RINAP 3/1 Sennacherib 022, ex. 002 (P421809)

Official or display prism excavated in Nineveh (mod. Kuyunjik), dated to the Neo-Assyrian (ca. 911-612 BC) period and now kept in British Museum, London, UK

Museum Collection(s)

British Museum, London, UK

Museum Number

BM 091032

Period

Neo-Assyrian (ca. 911-612 BC)

Provenience

Nineveh (mod. Kuyunjik)

Artifact Type

Prism

Material(s)

Clay

Genre / Subgenre(s)

Official or display (witness)

Language(s)

Akkadian

Measurements

-

Witness

Text

object prism
surface a
column 1
1. {disz}{d}en-zu-szesz-mesz-eri-ba _lugal gal lugal_ dan-nu
2. _lugal_ kisz-sza2-ti _lugal kur_ asz-szur{ki} _lugal_ kib-rat _limmu2_-tim
3. _re-e2-um_ it-pe-szu2 mi-gir _dingir-mesz gal-mesz_
4. na-s,ir kit-ti ra-'i-im mi-sza2-ri
5. e-pisz u2-sa-a-ti a-lik tap-pu-ut a-ki-i
6. sa-hi-ru dam-qa-a-ti et,-lum git2-ma-lum
7. zi-ka-ru qar-du a-sza2-red kal ma-al-ki
8. rap-pu la-'i-it, la ma-gi-ri
9. mu-szab-ri-qu za-ma-a-ni
10. {d}asz-szur _kur_-u2 _gal_-u2 _lugal_-ut la sza2-na-an
11. u2-szat-li-ma-an-ni-ma
12. _ugu_ gi-mir a-szib pa-rak-ki u2-szar-ba-a _{gesz}tukul-mesz_-ia
13. ul-tu _a-ab-ba_ e-le-ni-ti sza sza2-lam {d}utu-szi
14. a-di tam-tim szap-li-ti sza s,i-it {d}utu-szi
15. gim-ri s,al-mat _sag-du_ u2-szak-nisz sze-pu-u2-a
16. u3 mal-ki szep-s,u-ti e-du-ru ta-ha-zi
17. da-ad2-me-szu-un iz-zi-bu-ma ki-ma su-tin-ni{muszen}
18. ni-gi-is,-s,i e-disz ip-par-szu2 a-szar la 'a-a-ri
  single ruling
19. i-na mah-re-e ger-ri-ia sza {disz}{d}marduk-ibila-szum2-na
20. _lugal_ {kur}kar2-{d}dun-ia2-asz3 a-di _erin2 hi-a_ elam-ma{ki} re-s,i-szu2
21. i-na ta-mir-ti kisz{ki} asz2-ta-kan _bad5-bad5_-szu2
22. i-na _muru2_ tam-ha-ri szu-a-tu e-zib _karasz_-su
23. e-disz ip-par-szid-ma na-pisz-tusz e-t,i2-ir
24. _{gesz}gigir-mesz ansze-kur-ra-mesz_ {gesz}s,u-um-bi _{ansze}kunga-mesz_
25. sza i-na qit-ru-ub ta-ha-zi u2-masz-sze-ru ik-szu-da _szu-min_-a-a
26. a-na _e2-gal_-szu2 sza qe2-reb babila2{ki} ha-disz e-ru-um-ma
27. ap-te-e-ma _e2_ ni-s,ir-ti-szu2 _ku3-sig17 ku3-babbar_
28. u2#-[x x] _ku3-sig17 ku3-babbar# na4#_ a-qar-tu mim-ma szum-szu2
29. _nig2-szu nig2-gur11_ la ni-bi ka-bit#-tu# _gun_ {munus}_sza3-e2-gal-mesz_-szu2
30. _{lu2}tirum-mesz_ {lu2}man-za-az pa-ni _{lu2}nar-mesz_ {munus}_nar-mesz_
31. si-hir-ti um-ma-a-ni ma-la ba-szu-u2
32. mut-tab-bi-lu-tu2 _e2-gal_-usz u2-sze-s,a-am-ma
33. szal-la-ti-isz am-nu i-na e-muq {d}asz-szur _en_-ia
34. 1(gesz2) 1(u) 5(disz) _iri-mesz_-szu2 dan-nu-ti _e2 bad3-mesz_-ni sza {kur}kal-di
35. u3 4(disz) _me_ 2(u) _iri-mesz_-ni _tur-mesz_ sza li-me-ti-szu2-nu
36. al-me ak-szud{ud} asz2-lu-la szal-la-su-un
37. {lu2}ur2-bi {lu2}a-ra-mu {lu2}kal-du sza qe2-reb unu{ki}
38. nibru{ki} kisz{ki} hur-sag-kalam-ma{ki} gu2-du8-a{ki} zimbir{ki}
39. a-di _dumu-mesz iri en_ hi-it,-t,i u2-sze-s,a-am-ma
40. szal-la-tisz am-nu i-na ta-a-a-ar-ti-ia
41. {lu2}tu-'u-mu-na {lu2}ri-hi-hu {lu2}ia-daq-qu
42. {lu2}u2-bu-du {lu2}gib-re-e {lu2}ma-la-hu
43. {lu2}gu-ru-mu {lu2}u2-bu-lum {lu2}da-mu-nu
44. {lu2}gam-bu-lum {lu2}hi-in-da-ru {lu2}ru-'u-u2-a
45. {lu2}pu-qu-du {lu2}ha-am-ra-nu {lu2}ha-ga-ra-nu
46. {lu2}na-ba-tu {lu2}li-i'-ta-u2 {lu2}a-ra-mu
47. la kan-szu-u2-ti mit-ha-risz ak-szud{ud}
48. 2(disz) _me_ 8(disz) _lim un-mesz tur gal nita_ u3 _munus_
49. _ansze-kur-ra-mesz {ansze}kunga-mesz ansze-mesz {ansze}gam-mal-mesz_
50. _gu4-mesz_ u3 s,e-e-ni sza la ni-bi szal-la-tu
51. ka-bit-tu asz2-lu-la a-na qe2-reb _kur_ asz-szur{ki}
52. i#-na# me-ti-iq ger-ri-ia sza {disz}{d}muati-en-mu-mesz
53. {lu2}qi2-pi {iri}ha-ra-ra-ti _ku3-sig17 ku3-babbar_
54. {gesz}mu-suk-kan-ni _gal-mesz ansze-mesz {ansze}gam-mal-mesz gu4-mesz_
55. u3 s,e-e-ni ta-mar-ta-szu2 ka-bit-tu am-hur
56. ba-hu-la-te {iri}hi-rim-me _{lu2}kur2_ ak-s,i
57. i-na _{gesz}tukul-mesz_ u2-szam-qit-ma e-du ul e-zib
58. pag-ri-szu2-un i-na ga-szi-szi a-lul-ma
59. si-hir-ti _iri_ u2-szal-me na-gu-u2 szu-a-tu
60. a#-na# esz-szu-ti as,-bat 1(disz)-en _gu4_
61. 1(u) _udu-nita2-mesz_ 1(u) _ansze# {gesz}gesztin_ 2(u) _ansze zu2-lum-ma_ re-sze-te-szu2
62. a-na _dingir-mesz_-ni _kur_ asz-szur{ki} _en-mesz_-ia u2-kin da3-ri-szam
  single ruling
63. i-na 2(disz)-e ger-ri-ia {d}asz-szur be-li2 u2-tak-kil-an-ni-ma
64. a-na _kur_ {lu2}kasz-szi-i u3 _kur_ {lu2}ia-su-bi-gal-la-a-a
65. sza ul-tu ul-la a-na _lugal-mesz_-ni _ad-mesz_-ia
