RINAP 5/1 Ashurbanipal 011 composite (P514720)

object composite text
surface a
1. a-na-ku {disz}an-szar2-du3-a bi-nu-tu an-szar2 u {d}nin-lil2
2. _dumu lugal gal_-u2 sza _e2_ ri-du-u-ti
3. sza an-szar2 u {d}sin _en aga_ ul-tu _u4-mesz su3-mesz_
4. ni-bit _mu_-szu2 iz-ku-ru a-na _lugal_-u-ti
5. u3 ina _sza3 ama_-szu2 ib-nu-szu2 a-na _sipa_-ut _kur_ an-szar2{ki}
6. {d}utu {d}iszkur u {d}1(u)-5(disz) ina _esz-bar_-szu2-nu ke-e-ni
7. iq-bu-u2 e-pesz _lugal_-ti-ia
8. {disz}an-szar2-pap-szum2-na _man kur_ an-szar2{ki} _ad_ ba-nu-u-a
9. a-mat an-szar2 u {d}nin-lil2 _dingir-mesz_ ti-ik-le-e-szu2 it-ta-id
10. sza iq-bu-u-szu2 e-pesz _lugal_-ti-ia
11. ina _{iti}gu4 iti_ {d}e2-a _en_ te-ne2-sze-e-ti
12. _u4 1(u) 2(disz)-kam ud sze-ga szum2 ninda_ sza {d}gu-la
13. ina e-pesz pi-i mut-tal-li
14. sza an-szar2 {d}nin-lil2 {d}sin {d}utu {d}iszkur
15. {d}en {d}ag {d}1(u)-5(disz) sza2 nina{ki}
16. {d}szar-rat-kid-mu-ri {d}1(u)-5(disz) sza2 limmu2-dingir{ki}
17. {d}masz {d}u-gur {d}nusku iq-bu-u2
18. u2-pah-hir _ug3-mesz kur_ an-szar2{ki} _tur_ u _gal_
19. sza tam-tim e-li-ti u3 szap-liti
20. a-na na-s,ir _dumu lugal_-ti-ia u3 _egir_-nu
21. _lugal_-tu _kur_ an-szar2{ki} e-pe-sze a-de-e _mu dingir-mesz_
22. u2-sza2-az-kir2-szu2-nu-ti u2-dan-ni-na rik-sa-a-te
23. ina _hul2-mesz_ ri-sza2-a-te e-ru-ub ina _e2 usz_-u-ti
24. asz2-ru nak-lu mar-kas _lugal_-u-ti
25. sza {disz}{d}sin-pap-mesz-su _ad ad_ a-li-di-ia
26. _dumu lugal_-tu2 u3 _lugal_-tu2 e-pu-szu2 ina lib3-bi-szu2
27. a-szar {disz}an-szar2-pap-asz _ad du3_-u-a qe2-reb-szu2 i'-al-du
28. ir-bu-u e-pu-szu2 be-lut _kur_ an-szar2{ki}
29. gi-mir ma-al-ki ir-du-u kim-tu2 u2-rap-pi-szu2
30. ik-s,u-ru ni-szu-tu2 u sa-la-tu2
31. u3 a-na-ku {disz}an-szar2-du3-a qe2-reb-szu2 a-hu-uz ne2-me-qi2 {d}ag
32. kul-lat t,up-szar-ru-u-ti sza2 gi-mir um-ma-ni
33. ma-la ba-szu-u2 ih-ze-szu2-nu a-hi-it,
34. al-ma-ad sza2-le-e _{gesz}pan_ ru-kub _ansze-kur-ra {gesz}gigir_ s,a-bat {kusz}a-sza2-a-te
35. ina qi2-bit _dingir-mesz gal-mesz_ sza2 az-ku-ra ni-bit-sun2
36. a-da-bu-ba ta-nit-ta-szu2-un iq-bu-u e-pesz _lugal_-ti-ia
37. za-nin esz-re-e-ti-szu2-un u2-szad-gi-lu pa-nu-u-a
38. ke-mu-u-a e-tap-pa-lu _en_ s,al-ti-ia i-na-ru ga-re-ia
39. zi-ka-ru qar-du na-ram an-szar2 u {d}1(u)-5(disz)
40. li-ip-li-pi _lugal_-u-ti a-na-ku
41. ul-tu an-szar2 {d}sin {d}utu {d}iszkur {d}en {d}ag
42. {d}1(u)-5(disz) sza2 nina{ki} {d}szar-rat-kid-mu-ri
43. {d}1(u)-5(disz) sza2 limmu2-dingir{ki} {d}masz {d}u-gur {d}nusku
44. t,a-bisz u2-sze-szi-bu-in-ni ina _{gesz}gu-za ad du3_-ia
45. {d}iszkur _szeg3-mesz_-szu2 u2-masz-sze-ra {d}e2-a u2-pat,-t,i-ra _idim-mesz_-szu2
46. 5(disz) _1(disz) kusz3 sze-am_ isz-qu ina _ab-sin2_-ni-szu2
47. e-ri-ik szu-bul-tu 5/6(disz) _1(disz) kusz3_
48. _si-sa2 buru14_ na-pa-asz2 {d}nisaba
49. ka-a-a-an u2-szah-na-bu gi-pa-ru
50. s,ip-pa-a-ti szu-um-mu-ha in-bu _masz2-ansze_ szu-te-szur ina ta-lit-ti
51. ina _bala_-ia _he2-nun_ t,uh-du ina _mu-an-na-mesz_-ia ku-um-mu-ru _he2-gal2_-lum
52. ina mah-re-e ger-ri-ia a-na {kur}ma2-kan u {kur}me-luh-ha lu al-lik
53. {disz}tar-qu-u2 _man_ {kur}mu-s,ur u {kur}ku-u-si
54. sza {disz}an-szar2-pap-asz _man kur_ an-szar2{ki} _ad du3_-u-a
55. _bad5-bad5_-szu2 isz-ku-nu i-be-lu _kur_-su u3 szu-u {disz}tar-qu-u
56. da-na-an an-szar2 {d}1(u)-5(disz) u _dingir-mesz gal-mesz en-mesz_-ia im-szi-ma
57. it-ta-kil a-na e-muq ra-man-i-szu2 e-li _lugal-mesz_
58. {lu2}qe2-pa-a-ni sza2 qe2-reb {kur}mu-s,ur u2-pa-qi2-du _ad du3_-u-a
59. a-na da-a-ki ha-ba-a-te u3 e-kem {kur}mu-s,ur il-li-ka
60. _edin_-usz-szu2-un e-ru-um-ma u2-szib qe2-reb {iri}me-em-pi
61. _iri_ sza2 _ad du3_-u-a ik-szu-du a-na mi-s,ir _kur_ an-szar2{ki} u2-ter-ru
62. al-la-ku ha-an-t,u qe2-reb nina{ki} il-lik-am-ma
63. u2-sza2-an-na-a ia-a-ti _ugu_ ep-sze-e-ti an-na-a-ti
64. lib3-bi e-gug-ma is,-s,a-ru-uh ka-bit-ti
65. asz2-szi _szu-min_-ia u2-s,al-li an-szar2 u {d}1(u)-5(disz) asz-szur-i-tu2
66. ad-ke-e-ma e-mu-qi2-ia s,i-ra-a-te sza2 an-szar2 u {d}1(u)-5(disz)
67. u2-mal-lu-u _szu-min_-u-a a-na {kur}mu-s,ur u {kur}ku-u-si
68. usz-te-esz-sze-ra har-ra-nu ina me-ti-iq ger-ri-ia
69. _2(u)-am3_ 2(disz) _lugal-mesz_ sza2 a-hi tam-tim _muru2_ tam-tim u na-ba-li
70. _ARAD-mesz_ da-gil2 pa-ni-ia ta-mar-ta-szu2-nu ka-bit-tu2
71. ina mah-ri-ia isz-szu-nim-ma u2-na-asz2-szi-qu _giri3-min_-ia
72. _lugal-mesz_ sza2-a-tu2-nu a-di e-mu-qi2-szu2-nu _{gesz}ma2-mesz_-szu2-nu
73. ina tam-tim u na-ba-li it-ti _erin2-hi-a_-ia
74. ur-hu pa-da-nu u2-sza2-as,-bit-su-nu-ti
75. a-na na-ra-ru-u-ti sza2 _lugal-mesz_ {lu2}qe2-pa-a-ni
76. sza2 qe2-reb {kur}mu-s,ur _ARAD-mesz_-ni da-gil2 pa-ni-ia
77. ur-ru-hi-isz ar-de-e-ma al-lik a-di {iri}kar-{d}du3-ti
78. {disz}tar-qu-u2 _man_ {kur}mu-s,ur u {kur}ku-u-si qe2-reb {iri}me-em-pi
79. a-lak ger-ri-ia isz-me-ma a-na e-pesz _muru2 {gesz}tukul-mesz_
80. u3 _me3_ ina mah-ri-ia id-ka-a _{lu2}erin2-mesz me3_-szu2
81. ina tukul-ti an-szar2 {d}en {d}ag _dingir-mesz gal-mesz en-mesz_-ia
82. a-li-kut _a2-min_-ia ina _me3 edin_ rap-szi asz2-ku-na _bad5-bad5 erin2-hi-a_-szu2
83. {disz}tar-qu-u ina qe2-reb {iri}me-em-pi isz-ma-a tah-te-e _erin2-hi-a_-szu2
84. nam-ri-ri an-szar2 u {d}1(u)-5(disz) is-hu-pu-szu2-ma il-li-ka mah-hu-tisz2
85. me-lam-me _lugal_-ti-ia ik-tu-mu-szu2-ma
86. sza u2-za-'i-nu-in-ni _dingir-mesz_ szu-ut _an ki_
87. {iri}me-em-pi u2-masz-szir-ma a-na szu-zu-ub _zi_-ti3-szu2
88. in-na-bit a-na qe2-reb {iri}ni-i'
89. _iri_ szu2-a-tu2 as,-bat _erin2-hi-a_-ia u2-sze-rib u2-sze-szib ina lib3-bi
90. {disz}ni-ku-u2 _lugal_ {iri}me-em-pi u {iri}sa-a-a
91. {disz}lugal-lu-da3-ri _lugal_ {iri}s,i-i'-nu
92. {disz}pi-sza2-an-hu-ru _lugal_ {iri}na-at-hu-u2
93. {disz}pa-aq-ru-ru _lugal_ {iri}pi-szap-tu2
94. {disz}bu-uk-ku-na-an-ni-i'-pi _lugal_ {iri}ha-at-hi-ri-bi
95. {disz}na-ah-ke-e _lugal_ {iri}hi-ni-in-szi
96. {disz}pu-t,u-bisz-ti _lugal_ {iri}s,a-a'-nu
97. {disz}u2-na-mu-nu _lugal_ {iri}na-at-hu-u2
98. {disz}hur-si-ia-e-szu2 _lugal_ {iri}s,ab-nu-ti
99. {disz}pu-u2-a-a-ma _lugal_ {iri}pi-in-t,i-t,i
100. {disz}su-si-in-qu _lugal_ {iri}pu-szi-ru
101. {disz}tap-na-ah-ti _lugal_ {iri}pu-nu-bu
102. {disz}bu-uk-ku-na-an-ni-i'-pi _lugal_ {iri}ah-ni
103. {disz}ep-ti-mur-t,e-e-szu2 _lugal_ {iri}pi-ha-at-ti-hu-ru-un-pi-ki
104. {disz}na-ah-ti-hu-ru-an-si-ni _lugal_ {iri}pi-szap-di-'a-a
105. {disz}bu-kur-ni-ni-ip _lugal_ {iri}pa-ah-nu-ti
106. {disz}s,i-ha-a _lugal_ {iri}szi-ia-a-u-tu2
107. {disz}la-mi3-in-tu2 _lugal_ {iri}hi-mu-ni
108. {disz}isz-pi-ma-t,u _lugal_ {iri}ta-a-a-ni
109. {disz}ma-an-ti-me-an-he-e _lugal_ {iri}ni-i'
110. _lugal-mesz_ an-nu-ti _{lu2}nam-mesz_ {lu2}qe2-pa-a-ni sza2 qe2-reb {kur}mu-s,ur
111. u2-pa-qi2-du _ad_ ba-nu-u-a sza2 la-pa-an ti-bu-ut {disz}tar-qu-u
112. pi-qit-ta-szu2-un u2-masz-sze-ru im-lu-u2 _edin_
113. u2-ter-ma a-szar pi-qit-ti-szu2-un ina masz-kan2-i-szu2-un ap-qid-su-nu-ti
