-ma na-dan _gun_ kad3-re-e be-lu-ti-ia2 e-mid-su-ma i-sza2-at, ab-sza2-a-ni
24'. i-na me-ti-iq ger-ri-ia {iri}e2-da-gan-na {iri}ia-pu-u {iri}ba-na-a-a-bar-qa {iri}a-zu-ru _iri-mesz_ sza2 {disz}s,i-id-qa-a sza2 a-na _giri3-min_-ia2 ar2-hisz la ik-nu-sza2 al-me _kur_-ud asz2-lu-la szal-la-su-un
25'. _{lu2}szagina-mesz {lu2}nun-mesz_ u3 _ug3-mesz_ {iri}am-qar-ru-na sza {disz}pa-di-i _lugal_-szu2-nu _en_ a-de-e u3 ma-mit sza2 asz-szur{ki} bi-re-tu2 _an-bar_ id-du-ma a-na {disz}ha-za-qi-a-u {kur}ia-u2-da-a-a id-di-nu-szu2 nak-risz
26'. a-na an-zil-li e-pu-szu ip-lah3 lib3-ba-szu2-un _lugal-mesz_ {kur}mu-s,u-ri _{lu2}erin2-mesz {gesz}pan {gesz}gigir-mesz ansze-kur-ra-mesz_ sza2 _lugal_ {kur}me-luh-ha e-mu-qi2 la ni-bi ik-te-ru-nim-ma il-li-ku re-s,u-su-un
27'. i-na ta-mir-ti {iri}al-ta-qu-u el-la-mu-u-a si-id-ru szit-ku-nu u2-sza2-'a-lu _{gesz}tukul-mesz_-szu2-un i-na tukul-ti {d}asz-szur _en_-ia it-ti-szu2-un am-da-hi-is,-ma asz2-ta-kan _bad5-bad5_-szu2-un
28'. _{lu2}en {gesz}gigir-mesz_ u3 _dumu-mesz lugal-mesz_ {kur}mu-s,u-ra-a-a a-di _{lu2}en {gesz}gigir-mesz_ sza2 _lugal_ {kur}me-luh-ha bal-t,u-us-su-un i-na _murub4_ tam-ha-ri ik-szu-da _szu-min_-a-a
29'. {iri}al-ta-qu-u2 {iri}ta-am-na-a al-me _kur_-ud asz2-lu-la szal-la-su-un a-na {iri}am-qar-ru-na aq-rib-ma _{lu2}szagina-mesz {lu2}nun-mesz_ sza2 hi-it,-t,u u2-szab-szu-u2 a-duk-ma i-na di-ma-a-te si-hir-ti _iri_ a-lul pag-ri-szu2-un
30'. _dumu-mesz iri_ e-pisz an-ni u3 gil2-la-ti a-na szal-la-ti am-nu si-it_-ti_-tu-te-szu2-nu la ba-bil hi-t,i-ti u3 gul-lul-ti sza2 a-ra-an-szu2-nu la ib-szu2-u usz-szur-szu-un aq-bi
31'. {disz}pa-di-i _lugal_-szu2-nu ul-tu qe2-reb {iri}ur-sa-li-im-mu u2-sze-s,a-am-ma i-na _{gesz}gu-za_ be-lu-ti _ugu_-szu2-un u2-sze-szib-ma man-da-at-tu2 be-lu-ti-ia2 u2-kin s,e-ru-usz-szu2
32'. sza {disz}ha-za-qi-a-u2 {kur}ia-u2-da-a-a sza2 la ik-nu-szu2 a-na ni-ri-ia2 4(u) 6(disz) _iri-mesz_-szu2 _e2 bad3-mesz?_ dan-nu-ti u3 _iri-mesz tur-mesz_ sza li-me-ti-szu2-nu sza2 ni-ba la i-szu-u
33'. i-na szuk-bu-us a-ram-me u3 qur-ru-ub szu-pe-e mit-hu-us, zu-uk _giri3-min_ pil-szi nik-si u3 kal-ba-na-ti al-me ak-szud{ud}
34'. 2(disz) _me lim_ 1(disz) _me_ 5(u) _ug3-mesz tur gal nita_ u _munus ansze-kur-ra-mesz ansze-kunga-mesz ansze-mesz ansze-gam-mal-mesz gu4-mesz_ u3 _u8-udu-hi-a_ sza2 la ni-bi ul-tu qer-bi-szu2-un u2-sze-s,a-am-ma szal-la-tisz am-nu
35'. sza2-a-szu2 _gin7 muszen_ qu-up-pi qe2-reb {iri}ur-sa-li-im-ma _iri lugal_-ti-szu2 e-sir2-szu {iri}hal-s,u-_mesz ugu_-szu2 u2-rak-kis-ma a-s,e-e _abul iri_-szu2 u2-ter-ra ik-ki-bu-usz
36'. _iri-mesz_-szu2 sza asz2-lu-la ul-tu qe2-reb _kur_-szu2 ab-tuq-ma a-na {disz}mi-ti-in-ti _lugal_ {iri}as-du-di u3 {disz}pa-di-i _lugal_ {iri}am-qar-ru-na {disz}gissu-en _lugal_ {kur}ha-zi-te ad-din-ma u2-s,a-ah-hir _kur_-su
37'. e-li _gun_ mah-ri-ti na-da-an szat-ti-szu2-un man-da-at-ti kad3-re-e be-lu-ti-ia2 u2-rad-di-ma u2-kin s,e-ru-usz-szu2
38'. szu-u2 {disz}ha-za-qi-a-u2 pu-ul-hi me-lam-me be-lu-ti-ia is-hu-pu-szu2-ma {lu2}ur2-bi u3 _{lu2}erin2-mesz_-szu2 _saga-mesz_ sza a-na dun-nu-un {iri}ur-sa-li-im-mu _iri lugal_-ti-szu2 u2-sze-ri-bu-u-ma ir-szu-u til-la-a-ti
39'. it-ti 3(u) _gun ku3-sig17_ 8(disz) _me gun ku3-babbar_ ni-siq-ti gu-uh-li tak2-kas3-si _{na4}an-za-gul-me gal-mesz {gesz}na2-mesz zu2 {gesz}gu-za-mesz_ ne2-me-di _zu2 kusz am-si zu2 am-si {gesz}esi {gesz}taszkarin_ mim-ma szum-szu2 ni-s,ir-tu ka-bit-tu
40'. u3 _dumu-munus-mesz_-szu2 _{munus}ug3-mesz e2-gal_-szu2 _{lu2}nar-mesz {munus}nar-mesz_ a-na qe2-reb _nina{ki} iri_ be-lu-ti-ia2 _egir_-ia u2-sze-bi-lam-ma a-na na-dan man-da-at-ti u3 e-pesz _arad_-u-ti isz-pu-ra rak-bu-szu
41'. i-na 4(disz)-e ger-ri-ia [...] u2-szad-gi-lu pa-nu-usz-szu2
42'. [...] x x [...]
  rest broken