66. la kit-nu-szu2 lu al-lik qe2-reb hur-sza2-a-ni zaq-ru-ti
67. _a-sza3_ nam-ra-s,i i-na _ansze-kur-ra_ ar-kab-ma
68. _{gesz}gigir giri3-min_-ia i-na ti-ik-ka-a-ti u2-sza2-asz2-szi
69. asz2-ru szup-szu-qu i-na _giri3-min_-ia ri-ma-nisz at-tag-gisz
70. {iri}e2-{disz}ki-lam-za-ah {iri}har-disz-pi {iri}e2-{disz}ku-bat-ti
71. _iri-mesz_-ni-szu2-nu _e2 bad3-mesz_-ni dan-nu-te al-me _kur_-ud
72. _ug3-mesz ansze-kur-ra-mesz {ansze}kunga-mesz ansze-mesz_
73. _gu4-mesz_ u3 s,e-e-ni ul-tu qer-bi-szu2-un
74. u2-sze-s,a-am-ma szal-la-tisz am-nu u3 _iri-mesz_-ni-szu2-nu _tur-mesz_
75. sza ni-ba la i-szu-i ap-pul aq-qur u2-sze-me kar-mesz
76. _e2 edin_ kul-ta-ri mu-sza2-bi-szu2-nu i-na {d}gesz-bar aq-mu-ma
77. di-tal-lisz u2-sze-me u2-ter-ma {iri}e2-{disz}ki-lam-za-ah
78. szu-a-tu a-na {iri}bir-tu-ti as,-bat _ugu_ sza u4-um pa-ni
79. _bad3-mesz_-szu2 u2-dan-nin-ma _ug3-mesz kur-kur_
80. ki-szit-ti _szu-min_-ia i-na lib3-bi u2-sze-szib
81. _ug3-mesz kur_ {lu2}kasz-szi-i u3 _kur_ {lu2}ia-su-bi-gal-la-a-a
82. sza la-pa-an _{gesz}tukul-mesz_-ia ip-par-szid-du
column 2
1. ul-tu qe2-reb _kur_-i u2-sze-ri-dam-ma
2. i-na {iri}har-disz-pi {iri}e2-{disz}ku-bat-ti u2-szar-me
3. i-na _szu-min_ {lu2}szu-ut _sag_-ia _{lu2}en-nam_ {iri}ar-rap-ha
4. am-nu-szu-nu-ti _{na4}na-ru2-a_ u2-sze-pisz-ma
5. li-i-tum ki-szit-ti _szu-min_ sza _ugu_-szu2-un
6. asz2-tak-ka-nu s,e-ru-usz-szu2 u2-sza2-asz2-t,ir-ma
7. ina qer-bi _iri_ ul-ziz pa-an ni-ri-ia
8. u2-ter-ma a-na {kur}el-li-pi as,-s,a-bat har-ra-nu
9. el-la-mu-u2-a {disz}is-pa-ba-a-ra _lugal_-szu2-un _iri-mesz_-szu2 dan-nu-ti
10. _e2_ ni-s,ir-ti-szu2 u2-masz-szir-ma a-na ru-qe2-e-ti
11. in-na-bit gim-ri _kur_-szu2 _dagal_-tim ki-ma _muru9_ as-hu-up
12. {iri}mar-u2-bisz-ti {iri}ak-ku-ud-du _iri-mesz_-ni
13. _e2 lugal_-ti-szu2 a-di 3(u) 4(disz) _iri-mesz tur-mesz_ sza li-me-ti-szu2-nu
14. al-me ak-szud{ud} ap-pu-ul aq-qur
15. i-na {d}gesz-bar aq-mu _ug3-mesz tur gal nita_ u _munus_
16. _ansze-kur-ra-mesz {ansze}kunga-mesz ansze-mesz {ansze}gam-mal-mesz_
17. _gu4-mesz_ u3 s,e-e-ni a-na la mi-nam asz2-lu-lam-ma
18. a-di la ba-szi-i u2-sza2-lik-szu-ma u2-s,a-hir _kur_-su
19. {iri}s,i-s,i-ir-tu {iri}ku-um-ma-ah-lum _iri-mesz_-ni
20. dan-nu-ti a-di _iri-mesz tur-mesz_ sza li-me-ti-szu2-nu
21. {kur}e2-{disz}ba-ar-ru-u2 na-gu-u2 a-na gi-mir-ti-szu2
22. ul-tu qe2-reb _kur_-szu2 ab-tuq-ma _ugu_ mi-s,ir
23. _kur_ asz-szur{ki} u2-rad-di {iri}el-en-za-asz2
24. a-na _iri lugal_-ti u3 dan-na-at na-ge-e szu-a-tu
25. as,-bat-ma _mu_-szu2 mah-ra-a u2-nak-kir-ma
26. {iri}kar-{d}en-<zu>-szesz-mesz-su at-ta-bi ni-bit-su
27. _ug3-mesz kur-kur_ ki-szit-ti _szu-min_-ia i-na lib3-bi u2-sze-szib
28. i-na _szu-min_ {lu2}szu-ut _sag_-ia _{lu2}en-nam_ {iri}har-har
29. am-nu-ma u2-rap-pisz ma-a-ti i-na ta-a-a-ar-ti-ia
30. sza {kur}ma-da-a-a ru-qu-ti sza i-na _lugal-mesz_-ni
31. _ad-mesz_-ia ma-am-man la isz-mu-u2 zi-kir _kur_-szu2-un
32. man-da-ta-szu2-nu ka-bit-tu am-hur
33. a-na ni-ri be-lu-ti-ia u2-szak-ni-su-nu-ti
  single ruling
34. i-na szal-szi ger-ri-ia a-na {kur}ha-at-ti lu al-lik
35. {disz}lu-li-i _lugal_ {iri}s,i-du-un-ni pul-hi me-lam-me
36. be-lu-ti-ia is-hu-pu-szu-ma a-na ru-uq-qi2
37. _muru2_ tam-tim in#-na#-bit-ma _kur_-szu2 e-mid
38. {iri}s,i-du-un-nu _gal_-u2 {iri}s,i-du-un-nu _tur_
39. {iri}e2-zi-it-te {iri}s,a-ri-ip-tu2 {iri}ma-hal-li-ba
40. {iri}u2-szu-u2 {iri}ak-zi-bi {iri}ak-ku-u2
41. _iri-mesz_-szu2 dan-nu-ti _e2 bad3-mesz_-ni a-szar ri-i-ti
42. u3 masz-qi2-ti _e2_ tuk-la-ti-szu2 ra-szub-bat _{gesz}tukul_
43. {d}asz-szur _en_-ia is-hu-pu-szu-nu-ti-ma ik-nu-szu
44. sze-pu-u2-a {disz}tu-ba-a'-lu i-na _{gesz}gu-za lugal_-ti
45. _ugu_-szu2-un u2-sze-szib-ma _gun_ man-da-at-tu be-lu-ti-ia
46. szat-ti-szam la ba-at,-lu u2-kin s,e-ru-usz-szu2
47. sza {disz}mi-in-hi-im-mu {iri}sam-si-mu-ru-na-a-a
48. {disz}tu-ba-a'-lu {iri}s,i-du-un-na-a-a
49. {disz}ab-di-li-i'-ti {iri}a-ru-da-a-a
50. {disz}u2-ru-mil-ki {iri}gu-ub-la-a-a
51. {disz}mi-ti-in-ti {iri}as-du-da-a-a
52. {disz}bu-du-dingir {kur}e2-{disz}am-ma-na-a-a
53. {disz}kam-mu-su-na-ad-bi {kur}<ma>-'a-ba-a-a
54. {disz}{d}a-a-ram-mu {kur}u2-du-um-ma-a-a
55. _lugal-mesz_-ni _kur_ mar-tu{ki} ka-li-szu2-un _igi-sa2_-e
56. szad-lu-ti ta-mar-ta-szu2-nu ka-bit-tu a-di 4(disz)-szu2
57. a-na mah-ri-ia isz-szu-nim-ma isz-szi-qu _giri3-min_-ia