114. {kur}mu-s,ur u {kur}ku-u-su sza2 _ad du3_-u-a ik-szu-du a-na esz-szu-ti as,-bat
115. _en-nun-mesz ugu_ sza2 u4-me pa-ni u2-dan-nin-ma u2-rak-ki-sa
116. rik-sa-a-te it-ti hu-ub-ti ma-a'-di szal-la-ti
117. ka-bit-ti szal-mesz a-tu-ra a-na nina{ki}
118. _egir_-nu _lugal-mesz_ an-nu-ti ma-la ap-qi2-du ina a-de-ia ih-t,u-u
119. la is,-s,u-ru ma-mit _dingir-mesz gal-mesz mun_ e-pu-us-su-nu-ti im-szu2-ma
120. lib3-ba-szu2-nu ik-pu-ud _hul_-tu2 da-bab sur-ra-a-te id-bu-bu-ma
121. mi-lik la ku-sziri4 im-li-ku ra-man-szu2-un um-ma {disz}tar-qu-u
122. ul-tu2 qe2-reb {kur}mu-s,ur i-na-sah-u-ma at-tu-ni a-sza2-ba-ni mi3-i-nu
123. e-li {disz}tar-qu-u _man_ {kur}ku-u-si a-na sza2-kan a-de-e u sa-li-me
124. u2-ma-'e-e-ru {lu2}rak-be2-e-szu2-un um-ma su-lum-mu-u
125. ina bi-ri-ni lisz-sza2-kin-ma ni-in-dag-ga-ra a-ha-mesz
126. _kur_ a-he-en-na-a ni-zu-uz-ma a-a ib-ba-szi ina bi-ri-ni sza2-nu-um-ma be-lum
127. a-na _erin2-hi-a kur_ an-szar2{ki} e-muq _en_-ti-ia sza2 a-na kit-ri-szu2-nu usz-zi-zu
128. isz-te-ne2-'u-u a-mat _hul_-tim {lu2}szu-ut _sag-mesz_-ia a-ma-a-te an-na-a-te
129. isz-mu-u {lu2}rak-be2-e-szu2-un a-di szip-ra-a-te-szu2-un is,-bat-u-nim-ma
130. e-mu-ru ep-szet sur-ra-a-te-szu2-un _lugal-mesz_ an-nu-te is,-bat-u-nim-ma
131. ina bi-re-ti _an-bar_ isz-qa-ti _an-bar_ u2-tam-me-hu _szu-min_ u _giri3-min_
132. ma-mit an-szar2 _man dingir-mesz_ ik-szu-su-nu-ti-ma sza2 ih-t,u-u ina a-de-e
133. _dingir-mesz gal-mesz mun szu-min_-szu2-un u2-ba-'i-i-ma sza2 e-pu-us-su-nu-ti
134. du-un-qu _ug3-mesz_ {iri}sa-a-a {iri}pi-in-t,i-t,i {iri}s,i-i'-nu
135. u3 si-it-ti _iri-mesz_ ma-la it-ti-szu2-nu szak-nu ik-pu-du _hul_-tu2
136. _tur_ u _gal_ ina _{gesz}tukul-mesz_ u2-szam-qi2-tu e-du a-me-lu la e-zi-bu ina lib3-bi
137. _adda-mesz_-szu2-nu e-lu-lu ina {gesz}ga-szi-szi
138. _kusz-mesz_-szu2-nu isz-hu-t,u u2-hal-li-pu _bad3 iri_
139. _2(u)-am3 lugal-mesz_ an-nu-ti sza2 _hul_-tu isz-te-ne2-'u-u
140. a-na _erin2-hi-a kur_ an-szar2{ki} bal-t,u-us-su-nu
141. a-na nina{ki} a-di mah-ri-ia u2-bil-u-ni
142. a-na {disz}ni-ku-u _ta_ bi-ri-szu2-nu re-e-mu ar-szi-ma u2-bal-lit, nap-szat-su
143. a-de-e _ugu_ sza2 mah-ri u2-sza2-tir-ma it-ti-szu2 asz2-kun
144. lu-bul-tu bir-me u2-lab-bi-su al-lu _ku3-sig17_
145. si-mat _lugal_-ti-szu2 asz2-kun-szu2 _har-mesz ku3-sig17_ u2-rak-ki-sa
146. rit-te-e-szu2 _gir2 an-bar_ szib-bi sza2 ih-zu-szu2 _ku3-sig17_
147. ni-bit _mu_-ia ina muh-hi asz2-t,ur-ma ad-din-szu2
148. _{gesz}gigir-mesz ansze-kur-ra-mesz ansze-kunga-mesz_ a-na ru-kub _en_-ti-szu2 a-qis-su
149. {lu2}szu-ut _sag-mesz_-ia _{lu2}nam-mesz_ a-na kit-ri-szu2 it-ti-szu2 asz2-pur
150. a-szar _ad du3_-u-a ina {iri}sa-a-a a-na _lugal_-ti ip-qid-du-usz
151. a-na masz-kan2-i-szu2 u2-ter-szu2 u3 {disz}{d}muati-sze-zib-an-ni _dumu_-szu2
152. a-na {iri}ha-at-ha-ri-ba ap-qid _mun saga_-tu
153. e-li sza2 _ad du3_-ia u2-sza2-tir-ma e-pu-us-su
154. {disz}tar-qu-u2 a-szar in-nab-tu ra-szub-bat _{gesz}tukul_ an-szar2 _en_-ia
155. is-hu-up-szu2-ma il-lik nam-mu-szi-szu2
156. _egir_-nu {disz}ur-da-ma-ne2-e _dumu_ {disz}sza2-ba-ku-u u2-szib ina _{gesz}gu-za lugal_-ti-szu2
157. {iri}ni-i' {iri}u2-nu a-na dan-nu-ti-szu2 isz-kun u2-pah-hi-ra el-lat-su
158. a-na mit-hu-s,i _erin2-hi-a dumu-mesz kur_ an-szar2{ki}
159. sza qe2-reb {iri}me-em-pi id-ka-a qa-bal-szu2
160. _ug3-mesz_ sza2-a-tu-nu e-si-ir-ma is,-ba-ta mu-us,-s,a-szu2-un
161. _{lu2}a kin_ ha-an-t,u a-na nina{ki} il-lik-am-ma iq-ba-a ia-a-ti
162. ina 2(disz)-e ger-ri-ia a-na {kur}mu-s,ur u {kur}ku-u-si usz-te-sze-ra har-ra-nu
163. {disz}ur-da-ma-ne2-e a-lak ger-ri-ia isz-me-ma
164. sza ak-bu-su mi-s,ir {kur}mu-s,ur {iri}me-em-pi u2-masz-szir-ma
165. a-na szu-zu-ub _zi_-ti3-szu2 in-na-bit a-na qe2-reb {iri}ni-i'
166. _lugal-mesz {lu2}nam-mesz_ {lu2}qe2-pa-a-ni sza2 qe2-reb {kur}mu-s,ur asz2-ku-nu
167. ina _gaba_-ia il-li-ku-u2-nim-ma u2-na-asz2-szi-qu _giri3-min_-ia
168. _egir {disz}ur_-da-ma-ne2-e har-ra-nu as,-bat
169. al-lik a-di {iri}ni-i' _iri_ dan-nu-ti-szu2
170. ti-ib _me3_-ia dan-ni e-mur-ma {iri}ni-i' u2-masz-szir
171. in-na-bit a-na {iri}ki-ip-ki-pi _iri_ szu-a-tu2 a-na si-hir-ti-szu2
172. ina tukul-ti an-szar2 u {d}1(u)-5(disz) ik-szu-da _szu-min_-a-a
173. _ku3-babbar ku3-sig17_ ni-siq-ti _na4-mesz nig2-szu e2-gal_-szu2 ma-la ba-szu2-u
174. lu-bul-ti bir-me _gada-mesz ansze-kur-ra-mesz gal-mesz un-mesz_ zik-ru u sin-nisz
175. 2(disz) tim-me _mah-mesz_ pi-tiq za-ha-le-e eb-bi
176. sza 2(disz) _lim_ 5(disz) _me gun ki-la2_-szu2-nu man-za-az _ka2_ e2-kur
177. ul-tu man-za-al-ti-szu2-nu as-suh-ma al-qa-a a-na _kur_ an-szar2{ki}
178. szal-la-tu2 ka-bit-tu2 ina la mi3-ni asz2-lu-la ul-tu2 qe2-reb {iri}ni-i'
179. e-li {kur}mu-s,ur u3 {kur}ku-u2-si
180. _{gesz}tukul-mesz_-ia u2-szam-ri-ir-ma asz2-ta-kan li-i-tu
181. it-ti qa-ti ma-li-ti szal-mesz a-tu-ra
182. a-na nina{ki} _iri en_-ti-ia
183. i-na szal-szi ger-ri-ia _ugu_ {disz}ba-'a-li _man_ {kur}s,ur-ri
184. a-szib _muru2_ tam-tim lu-u al-lik
185. sza a-mat _lugal_-ti-ia la is,-s,u-ru la isz-mu-u zi-kir szap-te-ia
186. {iri}hal-s,u-_mesz_ e-li-szu2 u2-rak-kis
187. ina tam-tim u3 na-ba-li ger-re-e-ti-szu2 u2-s,ab-bit
188. nap-szat-su-nu u2-si-iq u2-kar-ri
189. a-na _{gesz}szudun_-ia u2-szak-ni-su-nu-ti
190. _dumu-munus_ s,i-it lib3-bi-szu u3 _dumu-munus-mesz szesz-mesz_-szu2
191. a-na e-pesz _{munus}agrig_-ti u2-bi-la a-di mah-ri-ia
192. {disz}ia-hi-mil-ki _dumu_-szu2 sza2 ma-te-ma ti-amtu la e-bi-ra
193. isz-te-nisz u2-sze-bi-la a-na e-pesz _ARAD_-ti-ia
194. _dumu-munus_-su u3 _dumu-munus-mesz szesz-mesz_-szu2
195. it-ti ter-ha-ti ma-a'-as-si am-hur-szu2
196. re-e-mu ar-szi-szu2-ma _dumu_ s,i-it _sza3_-szu2 u2-ter-ma a-din-szu2
197. {disz}ia-ki-in-lu-u _man_ {kur}a-ru-ad-da a-szib _muru2_ tam-tim
198. sza a-na _lugal-mesz ad-mesz_-ia la kan-szu2 ik-nu-sza2 a-na _{gesz}szudun_-ia
199. _dumu-munus_-su it-ti nu-dun-ne2-e ma-a'-di
200. a-na e-pesz _{munus}agrig_-u-ti a-na nina{ki}
201. u2-bil-am-ma u2-na-asz2-szi-qa _giri3-min_-ia
202. {disz}mu-gal-lu _man_ {kur}tab_-iri_ sza2 it-ti _lugal-mesz ad-mesz_-ia
203. id-bu-bu da-s,a-a-ti
204. bi-in-tu2 s,i-it lib3-bi-szu2 it-ti ter-ha-ti
205. ma-a'-as-si a-na e-pesz _{munus}agrig_-ti a-na nina{ki}
206. u2-bil-am-ma u2-na-asz2-sziq _giri3-min_-ia
207. _ugu_ {disz}mu-gal-li _ansze-kur-ra-mesz gal-mesz_
208. man-da-at-tu2 szat-ti-szam-ma u2-kin _edin_-usz-szu2
209. {disz}sa-an-da-szar-me {kur}hi-lak-ka-a-a
210. sza a-na _lugal-mesz ad-mesz_-ia la ik-nu-szu2
211. la i-szu-t,u ab-sza2-an-szu2-un
212. _dumu-munus_ s,i-it lib3-bi-szu2 it-ti nu-dun-ne2-e ma-a'-di
213. a-na e-pesz _{munus}agrig_-u-ti a-na nina{ki}
214. u2-bil-am-ma u2-na-asz2-sziq _giri3-min_-ia
215. ul-tu2 {disz}ia-ki-in-lu-u _man_ {kur}a-ru-ad-da e-mi3-du _kur_-szu2
216. {disz}a-zi-ba-al {disz}a-bi-ba-al {disz}a-du-ni-ba-a'-al