58. u3 {disz}s,i-id-qa-a _lugal_ {iri}is-qa-al-lu-na
59. sza la ik-nu-szu2 a-na ni-ri-ia _dingir-mesz e2 ad_-szu2 sza2-a-szu2
60. _dam_-su _dumu-mesz_-szu2 _dumu-munus-mesz_-szu2 _szesz-mesz_-szu2 _numun e2 ad_-szu2
61. as-su-ha-am-ma a-na _kur_ asz-szur{ki} u2-ra-asz2-szu2
62. {disz}lugal-lu-da3-ri _dumu_ {disz}ru-kib-ti _lugal_-szu2-nu mah-ru-u2
63. _ugu un-mesz_ {iri}is-qa-al-lu-na asz2-kun-ma na-dan _gun_
64. kad3-re-e be-lu-ti-ia e-mid-su-ma i-sza2-at, ab-sza2-a-ni
65. i-na me-ti-iq ger-ri-ia {iri}e2-da-gan-na
66. {iri}ia-ap-pu-u2 {iri}ba-na-a-a-bar-qa {iri}a-zu-ru
67. _iri-mesz_-ni sza {disz}s,i-id-qa-a sza a-na _giri3-min_-ia
68. ar2-hisz la ik-nu-szu2 al-me _kur_-ud asz2-lu-la szal-la-sun2
69. _{lu2}szagina-mesz {lu2}nun-mesz_ u3 _ug3-mesz_ {iri}am-qar-ru-na
70. sza {disz}pa-di-i _lugal_-szu2-nu _en_ a-de-e u3 ma-mit
71. sza _kur_ asz-szur{ki} bi-re-tu _an-bar_ id-du-ma a-na {disz}ha-za-qi-ia-u2
72. {kur}ia-u2-da-a-a id-di-nu-szu2 nak-risz a-na an-zil-li e-pu-szu2
73. ip-lah3 lib-ba-szu2-un _lugal-mesz_-ni {kur}mu-s,u-ri
74. _{lu2}erin2-mesz {gesz}pan {gesz}gigir-mesz ansze-kur-ra-mesz_ sza _lugal_ {kur}me-luh-hi
75. e-mu-qi2 la ni-bi ik-te-ru-nim-ma il-li-ku
76. re-s,u-us-su-un i-na ta-mir-ti {iri}al-ta-qu-u2
77. el-la-mu-u2-a si-id-ru szit-ku-nu u2-sza2-'a-lu
78. _{gesz}tukul-mesz_-szu2-un i-na tukul-ti {d}asz-szur _en_-ia it-ti-szu2-un
79. am-da-hi-is,-ma asz2-ta-kan _bad5-bad5_-szu2-un
80. _{lu2}en {gesz}gigir-mesz_ u3 _dumu-mesz lugal_ {kur}mu-s,u-ra-a-a
81. a-di _{lu2}en {gesz}gigir-mesz_ sza _lugal_ {kur}me-luh-hi bal-t,u-su-un
82. i-na _muru2_ tam-ha-ri ik-szu-da _szu-min_-a-a {iri}al-ta-qu-u
83. {iri}ta-am-na-a al-me _kur_-ud asz2-lu-la szal-la-sun2
column 3
1. a-na {iri}am-qar-ru-na aq-rib-ma
2. _{lu2}szagina-mesz {lu2}nun-mesz_ sza hi-it,-t,u u2-szab-szu-u2 a-duk-ma
3. i-na di#-ma#-a#-te# si#-hir#-ti# _iri_ a-lul pag-ri-szu2-un
4. _dumu#-mesz# iri_ e-pisz an-ni u3 gil2-la-ti
5. a-na szal-la-ti am-nu si-it-tu-te-szu2-nu
6. la ba-bil hi-t,i-ti u3 gul-lul-ti sza a-ra-an-szu2-nu
7. la ib-szu-u2 usz-szur-szu2-un aq-bi {disz}pa-di-i
8. _lugal_-szu2-nu ul-tu qe2-reb {iri}ur-sa-li-im-mu
9. u2-sze-s,a-am-ma i-na _{gesz}gu-za_ be-lu-ti _ugu_-szu2-un
10. u2-sze-szib-ma man-da-at-tu be-lu-ti-ia
11. u2-kin s,e-ru-usz-szu2 u3 {disz}ha-za-qi-a-u2
12. {kur}ia-u2-da-a-a sza la ik-nu-szu2 a-na ni-ri-ia
13. 4(u) 6(disz) _iri-mesz_-szu2 dan-nu-ti _e2 bad3-mesz_ u3 _iri-mesz tur-mesz_
14. sza li-me-ti-szu2-nu sza ni-ba la i-szu-u2
15. i-na szuk-bu-us a-ram-me u3 qit-ru-ub szu-pi-i
16. mit-hu-s,u zu-uk _giri3-min_ pil-szi nik-si u kal-ban-na-te
17. al-me _kur_-ud 2(disz) _me lim_ 1(disz) _me_ 5(u) _ug3-mesz tur gal nita_ u3 _munus_
18. _ansze-kur-ra-mesz {ansze}kunga-mesz ansze-mesz {ansze}gam-mal-mesz gu4-mesz_
19. u3 s,e-e-ni sza la ni-bi ul-tu qer-bi-szu2-un u2-sze-s,a-am-ma
20. szal-la-tisz am-nu sza2-a-szu2 _gin7 muszen_ qu-up-pi qe2-reb {iri}ur-sa-li-im-mu
21. _iri lugal_-ti-szu2 e-sir2-szu2 {iri}hal-s,u-_mesz_ ugu_-szu2
22. u2-rak-kis-ma a-s,e-e _ka2-gal iri_-szu2 u2-ter-ra
23. ik-ki-bu-usz _iri-mesz_-szu2 sza asz2-lu-la ul-tu qe2-reb _kur_-szu2
24. ab-tuq-ma a-na {disz}mi-ti-in-ti _lugal_ {iri}as-du-di
25. {disz}pa-di-i _lugal_ {iri}am-qar-ru-na u3 {disz}gissu-en
26. _lugal_ {iri}ha-zi-ti ad-din-ma u2-s,a-ah-hir _kur_-su
27. e-li _gun_ mah-ri-ti na-dan szat-ti-szu2-un
28. man-da-at-tu kad3-re-e be-lu-ti-ia u2-rad-di-ma
29. u2-kin s,e-ru-usz-szu2-un szu-u2 {disz}ha-za-qi-a-u2
30. pul-hi me-lam-me be-lu-ti-ia is-hu-pu-szu-ma
31. {lu2}ur2-bi u3 _{lu2}erin2-mesz_-szu2 _saga-mesz_
32. sza a-na dun-nu-un {iri}ur-sa-li-im-mu _iri lugal_-ti-szu2
33. u2-sze-ri-bu-ma ir-szu-u2 til-la-a-ti
34. it-ti 3(u) _gun ku3-sig17_ 8(disz) _me gun ku3-babbar_ ni-siq-ti
35. gu-uh-li tak2-kas3-si _{na4}an-za-gul-me gal-mesz_
36. _{gesz}na2-mesz zu2 {gesz}gu-za-mesz_ ne2-me-di _zu2 kusz am-si_
37. _zu2 am-si {gesz}esi {gesz}tug2_ mim-ma szum-szu2 ni-s,ir-tu2 ka-bit-tu2
38. u3# _dumu#-munus-mesz_-szu2 _munus-un-mesz e2-gal_-szu2 _{lu2}nar-mesz_
39. {munus}_nar-mesz_ a-na qe2-reb nina{ki} _iri_ be-lu-ti-ia
40. _egir_-ia u2-sze-bi-lam-ma a-na na-dan man-da-at-ti
41. u3 e-pesz _ARAD2_-u2-ti isz-pu-ra rak-bu-szu2
  single ruling
42. i-na 4(disz)-e ger-ri-ia {d}asz-szur be-li2 u2-tak-kil-an-ni-ma
43. um-ma-na-te-ia gap-sza2-a-te ad-ke-ma a-na {kur}e2-{disz}ia-kin7
44. a-la-ku aq-bi i-na me-ti-iq ger-ri-ia
45. sza {disz}szu-zu-bi {lu2}kal-da3-a-a a-szib qe2-reb {i7}a-gam-me
46. i-na {iri}bi-it-tu-u2-tu asz2-ta-kan _bad5-bad5_-szu2
47. szu-u2 hur-ba-szu2 ta-ha-zi-ia _ugu_-szu2 im-qut-ma
48. it-ru-ku lib-bu-szu2 ki-ma az-za-ri e-disz ip-par-szid-ma
49. ul in-na-mir a-szar-szu2 pa-an ni-ri-ia u2-ter-ma
50. a-na {kur}e2-{disz}ia-kin7 as,-s,a-bat har-ra-nu
51. szu-u2 {disz}{d}marduk-ibila-szum2-na sza ina a-lak
52. ger-ri-ia mah-re-e _bad5-bad5_-szu2 asz2-ku-nu-ma
53. u2-par-ri-ru el-lat-su ri-gim _{gesz}tukul-mesz_-ia dan-nu-ti
54. u3 ti-ib _me3_-ia ez-zi e-dur-ma
55. _dingir-mesz_ ma-rak _kur_-szu2 i-na _ki-tusz_-szu2-nu id-ke-ma qe2-reb _{gesz}ma2-mesz_
56. u2-szar-kib-ma a-na {iri}na-gi-te-ra-aq-qi2
57. sza qa-bal tam-tim is,-s,u-risz ip-pa-risz _szesz-mesz_-szu2 _numun e2 ad_-szu2
58. sza u2-masz-sze-ru a-hi tam-tim a-di si-it-ti _ug3-mesz kur_-szu2
59. ul-tu {kur}e2-{disz}ia-kin7 qe2-reb {i7}a-gam-me u ap-pa-ra-te
60. u2-sze-s,a-am-ma szal-la-tisz am-nu u2-ter-ma _iri-mesz_-szu2 ap-pul
61. aq-qur u2-sze-me kar-mesz _ugu en_ sa-li-me-szu2
62. _lugal_ {kur}elam-ma{ki} na-mur-ra-tum at-bu-uk
63. i-na ta-a-a-ar-ti-ia {disz}{d}asz-szur-na-din-mu _dumu_ resz-tu-u2
64. tar-bit bir-ki-ia i-na _{gesz}gu-za_ be-lu-ti-szu2 u2-sze-szib-ma
65. _dagal_-tum _kur eme-gi7_ u uri{ki} u2-szad-gil pa-nu-usz-szu2
  single ruling
66. i-na 5(disz) ger-ri-ia ba-hu-la-te {iri}tu-mur-ri
67. {iri}sza2-ru-um {iri}e-za-ma {iri}kib-szu2 {iri}hal-bu-da
68. {iri}qu-u2-a {iri}qa-na sza _gin7_ qin-ni _ti8_{muszen}
69. a-sza2-red _muszen hi-a_ s,e-er zuq-ti {kur}ni-pur _kur_-i mar-s,i
70. szu-bat-sun2 szit-ku-na-at-ma la kit-nu-szu2 a-na ni-i-ri
71. i-na _giri3-min_ {kur}ni-pur ka-ra-szi u2-sza2-asz2-kin-ma
72. it-ti {lu2}qur-bu-ti _giri3-min_-ia na-as-qu-ti
73. u3 _{lu2}erin2-mesz_ ta-ha-zi-ia la ga-me-lu-ti
74. a-na-ku _gin7 am_ ek-di pa-nu-usz-szu2-un as,-bat
75. hur-ri na-hal-li na-at-bak _kur_-i me-le-e mar-s,u-ti
76. i-na _{gesz}gu-za_ asz2-tam-di-ih a-szar a-na _{gesz}gu-za_ szup-szu-qu
77. i-na _giri3-min_-ia asz2-tah-hi-it, _gin7_ ar-me a-na zuq-ti sza2-qu-te
78. s,e-ru-usz-szu2-un e-li a-szar bir-ka-a-a
79. ma-na-ah-tu i-sza2-a s,e-er _na4 kur_-i u2-szib-ma
80. _a-mesz_ {kusz}na-a-di ka-s,u-ti a-na s,u-um-me-ia lu asz2-ti
81. i-na _szu-si-mesz_ hur-sza2-a-ni ar-de-szu2-nu-ti-ma
82. asz2-ta-kan tah-ta-szu2-un _iri-mesz_-szu2-nu _kur_-ma
column 4
1. asz2-lu#-la# szal#-la-sun2 ap-pul aq-qur ina {d}gesz-bar aq-mu
2. pa-an ni-ri-ia u2-ter-ma s,e-er {disz}ma-ni-ia-e
3. _lugal_ {iri}uk-ki szad-da-a-a-e la kan-sze as,-s,a-bat har-ra-nu
4. ur-hi la pe-tu-ti t,u-di pa-asz2-qu-ti sza la-pa-an
5. _kur-mesz_ mar-s,u-ti ul-la-nu-u2-a qe2-reb-szu2-un
6. ma-am-man la il-li-ku _lugal-mesz_-ni pa-ni mah-ru-ti
7. i-na _giri3-min_ {kur}a-na-ra u3 {kur}up-pa _kur-mesz_ dan-nu-ti
8. ka-ra-szi u2-sza2-asz2-kin-ma ana-ku i-na _{gesz}gu-za_ ne2-me-di
9. it-ti _{lu2}erin2-mesz_ ta-ha-zi-ia git2-ma-lu-ti
10. i-na ne-re-bi-szu2-un pi-qu-ti szu-nu-hi-isz e-ru-um-ma
11. mar-s,i-isz e-te-el-la-a _szu-si-mesz kur-mesz_ pa-asz2-qa-a-ti
12. szu-u2 {disz}ma-ni-ia-e tur-bu-u' _giri3-min erin2 hi-a_-ia
13. e-mur-ma {iri}uk-ku _iri lugal_-ti-szu2 e-zib-ma
14. a-na ru-qe2-e-ti in-na-bit {iri}uk-ku al-me _kur_-ud
15. asz2-lu-la szal-la-su mim-ma szum-szu _nig2-szu nig2-gur11_
16. ni-s,ir-ti _e2-gal_-szu2 ul-tu qer-be2-szu2
17. u2-sze-s,a-am-ma szal-la-tisz am-nu u3 3(u) 3(disz) _iri-mesz_
18. sza pa-a-t,i na-gi-szu2 _kur_-ud-ma _ug3-mesz ansze-mesz_
19. _gu4-mesz_ u3 s,e-e-ni ul-tu qer-bi-szu2-un
20. asz2-lu-la ap-pu-ul aq-qur i-na {d}gesz-bar aq-mu
  single ruling
21. i-na 6(disz) ger-ri-ia si-it-ti _ug3-mesz_ {kur}e2-{disz}ia-kin7
22. sza la-pa-an _{gesz}tukul-mesz_-ia dan-nu-ti _gin7_ ser2-re-me
23. ig-ru-ru _dingir-mesz_ ma-rak _kur_-szu2-un i-na _ki-tusz_-szu2-nu
24. id-ku-ma tam-tum _gal_-tum sza s,i-it {d}utu-szi
25. e-bi-ru-ma i-na {iri}na-gi-te sza {kur}elam-ma{ki} id-du-u2
26. szu-bat-sun2 i-na _{gesz}ma2-mesz_ {kur}hat-ti tam-tum lu e-bir
27. {iri}na-gi-tu {iri}na-gi-tu-di-i'-bi-na a-di {kur}hi-il-mu
28. {iri}pil-la-tu u3 {kur}hu-pa-pa-nu na-ge-e
29. sza {kur}_elam-ma<{ki>} kur_-ud _ug3-mesz_ {kur}e2-{disz}ia-kin7 a-di _dingir-mesz_-szu2-nu