217. {disz}sa-pa-t,i-ba-al {disz}bu-di-ba-al {disz}ba-a'-al-ia-szu-pu
218. {disz}ba-a'-al-ha-nu-nu {disz}ba-al-ma-lu-ku {disz}a-bi-mil-ki {disz}pap-mil-ki
219. _dumu-mesz_ {disz}ia-ki-in-lu-u a-szib _muru2_ tam-tim
220. ul-tu2 _muru2_ tam-tim e-lu-nim-ma it-ti ta-mar-ti-szu2-nu ka-bit-ti
221. il-li-ku-u2-nim-ma u2-na-asz2-szi-qu _giri3-min_-ia
222. {disz}a-zi-ba-a'-al ha-disz ap-pa-lis-ma
223. a-na _lugal_-ti {kur}a-ru-ad-da asz2-kun-szu2
224. {disz}a-bi-ba-al {disz}a-du-ni-ba-al {disz}sa-pa-t,i-ba-al
225. {disz}bu-di-ba-al {disz}ba-a'-al-ia-szu-pu {disz}ba-al-ha-nu-nu
226. {disz}ba-al-ma-lu-ku {disz}a-bi-mil-ki {disz}a-hi-mil-ki
227. lu-bul-ti bir-me u2-lab-bisz _har-mesz ku3-sig17_ u2-rak-ki-sa
228. rit-te-e-szu2-un ina mah-ri-ia ul-zis-su-nu-ti
229. {disz}gu-ug-gu _man_ {kur}lu-ud-di na-gu-u sza2 ne2-ber-ti _a-ab-ba_
230. asz2-ru ru-u-qu sza2 _lugal-mesz ad-mesz_-ia la isz-mu-u zi-kir _mu_-szu2
231. ni-bit _mu_-ia ina _masz2-ge6_ u2-szab-ri-szu2-ma an-szar2 _dingir_ ba-nu-u-a
232. um-ma _giri3-min {disz}an-szar2-du3-a man kur_ an-szar2{ki} s,a-bat-ma
233. ina zi-kir _mu_-szu2 ku-szu-ud _{lu2}kur2-mesz_-ka
234. u4-mu _masz2-ge6_ an-ni-tu2 e-mu-ru {lu2}rak-bu-szu2 isz-pu-ra
235. a-na sza2-'a-al szul-mi3-ia _masz2-ge6_ an-ni-tu2 sza2 e-mu-ru
236. ina _szu-min {lu2}a kin_-szu2 isz-pur-am-ma u2-sza2-an-na-a ia-a-ti
237. ul-tu2 _sza3_ u4-me sza2 is,-ba-tu2 _giri3-min lugal_-ti-ia
238. {lu2}gi-mir-a-a mu-dal-li-pu _ug3-mesz kur_-szu2
239. sza2 la ip-tal-la-hu _ad-mesz_-ia u3 at-tu-u-a la is,-ba-tu2
240. _giri3-min lugal_-ti-ia ik-szu-ud
241. ina tukul-ti an-szar2 u {d}1(u)-5(disz) _dingir-mesz en-mesz_-ia _ta sza3 {lu2}en-iri-mesz_
242. sza {lu2}gi-mir-a-a sza2 ik-szu-du 2(disz) _{lu2}en-iri-mesz_
243. ina {gesz}s,i-is,-s,i isz-qa-ti _an-bar_ bi-re-ti u2-tam-me-eh-ma
244. it-ti ta-mar-ti ka-bit-te u2-sze-bi-la a-di mah-ri-ia
245. {lu2}rak-bu-szu2 sza2 a-na sza2-'a-al szul-mi3-ia ka-a-a-an isz-ta-nap-pa-ra
246. u2-szar-sza2-a ba-t,i-il-tu2 asz2-szu2 sza2 a-mat an-szar2 _dingir du3_-ia
247. la is,-s,u-ru a-na e-muq ra-man-i-szu2 it-ta-kil-ma ig-pu-usz lib3-bu
248. e-mu-qe2-e-szu2 a-na kit-ri {disz}pi-sza2-mi3-il-ki _man_ {kur}mu-s,ur
249. sza is,-lu-u _{gesz}szudun en_-ti-ia isz-pur-ma a-na-ku asz2-me-e-ma
250. u2-s,al-li an-szar2 u {d}1(u)-5(disz) um-ma pa-an _{lu2}kur2_-szu2 pa-gar-szu2 li-na-di-ma
251. lisz-szu-u-ni _giri3-pad-ra2-mesz_-szu2 ki-i sza2 a-na an-szar2 am-hu-ru isz-lim-ma
252. pa-an _{lu2}kur2_-szu2 pa-gar-szu2 in-na-di-ma isz-szu-u-ni _giri3-pad-ra2-mesz_-szu2
253. {lu2}gi-mir-a-a sza2 ina ni-bit _mu_-ia sza2-pal-szu2 ik-bu-su
254. it-bu-nim-ma is-pu-nu gi-mir _kur_-szu2 _egir_-szu2 _dumu_-szu2 u2-szib ina _{gesz}gu-za_-szu2
255. ep-szet _hul_-tim sza2 ina ni-isz _szu-min_-ia _dingir-mesz_ tik-le-ia
256. ina pa-an _ad du3_-szu2 u2-szap-ri-ku ina _szu-min {lu2}a kin_-szu2 isz-pur-am-ma
257. is,-ba-ta _giri3-min lugal_-ti-ia um-ma _lugal_ sza2 _dingir_ i-du-u-szu2 at-ta
258. _ad_-u-a ta-ru-ur-ma _munus-hul_ isz-sza2-kin ina pa-ni-szu2
259. ia-a-ti _ARAD_ pa-lih-ka kur-ban-ni-ma la-szu-t,a ab-sza2-an-ka
260. ina 4(disz)-e ger-ri-ia ad-ke _erin2-hi-a_-ia _ugu_ {disz}ah-sze-e-ri
261. _man_ {kur}man-na-a-a usz-te-sze-ra har-ra-nu ina qi2-bit an-szar2 {d}sin {d}utu
262. {d}iszkur {d}en {d}ag {d}1(u)-5(disz) sza2 nina{ki} {d}gaszan-kid-mu-ri {d}1(u)-5(disz) sza2 {iri}limmu2-dingir
263. {d}masz {d}u-gur {d}nusku qe2-reb {kur}man-na-a-a e-ru-ub it-ta-lak szal-t,isz
264. _iri-mesz_-szu2 dan-nu-ti a-di _tur-mesz_ sza2 ni-i-ba la i-szu-u
265. a-di qe2-reb {iri}i-zir-ti _kur_-ud ap-pul aq-qur ina {d}gesz-bar aq-mu
266. _ug3-mesz ansze-kur-ra-mesz ansze-mesz gu4-mesz_ u s,e-e-ni _ta_ qe2-reb _iri-mesz_ sza2-a-tu2-nu
267. u2-sze-s,a-am-ma szal-la-tisz am-nu {disz}ah-sze-e-ri a-lak ger-ri-ia
268. isz-me-ma u2-masz-szir {iri}i-zir-tu _iri lugal_-ti-szu2
269. a-na {iri}isz-ta-at-ti _iri_ tukul-ti-szu2 in-na-bit-ma e-hu-uz
270. mar-qi2-tu2 na-gu-u szu-a-tu2 ak-szu-ud ma-lak 1(u) u4-me 5(disz) u4-me
271. u2-szah-rib-ma sza2-qu-um-ma-tu2 at-bu-uk
272. {disz}ah-sze-e-ri la pa-lih _en_-ti-ia ina a-mat {d}1(u)-5(disz)
273. a-szi-bat {iri}limmu2-dingir sza2 _ta_ re-e-szi taq-bu-u2
274. um-ma ana-ku mi-tu-tu {disz}ah-sze-e-ri _man_ {kur}man-na-a-a
275. ki-i sza2 aq-bu-u ep-pu-usz ina _szu-min ARAD-mesz_-szu2 tam-nu-szu-u-ma
276. _ug3-mesz kur_-szu2 si-hu _ugu_-szu2 u2-szab-szu2-u ina _sila iri_-szu2 {lu2}sza2-lam-ta-szu2
277. id-du-u in-da-asz2-sza2-ru pa-gar-szu2
278. _szesz-mesz_-szu2 qin-nu-szu2 _numun e2 ad_-szu2 u2-szam-qi2-tu2 ina _{gesz}tukul-mesz_
279. _egir_-nu {disz}u2-al-li-i _dumu_-szu2 u2-szib ina _{gesz}gu-za_-szu2
280. da-na-an an-szar2 {d}sin {d}utu {d}iszkur {d}en {d}ag
281. {d}1(u)-5(disz) sza2 nina{ki} {d}szar-rat-kid-mu-ri
282. {d}1(u)-5(disz) sza2 limmu2-dingir{ki} {d}masz {d}u-gur {d}nusku
283. _dingir-mesz gal-mesz en-mesz_-ia e-mur-ma
284. ik-nu-sza2 a-na _{gesz}szudun_-ia
285. asz2-szu2 ba-lat, _zi_-ti3-szu2 up-na-a-szu2 ip-ta-a u2-s,al-la-a _en_-u-ti
286. {disz}e-ri-si-in-ni _dumu_ ri-du-ti-szu2
287. a-na nina{ki} isz-pur-am-ma u2-na-asz2-szi-qa _giri3-min_-ia
288. re-e-mu ar-szi-szu-u-ma
289. _{lu2}a kin_-ia sza2 szul-me u2-ma-'e-er _edin_-usz-szu2
290. _dumu-munus_ s,i-it lib3-bi-szu2 u2-sze-bi-la a-na e-pesz _{munus}agrig_-u-ti
291. ma-da-ta-szu2 mah-ri-tu2 sza2 ina ter-s,i _lugal-mesz ad-mesz_-ia
292. u2-szab-t,i-lu isz-szu-u-ni a-di mah-ri-ia
293. 3(u) _ansze-kur-ra-mesz_ e-li ma-da-ti-szu2 mah-ri-ti
294. u2-rad-di-i-ma e-mi3-is-su
295. ina 5(disz)-szi ger-ri-ia a-na {kur}elam-ma{ki}
296. usz-te-esz-sze-ra har-ra-nu
297. ina qi2-bit an-szar2 {d}sin {d}utu {d}iszkur {d}en {d}ag
298. {d}1(u)-5(disz) sza2 nina{ki} {d}szar-rat-kid-mu-ri
299. {d}1(u)-5(disz) sza2 limmu2-dingir{ki} {d}masz {d}u-gur {d}nusku
300. ina _{iti}kin_ szi-pir _{d}inanna-mesz iti lugal dingir-mesz_ an-szar2
301. _ad dingir-mesz_ {d}nun-nam-nir
302. ki-ma ti-ib me-he-e ez-zi
303. ak-tu-um {kur}elam-ma{ki} a-na si-hir-ti-sza2
304. ak-kis _sag-du_ {disz}te-um-man _lugal_-szu2-nu
305. mul-tar-hu sza2 ik-pu-da _hul_-tu
306. ina la mi3-ni a-duk qu-ra-de-e-szu2
307. ina _szu-min ti-la-mesz_ u2-s,ab-bit mun-dah-s,e-e-szu2
308. szal-ma-a-ti-szu2-nu ki-ma _{gesz}dih3_ u _{gesz}kiszi16_
309. u2-mal-la-a ta-mir-ti {iri}szu-sza2-an
310. _usz2-mesz_-szu2-nu {i7}u2-la-a-a u2-szar-di
311. _a-mesz_-sza2 as,-ru-up ki-ma na-ba-as-si
312. {disz}um-man-i-gasz _dumu_ {disz}ur-ta-ki _man_ {kur}elam-ma{ki}
313. sza la-pa-an {disz}te-um-man a-na _kur_ an-szar2{ki} in-nab-ta is,-ba-ta _giri3-min_-ia
314. it-ti-ia u2-bil-szu2 a-na {kur}elam-ma{ki}
315. u2-sze-szib-szu2 ina _{gesz}gu-za_ {disz}te-um-man
316. {disz}tam-ma-ri-tu2 _szesz_-szu2 szal-sza2-a-a sza2 it-ti-szu2 in-nab-ta
317. ina {iri}hi-da-lu asz2-kun-szu2 a-na _lugal_-u-ti
318. ul-tu2 _{gesz}tukul-mesz_ an-szar2 u {d}1(u)-5(disz) _ugu_ {kur}elam-ma{ki} u2-szam-ri-ru
319. asz2-tak-ka-nu da-na-nu u li-i-tu
320. ina ta-a-a-ar-ti-ia _ugu_ {disz}du-na-ni {kur}gam-bu-la-a-a
321. sza a-na {kur}elam-ma{ki} it-tak-lu asz2-ku-na pa-ni-ia
322. {iri}sza2-pi-i-{d}en _iri_ tukul-ti {kur}gam-bu-li ak-szu-ud
323. qe2-reb _iri_ szu-a-tu2 e-ru-ub
324. _ug3-mesz_-szu2 as-lisz u2-t,ab-bi-ih
325. {disz}du-na-nu {disz}sa-am-gu-nu
326. mu-nar3-ri-t,u e-pesz _lugal_-ti-ia
327. ina {gesz}s,i-is,-s,i isz-qa-ti _an-bar_ bi-re-ti _an-bar_
328. u2-tam-me-ha _szu-min_ u _giri3-min_
329. si-it-ti _dumu-mesz {disz}en-ba_-sza2 qin-nu-szu2 _numun e2 ad_-szu2
330. ma-la ba-szu2-u {disz}{d}muati-i {disz}en-kar-ir
331. _dumu-mesz {disz}{d}muati-mu-kam_-esz _{lu2}gu2-en-na_
332. u3 _giri3-pad-ra2-mesz ad_ ba-ni-szu2-nu
333. it-ti {lu2}ur-bi {lu2}te-be2-e _ug3-mesz_ {kur}gam-bu-li
334. _gu4-mesz_ s,e-e-ni _ansze-mesz ansze-kur-ra-mesz ansze-kunga-mesz_
335. ul-tu2 qe2-reb {kur}gam-bu-li asz2-lu-la a-na _kur_ an-szar2{ki}
336. {iri}sza2-pi-i-{d}en _iri_ tukul-ti-szu2
337. ap-pul aq-qur ina _a-mesz_ usz-har-mit,
338. ina u4-me-szu2 {disz}{d}gesz-nu11-mu-gi-na _szesz_ la ke-e-nu
339. sza2 _mun_ e-pu-szu-usz
340. asz2-ku-nu-usz a-na _lugal_-ut babila2{ki}
341. mim-ma par-su si-ma-a-te sza2 _lugal_-ti e-pu-usz-ma a-din-szu2
342. _{lu2}erin2-mesz ansze-kur-ra-mesz {gesz}gigir-mesz_
343. ak-s,ur-ma u2-mal-la-a qa-tusz-szu2
344. _iri-mesz a-sza3-mesz {gesz}kiri6-mesz un-mesz_ a-szib lib3-bi-szu2-un
345. u2-sza2-tir-ma _ugu_ sza2 _ad du3_-ia iq-bu-u a-din-szu2
346. u3 szu-u _munus saga_ an-ni-tu2 e-pu-szu-usz im-szi-ma
347. isz-te-ne2-'a-a le-mut-tu2
348. e-lisz ina szap-te-e-szu2 i-tam-ma-a t,u-ub-ba-a-ti
349. szap-la-nu lib3-ba-szu2 ka-s,ir ne2-er-tu
350. _dumu-mesz_ babila2{ki} sza2 ina _ugu kur_ an-szar2{ki} am-ru
351. _ARAD-mesz_ da-gil2 pa-ni-ia ip-ru-us,-ma
352. da-bab la kit-te id-bu-ba it-ti-szu2-un
353. ina szi-pir ni-kil-ti a-na sza2-'a-al szul-mi3-ia
354. a-na nina{ki} a-di mah-ri-ia isz-pu-ra-asz2-szu2-nu-ti
355. a-na-ku {disz}an-szar2-du3-a _man kur_ an-szar2{ki}
356. sza _dingir-mesz gal-mesz_ szi-mat _saga_-tim i-szi-mu-usz
357. ib-nu-u-szu2 ina kit-te u mi-sza2-ri
358. _dumu-mesz_ babila2{ki} szu-nu-ti ina _{gesz}banszur_ tak-ne2-e
359. ul-zis-su-nu-ti lu-bul-ti bir-me
360. u2-lab-bi-su-nu-ti _har-mesz ku3-sig17_ u2-rak-kis
361. rit-te-e-szu2-un a-di _dumu-mesz_ babila2{ki} szu-nu-ti
362. qe2-reb _kur_ an-szar2{ki} u2-szu-uz-zu
363. i-dag-ga-lu pa-an sza2-kan t,e3-me-ia
364. u3 szu-u {disz}{d}gesz-nu11-mu-gi-na _szesz_ la ke-e-nu
365. sza la is,-s,u-ru a-de-ia _ug3-mesz kur_ uri{ki} {kur}kal-du
366. {kur}a-ra-mu _kur_ tam-tim ul-tu2 {iri}a-qa-ba
367. a-di {iri}ka2-sa-li-me-ti _ARAD-mesz_ da-gil2 pa-ni-ia
368. usz-bal-kit ina _szu-min_-ia u3 {disz}um-man-i-gasz
369. mun-nab-tu sza2 is,-ba-tu2 _giri3-min lugal_-ti-ia
370. sza qe2-reb {kur}elam-ma{ki} asz2-ku-nu-usz a-na _lugal_-u-ti
371. u3 _lugal-mesz_ {kur}gu-te9-e{ki} _kur_ mar-tu-e{ki} {kur}me-luh-he-e
372. sza ina qi2-bit an-szar2 u {d}nin-lil2 isz-tak-ka-na _szu-min_-a-a
373. nap-har-szu2-nu it-ti-ia u2-szam-kir2-ma
374. it-ti-szu2 isz-ku-nu pi-i-szu2-nu
375. _abul-mesz_ zimbir{ki} babila2{ki} bar2-sipa{ki}
376. u2-dil-ma ip-ru-sa _szesz_-u-tu
377. e-li _bad3 iri-mesz_ sza2-a-tu-nu
378. mun-dah-s,e-e-szu2 u2-sze-li-i-ma
379. it-ti-ia e-te-ne2-ep-pu-szu2 _me3_
380. e-pesz _{udu}siskur-mesz_-ia la-pa-an {d}en _dumu {d}en_
381. nu-ur2 _dingir-mesz {d}utu_ u qu-ra-di {d}er3-ra
382. ik-la-ma u2-szab-t,i-la na-dan zi-bi-ia
383. a-na e-kem ma-ha-zi szu-bat _dingir-mesz gal-mesz_
384. sza esz-re-e-ti-szu2-nu ud-di-szu2 u2-za-'i-i-nu _ku3-sig17 ku3-babbar_
385. qe2-reb-szu2-nu asz2-tak-ka-nu si-ma-a-te ik-pu-ud _hul_-tu2
386. ina u4-me-szu2 1(disz)-en _{lu2}gurusz_
387. ina szat mu-szi u2-tul-ma
388. i-na-at,-t,a-al _masz2-ge6_
389. um-ma ina _ugu_ ki-gal-li sza2 {d}sin sza2-t,ir-ma
390. ma-a sza2 it-ti {disz}an-szar2-du3-a _man kur_ an-szar2{ki}
391. ik-pu-du _munus-hul_ ip-pu-szu2 s,e-lu-u2-tu2
392. mu-u-tu lem-nu a-szar-rak-szu-nu-ti
393. ina _gir2 an-bar_ ha-an-t,i mi-qit {d}gesz-bar _su-gu7_
394. _tag_-it {d}er3-ra u2-qat2-ta-a nap-szat-su-un
395. an-na-a-te asz2-me-e-ma at-kil a-na a-mat {d}sin _en_-ia
396. ina 6(disz)-szi ger-ri-ia ad-ke _erin2-hi-a_-ia
397. _edin {disz}{d}gesz-nu11-mu-gi-na_ usz-te-esz-sze-ra har-ra-nu
398. qe2-reb zimbir{ki} babila2{ki} bar2-sipa{ki} gu2-du8-a{ki}
399. sza2-a-szu2 ga-du mun-dah-s,e-e-szu2 e-si-ir-ma
400. u2-s,ab-bi-ta mu-us,-s,a-szu2-un
401. qe2-reb _iri_ u _edin_ ina la mi3-ni asz2-tak-ka-na _bad5-bad5_-szu2
402. si-it-tu-u-ti ina _tag_-it {d}er3-ra
403. su-un-qu bu-bu-ti isz-ku-nu na-pisz-tu
404. {disz}um-man-i-gasz _man_ {kur}elam-ma{ki} szi-kin _szu-min_-ia
405. sza t,a-'a-a-tu im-hu-ru-szu2-ma
406. it-ba-a a-na kit-ri-szu2
407. {disz}tam-ma-ri-tu2 _edin_-usz-szu2 ib-bal-kit-ma
408. sza2-a-szu2 ga-du kim-ti-szu2 u2-ras-sib ina _{gesz}tukul-mesz_
409. _egir_ {disz}tam-ma-ri-tu2 sza2 _egir_ {disz}um-man-i-gasz
410. u2-szi-bu ina _{gesz}gu-za_ {kur}elam-ma{ki}
411. la isz-a-lu szu-lum _lugal_-ti-ia
412. a-na re-s,u-ut {disz}{d}gesz-nu11-mu-gi-na _szesz_ nak-ri
413. il-lik-am-ma a-na mit-hu-s,i _erin2-hi-a_-ia
414. ur-ri-ha _{gesz}tukul-mesz_-szu2
415. ina su-up-pe-e sza2 an-szar2 u {d}1(u)-5(disz) u2-sap-pu-u2
416. un-nin-ni-ia il-qu-u isz-mu-u2 zi-kir _nundum-min_-ia
417. {disz}in-da-bi-bi _ARAD_-su _edin_-usz-szu2 ib-bal-kit-ma
418. ina _me3 edin_ isz-ku-na _bad5-bad5_-szu2 {disz}tam-ma-ri-tu
419. _man_ {kur}elam-ma{ki} sza2 _ugu_ ni-kis _sag-du_ {disz}te-um-man
420. me2-re-eh-tu iq-bu-u2
421. sza ik-ki-su a-hu-ur-ru-u _erin2-hi-a_-ia
422. um-ma i-nak-ki-su-u _sag-du man_ {kur}elam-ma{ki}
423. qe2-reb _kur_-szu2 ina _ukken erin2-hi-a_-szu2
424. sza2-ni-ia-a-nu iq-bi u3 {disz}um-man-i-gasz
425. ke-e u2-na-asz2-sziq qaq-qa-ru
426. ina pa-an _{lu2}a kin_ sza2 {disz}an-szar2-du3-a _man kur_ an-szar2{ki}
427. _ugu_ a-ma-a-ti an-na-a-te sza2 il-zi-nu
428. an-szar2 u {d}1(u)-5(disz) e-ri-hu-szu2-ma
429. {disz}tam-ma-ri-tu2 _szesz-mesz_-szu2 qin-nu-szu2 _numun e2 ad_-szu2
430. it-ti 1(gesz2) 2(u) 5(disz) _nun-mesz_ a-li-kut i-di-szu2
431. la-pa-an {disz}in-da-bi-bi in-nab-tu2-nim-ma
432. mi-ra-nu-usz-szu2-un ina _ugu sza3-mesz_-szu2-nu
433. ip-szi-lu-nim-ma il-lik-u-ni a-di nina{ki}
434. {disz}tam-ma-ri-tu _giri3-min lugal_-ti-ia u2-na-asz2-sziq-ma
435. qaq-qa-ru u2-sze-szir ina ziq-ni-szu2
436. man-za-az {gesz}ma-gar-ri-ia is,-bat-ma
437. a-na e-pesz _ARAD_-ti-ia ra-man-szu2 im-nu-ma
438. asz2-szu2 e-pesz di-ni-szu2 a-lak re-s,u-ti-szu2
439. ina qi2-bit an-szar2 u {d}1(u)-5(disz) u2-s,al-la-a _en_-u-ti
440. ina mah-ri-ia i-zi-zu-u-ma
441. i-dal-la-lu qur-di _dingir-mesz_-ia dan-nu-ti
442. sza il-li-ku re-s,u-u2-ti