30. u3 _ug3-mesz_ sza _lugal_ {kur}elam-ma{ki} asz2-lu-lam-ma la e-zi-ba mul-tah-t,u
31. qe2-reb _{gesz}ma2-mesz_ u2-szar-kib-ma a-na a-ha-an-na-a
32. u2-sze-bi-ra-ma u2-sza2-as,-bi-ta har-ra-an _kur_ asz-szur{ki}
33. _iri-mesz_ sza qe2-reb na-ge-e sza2-tu-nu ap-pul aq-qur
34. i-na {d}gesz-bar aq-mu a-na _du6_ u3 kar-me u2-ter
35. i-na ta-a-a-ar-ti-ia {disz}szu-zu-bu _dumu_ babila2{ki}
36. sza i-na e-szi-ti _kur_ be-lut _kur eme-gi7_ u3 uri{ki}
37. ra-ma-nu-usz u2-ter-ru i-na ta-ha-az _edin_
38. _bad5-bad5_-szu2 asz2-kun bal-t,u-su i-na _szu-min_ as,-bat-su
39. szum-man-nu u3 bi-re-tu _an-bar_ ad-di-szu-ma a-na _kur_ asz-szur{ki}
40. u2-ra-asz2-szu2 _lugal_ {kur}elam-ma{ki} sza _a2-min_-szu2 is-hu-ru-ma
41. il-li-ku re-s,u-us-su _bad5-bad5_-szu2 asz2-kun
42. _illat-mesz_-szu2 u2-sap-pi-ih-ma u2-par-ri-ir pu-hur-szu2
  single ruling
43. i-na 7(disz)#-e ger-ri-ia {d}asz-szur be-li2 u2-tak-kil-an-ni-ma
44. a-na {kur}elam-ma{ki} lu al-lik {iri}e2-{disz}ha-'i-i-ri
45. {iri}ra-s,a-a _iri-mesz_-ni sza mi-s,ir _kur_ asz-szur{ki}
46. sza i-na tar-s,i _ad_-ia {lu2}e-la-mu-u2 e-ki-mu da-na-nisz
47. i-na me-ti-iq ger-ri-ia _kur_-ma asz2-lu-la szal-la-sun2
48. _{lu2}erin2-mesz_ szu-lu-ti-ia u2-sze-rib qe2-reb-szu2-un
49. a-na mi-s,ir _kur_ asz-szur{ki} u2-ter-ram-ma
50. _szu-min {lu2}gal_ {iri}hal-s,u bad3-an{ki} am-nu
51. {iri}bu-be2-e {iri}dun-ni-{d}utu {iri}e2-{disz}ri-si-ia
52. {iri}e2-ah-la-me-e {iri}du-ru {iri}dan-nat-{disz}su-la-a-a
53. {iri}szi-li-ib-tu {iri}e2-{disz}a-s,u-si {iri}kar-{disz}mu-ba-sza2
54. {iri}e2-gi-is,-s,i {iri}e2-{disz}kat3-pa-la-ni {iri}e2-{disz}im-bi-ia
55. {iri}ha-ma-nu {iri}e2-{disz}ar-ra-bi {iri}bu-ru-tu
56. {iri}di-in-tu-sza-{disz}su-la-a-a {iri}di-in-tu-sza-{disz}{d}dumu-e2-kar-ir {iri}har-ri-asz2-la-ke-e {iri}ra-ba-a-a
57. {iri}ra-a-su {iri}ak-ka-ba-ri-na {iri}du6-{disz}u2-hu-ri
58. {iri}ha-am-ra-nu {iri}na-di-tu a-di _iri-mesz_ sza ne2-re-bi
59. sza {iri}e2-{disz}bu-na-ki {iri}du6-{d}hu-um-bi {iri}di-in-tu-sza-{disz}du-me-_dingir {iri}e2_-{disz}u2-bi-ia {iri}ba-al-ti-li-szir
60. {iri}ta-qab-li-szir {iri}sza-na-qi-da-a-ti
61. {iri}ma-su-tu2-szap-li-tu {iri}sa-ar-hu-de-e-ri {iri}a-lum-sza-_gaszan-e2_
62. {iri}e2-{disz}pap-mesz-szum2-na {iri}il-te-u2-ba 3(u) 4(disz) _iri-mesz_ dan-nu-ti
63. a-di _iri-mesz_-ni _tur-mesz_ sza li-me-ti-szu2-nu
64. sza ni-ba la i-szu-u2 al-me _kur_-ud asz2-lu-la szal-la-sun2
65. ap-pul aq-qur i-na {d}gesz-bar aq-mu
66. qu-tur na-aq-mu-ti-szu2-nu _gin7 muru9_ kab-ti
67. pa-an _an_-e rap-szu-ti u2-szak-tim isz-me-ma ki-szit-ti
68. _iri-mesz_-szu2 {disz}nig2-du-{d}na-hu-un-du {lu2}e-la-mu-u2 im-qut-su
69. ha-at-tum si-it-ti _iri-mesz_-szu2 a-na dan-na-ti u2-sze-rib
70. szu-u2 {iri}ma-dak-te _iri lugal_-ti-szu2 e-zib-ma
71. a-na {iri}ha-i-da-la sza qe2-reb szad-di-i _su3-mesz_
72. is,-s,a-bat har-ra-nu a-na {iri}ma-dak-te _iri lugal_-ti-szu2
73. a-la-ku aq-bi {iti}tam-hi-ri _en-te-na_ dan-nu
74. e-ru-ba-am-ma sza2-mu-tum ma-at-tum u2-sza2-az-ni-na
75. _szeg3-mesz_-sza2 _szeg3-mesz_ u3 szal-gu na-ah-li na-at-bak
76. szad-di-i a-du-ra pa-an ni-ri-ia u2-ter-ma
77. a-na nina{ki} as,-s,a-bat har-ra-nu i-na u4-me-szu-ma
78. i-na qi2-bit {d}asz-szur _en_-ia {disz}nig2-du-{d}na-hu-un-di
column 5
1. _lugal_ {kur}elam-ma{ki} 3(disz) _iti_ ul u2-mal-li-ma
2. i-na u4-um la szi-im-ti-szu2 ur-ru-hisz im-tu-ut
3. _egir_-szu2 {disz}um-ma-an-me-na-nu la ra-asz2 t,e3-e-me u3 mil-ki
4. _szesz_-szu2 dup-pu-us-su-u2 i-na _{gesz}gu-za_-szu2 u2-szib-ma
  single ruling
5. i-na 8(disz)-e ger-ri-ia _egir_ {disz}szu-zu-bi is-se-hu-ma
6. _dumu-mesz babila2{ki} gal5-la2-mesz_ lem-nu-ti _ka2-gal-mesz iri_
7. u2-di-lu ik-pu-ud lib-ba-szu2-nu a-na e-pesz _{gesz}la2_
8. {disz}szu-zu-bu {lu2}kal-da3-a-a et,-lum dun-na-mu-u2
9. sza2 la i-szu-u2 bir-ki _ARAD2_ da-gil2 pa-an _{lu2}en-nam_
10. {iri}la-hi-ri {lu2}a-ra-[x x]-qu mun-nab-tu
11. a-mir da-me hab-bi-lu s,e#-ru#-usz-szu2 ip-hu-ru-ma
12. qe2-reb {i7}a-gam-me u2-ri-du#-ma# u2-szab-szu-u si-hu
13. a-na-ku ni-tum al-me-szu-ma nap#-sza2-tusz u2-si-qa
14. la-pa-an hat-ti u3 ne2-eb-re-ti a-na {kur}elam-ma{ki} in-na-bit
15. ki-i ri-kil-ti u3 gil2-la-ti s,e-ru-usz-szu2 ba-szi-i
16. ul-tu {kur}elam-ma{ki} i-hi-szam-ma qe2-reb szu-an-na{ki} e-ru-ub