443. a-na-ku {disz}an-szar2-du3-a lib3-bu rap-szu2
444. la ka-s,ir ik-ki mu-pa-si-su hi-t,a-a-te
445. a-na {disz}tam-ma-ri-tu2 re-e-mu ar-szi-szu2-ma
446. sza2-a-szu2 ga-du _numun e2 ad_-szu2 ina qe2-reb _e2-gal_-ia
447. ul-zis-su-nu-ti ina u4-me-szu2 _ug3-mesz kur_ uri{ki}
448. sza it-ti {disz}{d}gesz-nu11-mu-gi-na isz-szak-nu
449. ik-pu-du _hul_-tu2 ne2-eb-re-e-tu2 is,-bat-su-nu-ti
450. a-na bu-ri-szu2-nu _uzu dumu-mesz_-szu2-nu _dumu-munus-mesz_-szu2-nu
451. e-ku-lu ik-su-su ku-ru-us-su
452. an-szar2 {d}sin {d}utu {d}iszkur {d}en {d}ag
453. {d}1(u)-5(disz) sza2 nina{ki} {d}szar-rat-kid-mu-ri
454. {d}1(u)-5(disz) sza2 {iri}limmu2-dingir {d}masz {d}u-gur {d}nusku
455. sza ina mah-ri-ia il-li-ku i-na-ru ga-re-ia
456. {disz}{d}gesz-nu11-mu-gi-na _szesz_ nak-ri sza2 i-gi-ra-an-ni
457. ina mi-qit {d}gesz-bar a-ri-ri id-du-szu2-ma
458. u2-hal-li-qu nap-szat-su
459. u3 _ug3-mesz_ sza2 a-na {disz}{d}gesz-nu11-mu-gi-na
460. _szesz_ nak-ri u2-szak-pi-du
461. ep-sze-e-tu2 an-ni-tu2 _hul_-tu2 e-pu-szu2
462. sza mi-tu-tu ip-la-hu nap-szat-su-nu pa-nu-usz-szu2-un
463. te-qir-u-ma it-ti {disz}{d}gesz-nu11-mu-gi-na
464. _en_-szu2-nu la im-qu-tu2 ina {d}gesz-bar
465. sza la-pa-an ni-kis _gir2 an-bar_ su-un-qi2 bu-bu-ti
466. {d}gesz-bar a-ri-ri i-sze-tu-u-ni e-hu-zu mar-qi2-i-tu2
467. sa-par _dingir-mesz gal-mesz en-mesz_-ia sza2 la na-par-szu-di
468. is-hu-up-szu2-nu-ti e-du ul ip-par-szid
469. mul-tah-t,u ul u2-s,i ina _szu-min_-ia im-nu-u _szu-min_-u-a
470. _{gesz}gigir-mesz_ {gesz}sza2 sza2-da-di {gesz}sza2 s,il-li {munus}sek-re-e-ti-szu2
471. nig2-gur11 _e2-gal_-szu2 u2-bil-u-ni a-di mah-ri-ia
472. _{lu2}erin2-mesz_ sza2-a-tu2-nu szil-la-tu2 pi-i-szu2-nu
473. sza2 ina _ugu an-szar2 dingir_-ia szil-la-tu2 iq-bu-u
474. u3 ia-a-ti _nun_ pa-lih-szu2 ik-pu-du-u-ni _hul_-tu2
475. pi-i-szu2-nu asz2-lu-uq _bad5-bad5_-szu2-nu asz2-kun
476. si-it-ti _ug3-mesz_ bal-t,u-sun2 ina _{d}alad-{d}lamma_
477. sza {disz}{d}sin-pap-mesz-su _ad ad du3_-ia ina lib3-bi is-pu-nu
478. e-nen-na a-na-ku ina ki-is-pi-szu2
479. _ug3-mesz_ sza2-a-tu-nu ina lib3-bi as-pu-un
480. _uzu-mesz_-szu2-nu nu-uk-ku-su-u-ti
481. u2-sza2-kil _ur-gi7-mesz szah-mesz_ zi-i-bi
482. _ti8{muszen}-mesz muszen-mesz an_-e _ku6-mesz_ ap-se-e
483. ul-tu2 ep-sze-e-ti an-na-a-ti e-te-ep-pu-szu2
484. u2-ni-ih-hu lib3-bi _dingir-mesz gal-mesz en-mesz_-ia
485. _adda-mesz un-mesz_ sza2 {d}er3-ra u2-szam-qi2-tu2
486. u3 sza2 ina su-un-qi2 bu-bu-ti isz-ku-nu na-pisz-tu2
487. ri-he-et u2-kul-ti _ur-gi7-mesz szah-mesz_
488. sza _sila-mesz_ pur-ru-ku ma-lu-u re-ba-a-te
489. _giri3-pad-ra2-mesz_-szu2-nu ul-tu2 qe2-reb babila2{ki}
490. gu2-du8-a{ki} zimbir{ki} u2-sze-s,i-ma
491. at-ta-ad-di a-na ka-ma-a-ti
492. ina szi-pir i-szip-pu-ti _bara2-mesz_-szu2-nu ub-bi-ib
493. ul-li-la su-le-e-szu2-nu lu-'u-u-ti
494. _dingir-mesz_-szu2-nu ze-nu-u-ti _{d}1(u)-5(disz)-mesz_-szu2-nu szab-sa-a-te
495. u2-ni-ih ina taq-rib-ti u _er2-sza3-hun-ga2_
496. sat-tuk-ki-szu2-un sza2 i-me-s,u ki-ma sza2 u4-me ul-lu-ti
497. ina szal-me u2-ter-ma u2-kin
498. si-it-ti _dumu-mesz_ babila2{ki} gu2-du8-a{ki} zimbir{ki}
499. sza ina szib-t,i szag-gasz-ti u3 ne2-eb-re-e-ti
500. i-sze-tu-u-ni re-e-mu ar-szi-szu2-nu-ti
501. ba-lat, na-pisz-ti-szu2-nu aq-bi
502. qe2-reb babila2{ki} u2-sze-szib-szu2-nu-ti
503. _ug3-mesz kur_ uri{ki} ga-du {kur}kal-du {kur}a-ra-mu _kur_ tam-tim
504. sza {disz}{d}gesz-nu11-mu-gi-na ik-ter-u-ma
505. a-na 1(disz)-en pi-i u2-ter-ru
506. a-na pa-ra-as ra-ma-ni-szu2-nu ik-ki-ru it-ti-ia
507. ina qi2-bit an-szar2 u {d}nin-lil2 _dingir-mesz_ tik-le-ia
508. a-na pat, gim-ri-szu2-nu ak-bu-us
509. _{gesz}szudun_ an-szar2 sza2 is,-lu-u e-mid-su-nu-ti
510. _{lu2}gar-kur-mesz {lu2}til-gid2-mesz_ szi-kin _szu-min_-ia
511. asz2-tak-ka-na e-li-szu2-un
512. _sa2-du11-mesz_ gi-ne2-e _sag-mesz_ an-szar2 {d}nin-lil2
513. u3 _dingir-mesz kur_ an-szar2{ki} u2-kin _edin_-usz-szu2-un
514. bil-tu man-da-at-tu2 _en_-ti-ia
515. szat-ti-szam-ma la na-par-ka-a e-mid-su-nu-ti
516. ina 7(disz)-e ger-ri-ia ina _{iti}sig4 iti_ {d}sin _en esz-bar_
517. _dumu_ resz-tu-u a-sza2-re-du sza2 {d}en-lil2
518. ad-ke _erin2-hi-a_-ia _edin_ {disz}um-man-al-da-si
519. _man_ {kur}elam-ma{ki} usz-te-esz-sze-ra har-ra-nu
520. u2-bil it-ti-ia {disz}tam-ma-ri-tu2 _man_ {kur}elam-ma{ki}
521. sza la-pa-an {disz}in-da-bi-bi _ARAD_-szu2 in-nab-tam-ma is,-ba-ta _giri3-min_-ia
522. _ug3-mesz_ {iri}hi-il-mu {iri}pil-la-ti {iri}du-mu-qu
523. {iri}su-la-a-a {iri}la-hi-ra-di-bi-ri-i-na
524. ti-ib _me3_-ia dan-ni isz-mu-u sza2 al-la-ku a-na {kur}elam-ma{ki}
525. nam-ri-ri an-szar2 u {d}1(u)-5(disz) _en-mesz_-ia
526. pu-luh-ti _lugal_-ti-ia is-hu-up-szu2-nu-ti
527. szu-nu _ug3-mesz_-szu2-nu _gu4-mesz_-szu2-nu s,e-e-ni-szu2-nu
528. a-na e-pesz _ARAD_-ti-ia a-na _kur_ an-szar2{ki} im-qut-nim-ma
529. is,-ba-tu2 _giri3-min lugal_-ti-ia {iri}e2-{disz}im-bi-i mah-ru-u
530. _iri lugal_-u-ti _e2_ tuk-la-a-te sza2 {kur}elam-ma{ki}
531. sza ki-ma _bad3 gal_-e pa-an {kur}elam-ma{ki} par-ku
532. sza {disz}{d}sin-pap-mesz-su _man kur_ an-szar2{ki} _ad ad du3_-ia
533. il-la-mu-u-a ik-szu-du u3 szu-u e-la-mu-u2
534. _iri_ me2-eh-ret {iri}e2-{disz}im-bi-i mah-re-e
535. sza2-nam-ma e-pu-szu2-ma _bad3_-szu2 u2-dan-nin-u-ma
536. u2-zaq-qi2-ru szal-hu-u-szu
537. {iri}e2-{disz}im-bi-i iz-ku-ru ni-bit-su
538. ina me-ti-iq ger-ri-ia ak-szu-ud
539. _ug3-mesz_ a-szib lib3-bi-szu2 sza2 la u2-s,u-u2-nim-ma
540. la isz-a-lu szu-lum _lugal_-ti-ia a-nir
541. _sag-du-mesz_-szu2-nu ak-kis _nundum-mesz_-szu2-nu ap-ru-u'
542. a-na ta-mar-ti _ug3-mesz kur_-ia
543. al-qa-a a-na _kur_ an-szar2{ki}
544. {disz}im-ba-ap-pi {lu2}qe-e-pu {iri}e2-{disz}im-bi-i
545. {lu2}ha-tan {disz}um-man-al-da-si _man_ {kur}elam-ma{ki}
546. bal-t,u-us-su ul-tu2 qe2-reb _iri_ szu-a-tu2
547. u2-sze-s,a-am-ma _szu-min_ u _giri3-min_ bi-re-tu2 _an-bar_
548. ad-di-szu2-u-ma u2-ra-a-szu2 a-na _kur_ an-szar2{ki}
549. _munus-e2-gal_ u3 _dumu-mesz_-szu2 sza2 {disz}te-um-man
550. _man_ {kur}elam-ma{ki} sza2 ina na-asz2-par-ti an-szar2
551. ina ger-ri-ia mah-re-e ak-ki-su _sag-du_-su
552. it-ti si-it-ti _ug3-mesz_ a-szi-bu-ti {iri}e2-{disz}im-bi-i
553. u2-sze-s,a-am-ma szal-la-tisz am-nu
554. {disz}um-man-al-da-si _man_ {kur}elam-ma{ki}
555. e-reb _erin2-hi-a_-ia sza2 qe2-reb {kur}elam-ma{ki} e-ru-bu isz-me-ma
556. {iri}ma-dak-tu2 _iri lugal_-ti-szu2 u2-masz-szir-ma
557. in-na-bit-ma _kur_-szu2 e-li
558. {disz}um-ba_-lagab_-u-a sza2 ul-tu2 {kur}elam-ma{ki}
559. ta-se-hu-u a-na {iri}bu-bi-lu in-nab-tu-u-ma
560. me2-eh-ret {disz}um-man-al-da-si u2-szi-bu ina _{gesz}gu-za_ {kur}elam-ma{ki}
561. ki-ma sza2-a-szu2-ma isz-me-ma {iri}bu-bi-lu
562. _iri_ mu-szab _en_-ti-szu2 u2-masz-szir-ma
563. ki-ma _ku6-mesz_ is,-bat szu-pul _a-mesz_ ru-qu-u-ti
564. {disz}tam-ma-ri-tu2 sza2 in-nab-ta is,-ba-ta _giri3-min_-ia
565. qe2-reb {iri}szu-sza2-an u2-sze-rib asz2-kun-szu2 a-na _lugal_-ti
566. _saga_-tu e-pu-szu-usz sza2 asz2-pu-ru _a2-tah_-su im-szi-ma
567. isz-te-ne2-'a-a _hul_-tu a-na ka-szad _erin2-hi-a_-ia
568. ki-a-am iq-bi it-ti lib3-bi-szu2
569. um-ma _un-mesz_ {kur}elam-ma{ki} a-na _munus-mesz_-e i-tu-ru
570. ina _igi kur_ an-szar2{ki} szu-nu szu-nu-ma ir-ru-bu-nim-ma
571. ih-ta-nab-ba-tu2 hu-bu-ut {kur}elam-ma{ki}
572. an-szar2 u {d}1(u)-5(disz) sza2 _a2-min_-a-a il-li-ku
573. u2-sza2-zi-zu-in-ni _edin_ ga-re-ia
574. lib3-bi {disz}tam-ma-ri-tu2 ek-s,u ba-ra-nu-u ib-ru-u-ma
575. u2-ba-'u-u2 qa-tusz-szu2
576. ul-tu _{gesz}gu-za lugal_-ti-szu2 id-ku-nisz-szum-ma
577. u2-ter-ru-nisz-szu2 sza2-ni-ia-a-nu
578. u2-szak-ni-szu-usz a-na _giri3-min_-ia
579. szu-ut a-ma-a-ti an-na-a-ti
580. ina s,i-ri-ih-ti lib3-bi-ia
581. sza {disz}tam-ma-ri-tu2 la ke-e-nu ih-t,a-a
582. ina li-i-ti u da-na-ni sza2 _dingir-mesz gal-mesz en-mesz_-ia
583. qe2-reb {kur}elam-ma{ki} a-na si-hir-ti-sza2 at-ta-lak szal-t,isz
584. ina ta-a-a-ar-ti-ia sza2 szul-me-e _szu-min_ ma-li-ti
585. pa-an _{gesz}szudun_-ia u2-ter-ra a-na _kur_ an-szar2{ki}
586. {iri}ga-tu-du {iri}ga-tu-du-ma
587. {iri}da-e-ba {iri}na-di-i'
588. {iri}bad3-{disz}am-na-ni {iri}bad3-{disz}am-na-ni-ma
589. {iri}ha-ma-nu {iri}ta-ra-qu
590. {iri}ha-a-a-u2-si {iri}e2-{na4}kiszib-e2-su
591. {iri}e2-{disz}ar-ra-bi {iri}e2-{disz}im-bi-i
592. {iri}ma-dak-tu {iri}szu-sza2-an
593. {iri}bu-be2-e {iri}sze-{disz}{d}szu2-man-a-ni
594. {iri}ur-da-li-ka {iri}al-ga-ri-ga
595. {iri}tu-u2-bu {iri}du6-tu-u2-bu
596. {iri}du-un_-lugal {iri}bad3_-{disz}un-da-si
597. {iri}bad3-{disz}un-da-si-ma {iri}bu-bi-lu
598. {iri}sa-am-u2-nu {iri}e2-{disz}bu-na-ku
599. {iri}qa-ab-ri-na {iri}qa-ab-ri-na-ma {iri}ha-ra-a'
600. _iri-mesz_ szu-nu-ti ak-szu-ud
601. ap-pul aq-qur ina {d}gesz-bar aq-mu
602. _dingir-mesz_-szu2-nu _ug3-mesz_-szu2-nu _gu4-mesz_-szu2-nu s,e-e-ni-szu2-nu
603. _nig2-szu_-szu2-nu _nig2-gur11_-szu2-nu
604. {gesz}s,u-um-bi _ansze-kur-ra-mesz ansze-kunga-mesz_
605. {gesz}til-li u2-nu-ut _me3_ asz2-lu-la a-na _kur_ an-szar2{ki}
606. i-na 8(disz)-e ger-ri-ia ina qi2-bit an-szar2 u {d}1(u)-5(disz)
607. ad-ke _erin2-hi-a_-ia _edin_ {disz}um-man-al-da-si
608. _man_ {kur}elam-ma{ki} usz-te-esz-sze-ra har-ra-nu
609. {iri}e2-{disz}im-bi-i sza2 ina ger-ri-ia mah-re-e
610. ak-szu-du e-nen-na {kur}ra-a-szi
611. {iri}ha-ma-nu a-di na-ge-szu2 ak-szu-ud
612. u3 szu-u {disz}um-man-al-da-si _man_ {kur}elam-ma{ki}
613. ka-szad {kur}ra-a-szi {iri}ha-ma-nu isz-me-ma
614. pu-luh-ti an-szar2 u {d}1(u)-5(disz) a-li-kut _a2-min_-ia
615. is-hu-up-szu2-ma {iri}ma-dak-tu2 _iri lugal_-ti-szu2
616. u2-masz-szir-ma in-na-bit a-na {iri}bad3-{disz}un-da-si
617. {i7}id-id-e e-bir-ma _i7_ szu-a-tu2
618. a-na dan-nu-ti-szu2 isz-kun
619. uk-ta-ta-s,ar a-na s,al-ti-ia
620. {iri}na-di-tu2 _iri lugal_-ti a-di na-ge-szu2 _kur_-ud
621. {iri}e2-{disz}bu-na-ku _iri lugal_-ti a-di na-ge-szu2 _kur_-ud
622. {iri}har-tap-a-nu _iri lugal_-ti a-di na-ge-szu2 _kur_-ud
623. {iri}tu-u2-bu a-di na-ge-szu2 _kur_-ud
624. bi-rit _i7_ ka-la-mu {iri}ma-dak-tu2
625. _iri lugal_-ti a-di na-ge-szu2 _kur_-ud
626. {iri}hal-te-ma-asz2 _iri lugal_-ti-szu2 ak-szu-ud
627. {iri}szu-sza2-an _iri lugal_-ti-szu2 ak-szu-ud
628. {iri}di-in_-lugal_ {iri}su-mu-un-tu-na-asz2
629. _iri lugal_-ti-szu2 ak-szu-ud
630. {iri}pi-di-il-ma _iri lugal_-ti-szu2 ak-szu-ud
631. {iri}bu-bi-lu _iri lugal_-ti-szu2 ak-szu-ud
632. {iri}ka-bi-in-ak _iri lugal_-ti-szu2 ak-szu-ud
633. ina tukul-ti an-szar2 u {d}1(u)-5(disz) ar-de-e-ma al-lik
634. _edin_ {disz}um-man-al-da-si _man_ {kur}elam-ma{ki}
635. sza la ik-nu-sza2 a-na _{gesz}szudun_-ia
636. ina me-ti-iq ger-ri-ia
637. {iri}bad3-{disz}un-da-si _iri lugal_-ti-szu2 _kur_-ud
638. _erin2-hi-a_-ia {i7}id-id-e a-gu-u szam-ru
639. e-mu-ru ip-la-hu a-na ne2-ba-ar-te
640. {d}1(u)-5(disz) a-szi-bat {iri}limmu2-dingir ina szat mu-szi
641. a-na _erin2-hi-a_-ia _masz2-ge6_ u2-szab-ri-ma
642. ki-a-am iq-bi-szu-nu-ti
643. um-ma a-na-ku al-lak ina ma-har {disz}an-szar2-du3-a
644. _lugal_ sza2 ib-na-a _szu-min_-a-a
645. e-li _masz2-ge6_ an-ni-ti _erin2-hi-a_-ia ir-hu-s,u
646. {i7}id-id-e e-bi-ru szal-mesz
647. 1(u) 4(disz) _iri-mesz_ mu-szab _lugal_-ti-szu2
648. a-di _iri-mesz tur-mesz_ sza2 ni-i-ba la i-szu-u
649. u3 1(u) 2(disz) na-ge-e sza2 qe2-reb {kur}elam-ma{ki} ka-li-sza2
650. ak-szu-ud ap-pul aq-qur ina {d}gesz-bar aq-mu
651. a-na _du6_ u kar-me u2-ter
652. ina la mi3-ni a-duk qu-ra-de-e-szu2
653. ina _{gesz}tukul-mesz_ u2-ras-sib mun-dah-s,e-e-szu2 _mah-mesz_
654. {disz}um-man-al-da-si _man_ {kur}elam-ma{ki}
655. mi-ra-nu-usz-szu2 in-na-bit-ma is,-ba-ta _kur_-u2
656. {iri}ba-nu-nu a-di na-ge-e sza2 {iri}ta-sa-ar-ra
657. ka-la-mu ak-szu-ud
658. _2(u)-am3 iri-mesz_ ina na-ge-e sza2 {iri}hu-un-nir
659. ina _ugu_ mi3-is,-ri sza2 {iri}hi-da-lu ak-szu-ud
660. {iri}ba-szi-mu u3 _iri-mesz_ sza2 li-me-ti-szu2 ap-pul aq-qur
661. sza _ug3-mesz_ a-szib lib3-bi-szu2-un ka-mar-szu2-nu asz2-kun
662. u2-szab-bir _dingir-mesz_-szu2-un
663. u2-szap-szi-ih ka-bat-ti _en en-en_
664. _dingir-mesz_-szu2 _{d}1(u)-5(disz)-mesz_-szu2 _nig2-szu_-szu2 _nig2-gur11_-szu2
665. _ug3-mesz tur_ u _gal_ asz2-lu-la a-na _kur_ an-szar2{ki}
666. 1(gesz2) _danna_ qaq-qa-ru ina a-mat an-szar2 u {d}1(u)-5(disz)
667. sza u2-ma-'e-e-ru-in-ni
668. qe2-reb {kur}elam-ma{ki} e-ru-ub at-ta-lak szal-t,isz
669. ina ta-a-a-ar-ti-ia sza2 an-szar2 u {d}1(u)-5(disz)
670. u2-sza2-zi-zu-in-ni _edin_ ga-re-ia
671. {iri}szu-sza2-an ma-ha-zu _gal_-u2 mu-szab _dingir-mesz_-szu2-un
672. a-szar pi-risz-ti-szu2-un ak-szu-ud
673. ina a-mat an-szar2 u {d}1(u)-5(disz) qe2-reb _e2-gal-mesz_-szu2
674. e-ru-ub u2-szib ina _hul2-mesz_
675. ap-te-e-ma _e2_ nak-kam-a-ti-szu2-nu
676. sza _ku3-babbar-mesz ku3-sig17-mesz nig2-szu-mesz nig2-ga-mesz_
677. nu-uk-ku-mu qe2-reb-szu2-un
678. sza _lugal-mesz_ {kur}elam-ma{ki} mah-ru-u-ti
679. a-di _lugal-mesz_ sza2 a-di _sza3_ u4-me an-ne2-e
680. u2-pah-hi-ru isz-ku-nu
681. sza _{lu2}kur2_ sza2-nam-ma e-li ia-a-szi
682. _szu-min_-su la u2-bi-lu ina lib3-bi
683. u2-sze-s,a-am-ma szal-la-tisz am-nu
684. _ku3-babbar ku3-sig17 nig2-szu-mesz nig2-ga-mesz_ sza2 _kur eme-gi7_
685. u uri{ki} {kur}kar2-{d}dun-ia2-asz3 ka-la-mu
686. sza _lugal-mesz_ {kur}elam-ma{ki} mah-ru-u-ti
687. a-di 7(disz)-szu2 isz-lu-lu u2-bi-lu qe2-reb {kur}elam-ma{ki}
688. s,a-ri-ru husz-szu-u esz-ma-ru-u eb-bu
689. ni-siq-ti _na4-mesz_ szu-kut-tu2 a-qar-tu2 si-mat _lugal_-ti
690. sza _lugal-mesz kur_ uri{ki} mah-ru-u-ti
691. u3 {disz}{d}gesz-nu11-mu-gi-na a-na kit-ri-szu2-nu
692. ip-szu-ru a-na {kur}elam-ma{ki}
693. lu-bul-tu szu-kut-tu2 si-mat _lugal_-u-ti
694. {gesz}til-li qa-ra-bi si-ma-nu-u2
695. mim-ma e-pesz _me3_ si-mat _szu-min_-szu2
696. u2-nu-ut mut-tab-bil-ti _e2-gal-mesz_-szu2 ka-la-mu