17. _{lu2}babila2{ki}-mesz_ a-na la si-ma-te-szu2 i-na _{gesz}gu-za_
18. u2-sze-szi-bu-szu2 be-lu-ut _kur eme-gi7_ u uri#{ki#} u2-szad-gi-lu pa-ni-szu2
19. _e2 nig2-gur11_ sza e2-sag-il2 ip-[x]-ma _ku3-sig17 ku3-babbar_
20. sza {d}en {d}numun-du3-tum _nig2-[x] e2 dingir-mesz_-szu2-nu u2-sze-s,u-ni
21. a-na {disz}um-ma-an-me-na-nu _lugal_ {kur}elam-ma{ki} sza la i-szu-u2
22. t,e3-e-mu u3 mil-ki u2-sze-bi-lu-usz t,a-a'-tu2
23. pu-uh-hir um-man-ka di-ka-a _karasz_-ka
24. a-na babila2{ki} hi-szam-ma i-da-a-ni i-zi-iz-ma
25. tu-kul-ta-ni lu at-ta szu-u2 {lu2}e-la-mu-u2
26. sza i-na a-lak ger-ri-ia mah-ri-ti sza {kur}elam-ma{ki}
27. _iri-mesz_-szu2 ak-szud-du-ma u2-ter-ru a-na kar-me
28. lib-bu-usz ul ih-su-us t,a-a'-tu im-hur-szu2-nu-ti-ma
29. _erin2 hi-a_-szu2 _karasz_-su u2-pa-hir-ma _{gesz}gigir-mesz_ {gesz}s,u-um-bi
30. e-szu-ra _ansze-kur-ra-mesz {ansze}kunga-mesz_ is-ni-qa s,i-in-di-szu2
31. {kur}par-su-asz2 {kur}an-za-an {kur}pa-szi-ru {kur}el-li-pi
32. {lu2}ia-as-il3 {lu2}la-kab-eri {lu2}ha-ar-zu-nu
33. {iri}du-um-mu-qu {iri}su-la-a-a {iri}sa-am-u2-na
34. _dumu_ {disz}{d}marduk-ibila-szum2-na {kur}e2-{disz}a-di-ni {kur}e2-{disz}a-muk-ka-na
35. {kur}e2-{disz}szil-la-na {kur}e2-{disz}sa-a-la ud-ud-ag{ki} {iri}la-hi-ru
36. {lu2}pu-qu-du {lu2}gam-bu-lum {lu2}ha-la-tu {lu2}ru-'u-u-a
37. {lu2}u2-bu-lum {lu2}ma-la-hu {lu2}ra-pi-qu
38. {lu2}hi-in-da-ru {lu2}da-mu-nu kit-ru _gal_-u2
39. ik-te-ra it-ti-szu2 gi-ip-szu-su-un u2-ru-uh
40. _kur_ uri{ki} is,-ba-tu-nim-ma a-na babila2{ki} te-bu-ni
41. a-di {disz}szu-zu-bi {lu2}kal-da3-a-a _lugal_ babila2{ki}
42. a-na a-ha-mesz iq-ru-bu-ma pu-hur-szu2-nu in-nen-du
43. ki-ma ti-bu-ut a-ri-bi ma-a'-di sza pa-an szat-ti
44. mit-ha-risz a-na e-pesz tuq-ma-ti te-bu-u2-ni
45. s,e-ru-u2-a _sahar-hi-a giri3-min_-szu2-nu _gin7 muru9_ kab-te
46. sza dun-ni e-ri-ia-a-ti pa-an _an_-e rap-szu-ti
47. ka-ti-im el-la-mu-u2-a i-na {iri}ha-lu-le-e
48. sza ki-szad {i7}idigna szit-ku-nu si-dir-ta
49. pa-an masz-qi2-ia s,ab-tu-ma u2-sza2-'a-lu _{gesz}tukul-mesz_-szu2-un
50. a-na-ku a-na {d}asz-szur {d}3(u) {d}utu {d}en {d}muati {d}u-gur
51. {d}inanna sza nina{ki} {d}inanna sza {iri}limmu2-dingir _dingir-mesz_ ti-ik-li-ia
52. a-na ka-sza2-di _{lu2}kur2_ dan-ni am-hur-szu2-nu-ti-ma
53. su-pe-e-a ur-ru-hisz isz-mu-u2 il-li-ku
54. re-s,u-ti la-ab-bisz an-na-dir-ma at-tal-bi-sza2
55. si-ri-ia-am hu-li-ia-am si-mat s,i-il-te
56. a-pi-ra ra-szu-u2-a i-na _{gesz}gigir me3_-ia s,ir-ti
57. sa-pi-na-at za-'i-i-ri i-na ug-gat lib-bi-ia
58. ar-ta-kab ha-an-t,isz _{gesz}pan_ dan-na-tum
59. sza {d}asz-szur u2-szat-li-ma i-na _szu-min_-ia as,-bat
60. {gesz}szil-ta-hu pa-ri-i' nap-sza2-te at-muh rit-tu-u-a
61. s,e-er gi-mir um-ma-na-a-ti na-ki-ri lem-nu-ti
62. s,ar-pisz u4-mi3-isz al-sa-a _gin7_ {d}iszkur asz2-gu-um
63. i-na qi2-bit {d}asz-szur _en gal en_-ia a-na szid-di u3 pu-te
64. _gin7_ ti-ib me-he-e szam-ri a-na _{lu2}kur2_ a-zi-iq
65. i-na _{gesz}tukul-mesz_ {d}asz-szur _en_-ia u3 ti-ib _me3_-ia
66. ez-zi i-rat-su-un a-ne2-e'-ma suh-hur-ta-szu2-nu
67. asz2-kun _erin2 hi-a_ na-ki-ri i-na us,-s,i mul-mul-li
68. u2-sza2-qir-ma gim-ri _adda-mesz_-szu2-nu u2-pal-li-sza2
69. _ud_-zi-zi-isz {disz}{d}hu-um-ba-an-un-da-sza2 {lu2}na-gi-ru
70. sza _lugal_ {kur}elam-ma{ki} et,-lum pit-qu-du mu-ma-'e-er _erin2 hi-a_-szu2
71. tu-kul-ta-szu2 _gal_-u2 a-di _{lu2}gal-mesz_-szu2
72. sza _gir2_ szib-bi _ku3-sig17_ szit-ku-nu u3 i-na _har-mesz_
73. as-pi _ku3-sig17_ ru-usz-szi-i ruk-ku-sa rit-ti-szu2-un
74. ki-ma szu-u2-ri ma-ru-ti sza na-du-u2 szum-man-nu
75. ur-ru-hisz u2-pal-<liq>-szu2-nu-ti-ma asz2-ku-na tah-ta-szu2-un
76. ki-sza-da-te-szu2-nu u2-nak-kis as-li-isz
77. aq-ra-te nap-sza2-te-szu2-nu u2-par-ri-i' qu3-u'3-isz
78. _gin7 illu_ gap-szi sza sza2-mu-tum si-ma-ni u3-mun-ni-szu2-nu
79. u2-szar-da-a s,e-er er-s,e-ti sza2-di-il-te
80. la-as-mu-ti mur-ni-is-qi2 s,i-mit-ti ru-ku-bi-ia
81. i-na da-me-szu-nu gap-szu-ti i-szal-lu-u2 {d}i7-isz
82. sza _{gesz}gigir me3_-ia sa-pi-na-at rag-gi u3 s,e-ni
83. da-mu u3 par-szu2 ri-it-mu-ku ma-gar-ru-usz
84. pag-ri qu-ra-di-szu2-nu ki-ma ur-qi2-ti
85. u2-mal-la-a _edin_ sa-ap-sa-pa-te u2-na-kis-ma
column 6
1. bal-ta-szu2-un a-bu-ut ki-ma bi-ni qisz-sze-e
2. si-ma-ni u2-na-ak-kis qa-ti-szu2-un
3. _har-mesz_ as-pi _ku3-sig17 ki-sag_ eb-bi sza2 rit-ti-szu2-nu am-hur