697. sza2 ina muh-hi u2-szi-bu it-ti-lu
698. ina lib3-bi e-ku-lu isz-tu-u ir-mu-ku ip-pa-asz2-szu2
699. _{gesz}gigir-mesz_ {gesz}sza sza2-da-di {gesz}s,u-um-bi
700. sza ih-zu-szi-na s,a-ri-ru za-ha-lu-u
701. _ansze-kur-ra-mesz ansze-kunga-mesz gal-mesz_
702. sza tal-lul-ta-szu2-nu _ku3-sig17 ku3-babbar_
703. asz2-lu-la a-na _kur_ an-szar2{ki}
704. ziq-qur-rat {iri}szu-sza2-an
705. sza ina a-gur2-ri _{na4}za-gin3_ szu-pu-szat ub-bit
706. u2-kap-pi-ra _si-mesz_-sza2 sza pi-tiq _uruda_ nam-ri
707. {d}musz3-szesz2 _dingir_ pi-risz-ti-szu2-un
708. sza asz2-bu ina pu-uz-ra-a-ti
709. sza mam-ma-an la im-ma-ru ep-szet _dingir_-ti-szu2
710. {d}szu-mu-du {d}la-ga-ma-ru
711. {d}pa-ar-ti-ki-ra {d}am-man-ka-si-masz
712. {d}u2-du-ra-an {d}sa-pa-ag
713. sza _lugal-mesz_ {kur}elam-ma{ki}
714. ip-tal-la-hu _dingir_-us-su-un
715. {d}ra-gi-ba {d}su-un_-gam_-sa-ra-a
716. {d}ka-ar-sa {d}ki-ir-sa-ma-as
717. {d}szu-da-nu {d}a-a-pa-ag-si-na
718. {d}bi-la-la {d}pa-ni-in-tim-ri
719. {d}si-la-ga-ra-a {d}na-ab-sa-a
720. {d}na-bir-tu {d}ki-in-da-kar-bu
721. _dingir-mesz {d}1(u)-5(disz)-mesz_ sza2-a-tu-nu
722. it-ti szu-kut-ti-szu2-nu _nig2-gur11_-szu2-nu u2-nu-ti-szu2-nu
723. a-di {lu2}sza2-an-ge-e {lu2}bu-uh-la-le-e
724. asz2-lu-la a-na _kur_ an-szar2{ki}
725. 3(u) 2(disz) _alam-mesz lugal-mesz_
726. pi-tiq _ku3-babbar ku3-sig17 uruda {na4}gesz-nu-gal_
727. ul-tu qe2-reb {iri}szu-sza2-an
728. {iri}ma-dak-tu {iri}hu-ra-di
729. a-di _alam_ {disz}um-man-i-gasz _dumu_ {disz}um-ba-da-ra-a
730. _alam_ {disz}isz-tar-na-an-hu-un-di
731. _alam_ {disz}hal-lu-si
732. _alam_ {disz}tam-ma-ri-tu _egir_-u2
733. sza ina qi2-bit an-szar2 u {d}1(u)-5(disz) e-pu-szu2 _ARAD_-u-ti
734. al-qa-a a-na _kur_ an-szar2{ki}
735. ad-ka-a _{d}alad-mesz {d}lamma-mesz_
736. _en-nun-mesz_ szu-ut e2-kur ma-la ba-szu2-u2
737. u2-na-as-si-ha _am-mesz_ na-ad-ru-u-ti
738. si-mat _ka2-mesz_-ni
739. esz-re-e-ti {kur}elam-ma{ki}
740. a-di la ba-sze-e u2-szal-pit
741. _dingir-mesz_-szu2 _{d}1(u)-5(disz)-mesz_-szu2 am-na-a a-na za-qi2-qi2
742. _{gesz}tir-mesz_-szu2-nu pa-az-ra-a-ti
743. sza mam2-ma a-hu-u la u2-szar-ru ina lib3-bi
744. la i-kab-ba-su i-ta-szi-in
745. _{lu2}erin2-mesz me3_-ia qe2-reb-szin e-ru-bu
746. e-mu-ru pu-uz-ra-szin iq-mu-u ina {d}gesz-bar
747. ki-mah-hi _lugal-mesz_-szu2-nu mah-ru-u-ti _egir-mesz_
748. la pa-li-hu-u-ti an-szar2 u {d}1(u)-5(disz) _en-mesz_-ia
749. mu-nar-ri-t,u _lugal-mesz ad-mesz_-ia
750. ap-pul aq-qur u2-kal-lim _{d}utu_-szi
751. _giri3-pad-ra2-mesz_-szu2-nu al-qa-a a-na _kur_ an-szar2{ki}
752. e-t,em2-me-szu2-nu la s,a-la-lu e-mi3-id
753. ki-is-pi na-aq _a-mesz_ u2-za-am-me-szu2-nu-ti
754. ma-lak _iti_ 2(u) 5(disz) _u4-mesz_
755. na-ge-e {kur}elam-ma{ki} u2-szah-rib
756. _mun {u2}zag-hi-li{sar}_
757. u2-sap-pi-ha _edin_-usz-szu2-un
758. _dumu-munus-mesz lugal-mesz nin9-mesz lugal-mesz_
759. a-di qi-in-ni mah-ri-ti u _egir_-ti
760. sza _lugal-mesz_ {kur}elam-ma{ki}
761. {lu2}qe2-pa-a-ni {lu2}ha-za-na-a-ti
762. sza _iri-mesz_ sza2-a-tu-nu ma-la ak-szu-du
763. _{lu2}gal {gesz}pan-mesz {lu2}gar-nu-mesz_
764. {lu2}mu-kil _{kusz}pa-mesz_ {lu2}_3(disz)-u5-mesz_
765. {lu2}sza2 pet2-hal_-li-mesz {lu2}erin2-mesz {gesz}pan_
766. _{lu2}sag-mesz_ {lu2}kit-kit-tu-u2
767. gi-mir um-ma-ni ma-la ba-szu-u2
768. _ug3-mesz nita_ u _munus tur_ u _gal_
769. _ansze-kur-ra-mesz ansze-kunga-mesz_
770. _ansze-mesz gu4-mesz_ u _u8-udu-hi-a_
771. sza e-li _buru5-hi-a_ ma-a'-du
772. asz2-lu-la a-na _kur_ an-szar2{ki}
773. _sahar-hi-a_ {iri}szu-sza2-an {iri}ma-dak-tu2 {iri}hal-te-ma-asz2
774. u3 si-it-ti ma-ha-zi-szu2-nu
775. e-si-pa al-qa-a a-na _kur_ an-szar2{ki}
776. ina _iti ud-mesz_ {kur}elam-ma{ki}
777. a-na pat, gim-re-e-sza2 as-pu-un
778. ri-gim a-me-lu-ti ki-bi-is _gu4-mesz_ u s,e-e-ni
779. szi-si-it a-la-la _du10-ga_
780. u2-za-am-ma-a _a-gar3-mesz_-szu2
781. _ansze-edin-na-mesz masz-da3-mesz_
782. u2-ma-am _edin_ ma-la ba-szu-u
783. par-ga-nisz u2-szar-bi-s,a qe2-reb-szu2
784. {d}na-na-a sza 1(disz) _lim_ 6(disz) _me 3(u)-am3_ 5(disz) _mu-an-na-mesz_
785. ta-as-bu-szu2 tal-li-ku tu-szi-bu
786. qe2-reb {kur}elam-ma{ki} a-szar la si-ma-te-e-sza2
787. u3 ina u4-me-szu2-ma szi-i u3 _dingir-mesz ad-mesz_-sza2
788. tab-bu-u szu-mi3 a-na be-lut _kur-kur_
789. ta-a-a-rat _dingir_-ti-sza2 tu-szad-gi-la pa-nu-u-a
790. um-ma {disz}an-szar2-du3-a ul-tu2 qe2-reb {kur}elam-ma{ki}
791. lem-ne2-ti u2-sze-s,a-an-ni-ma
792. u2-sze-rab-an-ni qe2-reb e2-an-na
793. a-mat qi2-bit _dingir_-ti-szu2-un
794. sza ul-tu2 _u4-mesz su3-mesz_ iq-bu-u
795. e-nen-na u2-kal-li-mu _ug3-mesz egir-mesz_
796. _szu-min dingir_-ti-sza2 _gal_-ti at-mu-uh
797. har-ra-nu i-szir-tu2 sza2 ul-lu-us, lib3-bi
798. ta-as,-ba-ta a-na e2-an-na
799. ina _{iti}gan u4 1(disz)-kam2_ ina qe2-reb unu{ki} u2-sze-rib-szi-ma
800. ina e2-hi-li-an-na sza2 ta-ram-mu
801. u2-szar-me-szi _bara2_ da-ra-a-ti
802. _ug3-mesz_ u3 szal-lat {kur}elam-ma{ki}
803. sza ina qi2-bit an-szar2 {d}sin {d}utu {d}iszkur
804. {d}en {d}ag {d}1(u)-5(disz) sza2 nina{ki} {d}gaszan-kid-mu-ri
805. {d}1(u)-5(disz) sza2 {iri}limmu2-dingir {d}masz {d}u-gur {d}nusku ah-bu-ta
806. re-sze-e-ti a-na _dingir-mesz_-ia asz2-ruk
807. _{lu2}erin2-mesz {gesz}pan_ {gesz}a-ri-ti
808. {lu2}um-ma-ni {lu2}kit-kit-tu-u
809. sza asz2-lu-la ul-tu2 qe2-reb {kur}elam-ma{ki}
810. e-li ki-s,ir _lugal_-ti-ia u2-rad-di
811. si-it-tu-ti a-na ma-ha-zi szu-bat _dingir-mesz gal-mesz_
812. _{lu2}nam-mesz_-ia _gal-mesz_-ia gi-mir _karasz_-ia
813. ki-ma s,e-e-ni u2-za-'i-iz
814. {disz}um-man-al-dasz _man_ {kur}elam-ma{ki}
815. sza szu-usz-mur _{gesz}tukul-mesz_ an-szar2 u {d}1(u)-5(disz)
816. dan-nu-u2-ti e-mu-ru
817. ul-tu2 _kur_-e a-szar mar-qi2-ti-szu2 i-tu-ram-ma
818. qe2-reb {iri}ma-dak-tu2 _iri_ sza2 ina qi2-bit an-szar2 u {d}1(u)-5(disz)
819. ap-pu-lu aq-qu-ru asz2-lu-lu szal-lat-su
820. e-ru-ub u2-szib ina si-pit-ti a-szar ki-hul-le-e
821. szu-ut {disz}{d}ag-en-mu-mesz
822. _dumu dumu {disz}{d}marduk-a-szum2-na_
823. sza ina a-de-ia ih-t,u-u2
824. is,-lu-u2 _{gesz}szudun en_-ti-ia
825. sza _lugal-mesz_ {kur}elam-ma{ki}
826. a-na dan-nu-ti-szu2 isz-ku-nu
827. it-tak-lu a-na {disz}um-man-i-gasz {disz}tam-ma-ri-tu2
828. {disz}in-da-bi-bi {disz}um-man-al-dasz
829. _lugal-mesz_ sza2 e-pu-szu2 be-lut {kur}elam-ma{ki}
830. _{lu2}a kin_-ia szu-ut sze-bul {disz}{d}muati-en-mu-mesz
831. ina ma-le-e lib-ba-a-ti
832. u2-ma-'e-er _edin_ {disz}um-man-al-dasz
833. {disz}{d}muati-en-mu-mesz _dumu dumu_ {disz}{d}marduk-a-asz
834. a-lak _{lu2}a kin_-ia sza2 qe2-reb {kur}elam-ma{ki}
835. e-ru-bu isz-me-e-ma
836. ik-ku-ud lib3-ba-szu2 ir-sza2-a na-kut-tu
837. na-pisz-ta-szu2 pa-nu-usz-szu2 ul e-qir-ma
838. ih-szu-ha mi-tu-tu
839. a-na {lu2}ki-ze-e ra-ma-ni-szu2 iq-bi-ma
840. um-ma ra-si-ban-ni ina _{gesz}tukul_
841. szu-u {lu2}ki-zu-szu2 ina _gir2 an-bar_ szib-bi-szu2-nu