4. i-na nam-s,a-ri zaq-tu-ti hu-s,a-an-ni-szu2-nu u2-par-ri-i'
5. _gir2-mesz_ szib-bi _ku3-sig17 ku3-babbar_ sza _muru2-mesz_-szu2-nu e-kim
6. si-it-ti _{lu2}gal-mesz_-szu2 a-di {disz}{d}muati-mu-isz-kun
7. _dumu_ {disz}{d}marduk-ibila-szum2-na sza la-pa-an ta-ha-zi-ia
8. ip-la-hu id-ku-u2 i-da-szu2-un bal-t,u-su-un
9. i-na _muru2_ tam-ha-ri it-mu-ha _szu-min_-a-a _{gesz}gigir-mesz_
10. a-di _ansze-kur-ra-mesz_-szi-na sza ina qit-ru-ub ta-ha-zi dan-ni
11. ra-ki-bu-szi-in de-ku-ma u3 szi-na musz-szu-ra-ma
12. ra-ma-nu-usz-szin it-ta-na-al-la-ka mit-ha-risz
13. u2-ter-ra a-di 2(disz) _danna ge6_ il-li-ku
14. da-ak-szu-nu ap-ru-us szu-u2 {disz}um-ma-an-me-na-nu
15. _lugal_ {kur}elam-ma{ki} a-di _lugal_ babila2{ki} {lu2}na-sik-ka-ni
16. sza {kur}kal-di a-li-kut _a2-min_-szu2 hur-ba-szu2 _me3_-ia _gin7_-le-e
17. zu-mur-szu-un is-hu-up {gesz}za-ra-te-szu2-un u2-masz-sze-ru-ma
18. a-na szu-zu-ub _zi-mesz_-szu2-nu pag-ri um-ma-na-te-szu2-nu u2-da-i-szu2
19. i-ti-qu ki-i sza at-mi _tu_{muszen} kusz-szu-di i-tar-ra-ku lib-bu-szu2-un
20. szi-na-te-szu2-un u2-s,a-ra-pu qe2-reb _{gesz}gigir-mesz_-szu2-nu
21. u2-masz-sze-ru-ni zu-szu2-un a-na ra-da-di-szu2-nu
22. _{gesz}gigir-mesz ansze-kur-ra-mesz_-ia u2-ma-'e-er ar-ki-szu2-un
23. mun-na-rib-szu2-nu sza2 a-na nap-sza2-a-ti u2-s,u-u2
24. a-szar i-kasz-sza2-du u2-ra-sa-bu i-na _{gesz}tukul_
  single ruling
25. i-na u4-me-szu-ma ul-tu# _e2-gal muru2 iri_ sza nina{ki}
26. a-na ri-mit _lugal_-ti-ia u2-szak-li-lu
27. a-na tab-ra-ti kisz-szat _ug3-mesz_ lu-le-e u2-mal-lu-szi
28. _e2-gal_ ku-tal-li sza a-na szu-te-szur ka-ra-szi
29. pa-qa-a-di _ansze-kur-ra-mesz_ sa-na-qi2 mim-ma szum-szu2
30. u2-sze-pi-szu2 _lugal-mesz_-ni a-li-kut mah-ri _ad-mesz_-ia
31. tam-lu-sza2 ul ib-szi szu-bat-sa s,u-uh-hu-rat-ma
32. la nu-ku-lat e-pisz-tasz la-ba-risz u4-me tem-me-en-sza2
33. e-nisz-ma isz-da-sza2 ir-ma-a i-qu-pa re-sza2-a-sza2
34. _e2-gal_ sza-a-tu a-na si-hir-ti-sza2 aq-qur
35. ki-szub-bu-u2 ma-a'-du ul-tu qe2-reb u2-szal-li
36. u3 ta-mir-ti _iri_ ki-ma a-tar-tim-ma lu as,-ba-ta ina muh-hi
37. lu usz-rad-di masz-kan2 _e2-gal_ mah-ri-ti e-zib-ma
38. i-na qaq-qar u2-szal-li sza ul-tu mal-di _i7_
39. as,-ba-ta tam-la-a usz-mal-li 2(disz) _me_ ti-ib-ki
40. a-na e-la-ni u2-szaq-qi2 re-e-su i-na _iti_ sze-me-e
41. u4-mu mit-ga-ri s,e-er tam-le-e sza2-a-tu ina nik-lat lib-bi-ia
42. _e2-gal_ {na4}pi-i-li u3 {gesz}ere-ni ne2-pesz-ti
43. {kur}ha-at-ti u3 _e2-gal_ s,i-ir-tu ep-szet _kur_ asz-szur{ki}
44. sza _ugu_ mah-ri-ti ma-a'-disz szu-tu-rat ra-ba-ta
45. u3 nak-lat i-na szi-pir _{lu2}szitim-gal_-le-e
46. en-qu-ti a-na mu-szab be-lu-ti-ia u2-sze-pisz
47. _gesz-ur3-mesz_ {gesz}ere-ni s,i-ru-ti tar-bit {kur}ha-ma-nim
48. _kur_-i el-li u2-szat-ri-s,a e-li-szin
49. _{gesz}ig-mesz_ {gesz}li-ia-ri me-ser _uruda_ nam-ri
50. u2-rak-kis-ma u2-rat-ta-a _ka2-mesz_-szi-in
51. i-na {na4}pi-i-li pe-s,i-i sza i-na er-s,e-et
52. {iri}ba-la-t,a-a-a in-nam-ru _{d}alad-{d}lamma-mesz_ s,i-ru-te
53. u2-sze-pisz-ma im-na u szu-me-la u2-sza2-as,-bi-ta
54. _si-gar_-szin a-na szu-te-szur s,al-mat _sag-du_ pa-qa-di
55. mur-ni-is-qi2 _{ansze}kunga-mesz_ a-ga-li-i til-li
56. _{gesz}gigir-mesz_ {gesz}at-ta-ra-te e-req-qi2 isz-pa-a-te
57. til-pa-na-te u3 us,-s,i mim-ma szum-szu2 u2-nu-tu ta-ha-zi
58. na-as,-ma-di _ansze-kur-ra-mesz {ansze}kunga-mesz_
59. sza e-mu-qi2 ra-ba-a-te i-szu-u2 szuk-nu-sze a-na ni-ri
60. ki-sal-la-sza2 _ka2_-nu-u2 ma-gal usz-rab-bi
61. _e2-gal_ sza2-a-tu ul-tu usz-sze-sza2 a-di na-bur-ri-sza2
62. ar-s,ip u2-szak-lil _mu-sar_-e szi-t,ir szu-me-ia
63. i-na qer-bi-sza2 asz2-kun a-na ar2-kat3 _u4-mesz_
64. i-na _lugal-mesz_-ni _dumu-mesz_-ia sza {d}asz-szur u3 {d}isz-tar
65. a-na _re-e2-um_-ut _kur_ u3 _ug3-mesz_ i-nam-bu-u2
66. zi-kir-szu2 e-nu-ma _e2-gal_ sza2-a-tu2 i-lab-bi-ru-ma
67. en-na-hu _nun_ ar-ku-u2 an-hu-sa lu-ud-disz
68. _mu-sar_-e szi-t,ir szu-me-ia li-mur-ma
69. _i3-gesz_ lip-szu-usz _{udu}siskur_ liq-qi2 a-na asz2-ri-szu2 lu-ter
70. {d}asz-szur u3 {d}isz-tar ik-ri-bi-szu2 i-szem-mu-u2
71. mu-nak-kir szit,-ri-ia u3 szu-me-ia
72. {d}asz-szur _en gal ad dingir-mesz_ nak-risz li-zi-is-su
73. _{gesz}gidru_ u3 _{gesz}gu-za_ li-kim-szu-ma lis-ki-pa _bala_-szu2
  single ruling
74. {iti}sze-sag11-ku5 _u4 2(u)-kam_ li-mu {disz}en-igi-a-ni
75. _{lu2}en-nam_ {iri}gar-ga-misz#

Text content

Genre(s) Official or display (witness)
Language(s) Akkadian

Chronology

Period Neo-Assyrian (ca. 911-612 BC)
Accounting Period

Composites

This artifact is a witness to the following composite(s):

Composite Composite Number Score
RINAP 3/1 Sennacherib 022 composite [Taylor Prism] (P462830) Q003496 View the score

Record

LOD URI https://cdli.network/entity/P421809

Physical information

Artifact type Prism
Dimensions
Weight
Material(s) Clay
Preservation

Provenance

Provenience Nineveh (mod. Kuyunjik)
Purchased
Written In
Archive
Excavation Number
Findspot
Probably Nebi Yunus
Stratigraphic Level
Elevation

Collections

Collection(s) British Museum, London, UK
Museum Number BM 091032
Accession Number 1855-10-03, 0001

External resources

External Resource Identifiers
Electronic Babylonian Library (eBL) 1855,1003.1 + BM.91032
RINAP Sources (RINAP Sources) P421809
Ancient Records of Middle Eastern Polities (ARMEP) P421809
British Museum Collection (BM) W_1855-1003-1

References

  • primary: RINAP 3/1, 022, ex. 002

    [Grayson2012RINAP3/1] Grayson, A. Kirk, and Jamie Novotny. 2012. The Royal Inscriptions of Sennacherib, King of Assyria (704-681 BC), Part 1. The Royal Inscriptions of the Neo-Assyrian Period, vol. 3/1. Eisenbrauns.

Revisions and credits

Created Creator Type Authors Project Reviewer Status Action
2023-08-19 at 13:10:32 Rattenborg, Rune Artifact metadata Rattenborg, Rune; Smidt, Gustav Ryberg Geomapping Landscapes of Writing Rattenborg, Rune Approved View
2023-06-15 at 20:38:30 Rattenborg, Rune Artifact metadata Rattenborg, Rune Geomapping Landscapes of Writing Rattenborg, Rune Approved View
2023-06-01 at 18:47:18 Rattenborg, Rune Artifact metadata Novotny, Jamie Rattenborg, Rune Approved View
2023-01-21 at 08:02:28 Pagé-Perron, Émilie Artifact metadata Földi, Zsombor J.; Jiménez, Enrique; Pagé-Perron, Émilie Electronic Babylonian Library Pagé-Perron, Émilie Approved View
2013-09-11 at 18:17:08 Englund, Robert K. Transliteration Englund, Robert K. CDLI, CDLI Approved View
2013-09-11 at 17:23:09 Englund, Robert K. Transliteration Englund, Robert K. CDLI, CDLI Approved View
2011-06-29 at 00:00:00 CDLI, CDLI Artifact metadata Stadhouders, Henry British Museum Collection CDLI, CDLI Approved View

Cite this Artifact

“RINAP 3/1 Sennacherib 022, Ex. 002 Artifact Entry.” (2011) 2023. Cuneiform Digital Library Initiative (CDLI). August 19, 2023. https://cdli.earth/P421809.
RINAP 3/1 Sennacherib 022, ex. 002 artifact entry (No. P421809). (2023, August 19). Cuneiform Digital Library Initiative (CDLI). https://cdli.earth/P421809 (Original work published 2011)
RINAP 3/1 Sennacherib 022, ex. 002 artifact entry (2023) Cuneiform Digital Library Initiative (CDLI). Available at: https://cdli.earth/P421809 (Accessed: October 30, 2026).
@misc{2023RINAP,
	note = {[Online; accessed 2026-10-30]},
	year = {2023},
	month = {aug 19},
	title = {RINAP 3/1 {Sennacherib} 022, ex. 002 artifact entry},
	url = {https://cdli.earth/P421809},
	howpublished = {https://cdli.earth/P421809},
}


TY  - ELEC
DA  - 2023/8/19/
PY  - 2023
ID  - P421809
LB  - CDLI:P421809
M1  - 2026/10/30/
TI  - RINAP 3/1 Sennacherib 022, ex. 002 artifact entry
UR  - https://cdli.earth/P421809
ER  -

Cite this Artifact

“RINAP 3/1 Sennacherib 022, Ex. 002 Artifact Entry.” (2011) 2023. Cuneiform Digital Library Initiative (CDLI). August 19, 2023. https://cdli.earth/P421809.
RINAP 3/1 Sennacherib 022, ex. 002 artifact entry (No. P421809). (2023, August 19). Cuneiform Digital Library Initiative (CDLI). https://cdli.earth/P421809 (Original work published 2011)
RINAP 3/1 Sennacherib 022, ex. 002 artifact entry (2023) Cuneiform Digital Library Initiative (CDLI). Available at: https://cdli.earth/P421809 (Accessed: October 30, 2026).
@misc{2023RINAP,
	note = {[Online; accessed 2026-10-30]},
	year = {2023},
	month = {aug 19},
	title = {RINAP 3/1 {Sennacherib} 022, ex. 002 artifact entry},
	url = {https://cdli.earth/P421809},
	howpublished = {https://cdli.earth/P421809},
}


TY  - ELEC
DA  - 2023/8/19/
PY  - 2023
ID  - P421809
LB  - CDLI:P421809
M1  - 2026/10/30/
TI  - RINAP 3/1 Sennacherib 022, ex. 002 artifact entry
UR  - https://cdli.earth/P421809
ER  -
This website uses essential cookies that are necessary for it to work properly. These cookies are enabled by default.