842. up-ta-at-te-hu a-ha-mesz
843. {disz}um-man-al-dasz ip-lah3-ma
844. _adda {disz}{d}muati-en-mu-mesz_ szu-a-tu2
845. ina _mun_ usz-ni-il-ma
846. a-di _sag-du {lu2}ki-zu_-szu2
847. sza u2-ra-si-bu-szu2 ina _{gesz}tukul_
848. a-na _{lu2}a kin_-ia id-din-ma
849. u2-sze-bi-la-asz2-szu2 a-di mah-ri-ia
850. _adda_-szu2 a-a-din a-na qe2-be2-ri
851. _ugu_ sza2 mah-ri mi-tu-us-su ut-tir-ma
852. _sag-du_-su ak-kis ina _gu2 {disz}{d}muati-szu-min_-s,a-bat
853. {lu2}{d}sin-ma-gir {disz}{d}gesz-nu11-mu-gi-na
854. _szesz_ nak-ri sza2 it-ti-szu2
855. a-na szum-ku-ri {kur}elam-ma{ki} il-li-ku a-lul
856. {disz}pa-'e-e sza2 me2-eh-ret {disz}um-man-al-dasz
857. e-pu-szu be-lut {kur}elam-ma{ki}
858. na-mur-rat _{gesz}tukul-mesz_ an-szar2 u {d}1(u)-5(disz) ez-zu-ti
859. sza 1(disz)-szu2 2(disz)-szu2 3(disz)-szu2 it-bu-ku _ugu_ {kur}elam-ma{ki}
860. ih-su-us-ma ir-sza2-a hi-ip lib3-bi
861. ul-tu2 qe2-reb {kur}elam-ma{ki} in-nab-tam-ma
862. is,-ba-ta _giri3-min lugal_-ti-ia
863. _ug3-mesz_ mul-tah-t,e sza {iri}e2-{disz}im-bi-i
864. {iri}ku-zur-te-e-in {iri}bad3-lugal
865. {iri}ma-su-tu {iri}bu-be2-e
866. {iri}e2-{disz}un-za-a-a {iri}e2-{disz}ar-ra-bi
867. {iri}ib-rat {iri}an-za-gar3-sza-{disz}ta-pa-pa
868. {iri}ak-bar-i-na {iri}gur-u2-ki-ir-ra
869. {iri}du-un-nu-{d}sza2-masz {iri}ha-ma-nu
870. {iri}ka-ni-s,u {iri}ar-an-zi-a-sze
871. {iri}na-qi2-da-a-te {iri}dim-tu2-sza2-{disz}si-ma-me
872. {iri}e2-{disz}qa-ta-at-ti {iri}sza-{disz}ki-sa-a-a
873. {iri}su-ba-he-e {iri}du6-hu-um-ba
874. sza ina ger-ri-ia mah-re-e
875. sza la-pa-an _{gesz}tukul-mesz_ an-szar2 u {d}1(u)-5(disz)
876. dan-nu-u2-ti in-nab-tu
877. is,-ba-tu {iri}sa-al-ad-ri _kur_-u2 mar-s,u
878. _ug3-mesz_ sza2-a-tu2-nu sza2 {iri}sa-al-ad-ri _kur_-u2
879. isz-ku-nu a-na dan-nu-ti-szu2-un
880. nam-ri-ri an-szar2 u {d}1(u)-5(disz) _en-mesz_-ia
881. is-hu-up-szu-nu-ti
882. ul-tu _kur_-e a-szar mar-qi2-ti-szu2-un
883. in-nab-tu-nim-ma is,-ba-tu2 _giri3-min_-ia
884. a-na _{gesz}pan_ ak-s,ur-szu2-nu-ti
885. _ugu_ ki-s,ir _lugal_-ti-ia
886. sza u2-mal-lu-u _szu-min_-u-a u2-rad-di
887. ina 9(disz)-e ger-ri-ia ad-ke _erin2-hi-a_-ia
888. _edin_ {disz}u2-a-a-te-e' _man_ {kur}a-ri-bi
889. usz-te-esz-sze-ra har-ra-nu
890. sza ina a-de-ia ih-t,u-u2
891. _mun_ e-pu-szu-usz la is,-s,ur-u2-ma
892. is,-la-a _{gesz}szudun en_-ti-ia
893. sza an-szar2 e-mi3-du-usz i-szu-t,u ab-sza2-a-ni
894. a-na sza2-al szul-mi3-ia _giri3-min_-szu2 ip-ru-us-ma
895. ik-la-a ta-mar-ti man-da-ta-szu2 ka-bit-tu2
896. ki-i {kur}elam-ma{ki}-ma da-bab sur-ra-a-te
897. _kur_ uri{ki} isz-me-e-ma
898. la is,-s,u-ra a-de-ia
899. ia-a-ti {disz}an-szar2-du3-a _sanga ku3_
900. re-e-szu2 mut-nen-nu-u2
901. bi-nu-ut _szu-min_ an-szar2 u2-masz-szir-an-ni-ma
902. a-na {disz}a-bi-ia-te-e' {disz}a-a-mu _dumu_ {disz}te-e-ri
903. e-mu-qi2 id-din-szu-nu-ti
904. a-na re-s,u-tu {disz}{d}gesz-nu11-mu-gi-na
905. _szesz_ nak-ri isz-pur-am-ma
906. isz-ta-kan pi-i-szu2
907. _ug3-mesz_ {kur}a-ri-bi it-ti-szu2 u2-szam-kir2-ma
908. ih-ta-nab-ba-ta hu-bu-ut _ug3-mesz_
909. sza an-szar2 {d}1(u)-5(disz) u _dingir-mesz gal-mesz_
910. id-din-u-ni _sipa_-si-na e-pe-szi
911. u3 u2-mal-lu-u2 _szu-min_-u-a
912. ina qi2-bit an-szar2 u {d}1(u)-5(disz) _erin2-hi-a_-ia
913. ina gi-ra-a {iri}a-za-ar_-dingir_
914. {iri}hi-ra-ta-a-qa-s,a-a-a ina {iri}u2-du-me
915. ina ne2-reb {iri}ia-ab-ru-du ina {iri}e2-{disz}am-ma-ni
916. ina na-ge-e sza2 {iri}ha-u2-ri-i-na
917. ina {iri}mu-'a-a-ba ina {iri}sa-'a-ar-ri
918. ina {iri}ha-ar-ge-e ina na-ge-e
919. sza {iri}s,u-bi-ti di-ik-ta-szu2
920. ma-'a-at-tu a-duk
921. ina la mi3-ni asz2-kun _bad5-bad5_-szu2
922. _ug3-mesz_ {kur}a-ri-bi ma-la it-ti-szu2 it-bu-u-ni
923. u2-ra-as-sib ina _{gesz}tukul-mesz_
924. u3 szu-u2 la-pa-an _{gesz}tukul-mesz_ an-szar2 dan-nu-ti
925. ip-par-szid-ma in-na-bit a-na ru-qe2-e-ti
926. _e2 edin_ kul-ta-ra-a-te mu-sza2-bi-szu2-nu
927. _izi_ u2-sza2-hi-zu iq-mu-u ina {d}gesz-bar
928. {disz}u2-a-a-te-e' ma-ru-usz-tu2 im-hur-szu2-u-ma
929. e-disz-szi-szu2 in-na-bit a-na {kur}na-ba-a-a-te
930. {disz}u2-a-a-te-e' _dumu_ {disz}ha-za_-dingir_
931. _dumu szesz ad_ sza2 {disz}u2-a-a-te-e' _dumu_ {disz}bir-{d}iszkur
932. sza ra-man-szu2 isz-ku-nu
933. a-na _lugal_-u-ti {kur}a-ri-bi
934. an-szar2 _lugal dingir-mesz kur_-u2 _gal_-u2
935. t,e3-en-szu2 u2-sza2-an-ni-ma
936. il-li-ka a-di mah-ri-ia
937. a-na kul-lum ta-nit-ti an-szar2
938. u3 _dingir-mesz gal-mesz en-mesz_-ia
939. an-nu kab-tu e-mid-su-ma
940. {gesz}szi-ga-ru asz2-kun-szu-ma
941. it-ti a-si _ur-gi7_ ar-ku-us-szu2-ma
942. u2-sza2-an-s,ir-szu2 _abul muru2_ {iri}nina{ki}
943. ne2-reb mas-naq-ti ad-na-a-ti
944. u3 szu-u {disz}am-mu-la-di _man_ {kur}qe2-ed-ri
945. it-ba-am-ma a-na mit-hu-s,i _lugal-mesz kur_ mar-tu{ki}
946. sza an-szar2 {d}1(u)-5(disz) u _dingir-mesz gal-mesz_
947. u2-szad-gi-lu pa-nu-u-a
948. ina tukul-ti an-szar2 {d}sin {d}utu {d}iszkur
949. {d}en {d}ag {d}1(u)-5(disz) sza2 nina{ki}
950. {d}gaszan-kid-mu-ri {d}1(u)-5(disz) sza2 {iri}limmu2-dingir
951. {d}masz {d}u-gur {d}nusku
952. _bad5-bad5_-szu2 asz2-kun
953. sza2-a-szu2 bal-t,u-us-su it-ti {munus}a-di-ia-a
954. _dam_ {disz}u2-a-a-te-e' _man_ {kur}a-ri-bi
955. is,-ba-tu-nim-ma u2-bil-u-ni a-di mah-ri-ia
956. ina qi2-bit _dingir-mesz gal-mesz en-mesz_-ia
957. ul-li _ur-gi7_ asz2-kun-szu2-ma
958. u2-sza2-an-s,ir-szu2 {gesz}szi-ga-ru
959. ina qi2-bit an-szar2 {d}1(u)-5(disz) u _dingir-mesz gal-mesz en-mesz_-ia
960. sza {disz}a-bi-ia-te-e' {disz}a-a-mu _dumu_ {disz}te-e'-ri
961. sza a-na re-s,u-tu {disz}{d}gesz-nu11-mu-gi-na
962. a-na e-reb babila2{ki} il-li-ku
963. re-s,e-e-szu2 a-duk _bad5-bad5_-szu2 asz2-kun
964. si-it-tu-ti sza2 qe2-reb babila2{ki} e-ru-bu
965. ina su-un-qi2 hu-szah-hi
966. e-ku-lu _uzu_ a-ha-mesz
967. a-na szu-zu-ub _zi_-ti3-szu2-nu
968. ul-tu2 qe2-reb babila2{ki} u2-s,u-nim-ma
969. e-mu-qi2-ia sza2 ina _ugu {disz}{d}gesz-nu11-mu-gi-na_ szak-nu
970. sza2-ni-ia-a-nu _bad5-bad5_-szu2 isz-ku-nu-ma
971. szu-u2 e-disz ip-par-szid-ma
972. a-na szu-zu-ub _zi_-ti3-szu2 is,-ba-tu2 _giri3-min_-ia
973. re-e-mu ar-szi-szu-u-ma
974. a-de-e ni-isz _dingir-mesz gal-mesz_ u2-sza2-az-kir2-szu2-ma
975. ku-um {disz}u2-a-a-te-e' _dumu_ {disz}ha-za_-dingir_
976. a-na _lugal_-u-ti {kur}a-ri-bi asz2-kun-szu2
977. u3 szu-u it-ti {kur}na-ba-a-a-ta-a-a
978. pi-i-szu2 isz-kun-ma
979. ni-isz _dingir-mesz gal-mesz_ la ip-lah3-ma
980. ih-tab-ba-ta hu-bu-ut mi-s,ir _kur_-ia
981. ina tukul-ti an-szar2 {d}sin {d}utu {d}iszkur
982. {d}en {d}ag {d}1(u)-5(disz) sza2 nina{ki}
983. {d}szar-rat-kid-mu-ri {d}1(u)-5(disz) sza2 {iri}limmu2-dingir
984. {d}masz {d}u-gur {d}nusku
985. {disz}na-at-nu _man_ {kur}na-ba-a-a-ti
986. sza a-szar-szu2 ru-u2-qu
987. sza {disz}u2-a-a-te-e' ina mah-ri-szu2 in-nab-tu
988. isz-me-ma da-na-an an-szar2 sza2 u2-tak-kil-an-ni
989. sza ma-te-e-ma a-na _lugal-mesz ad-mesz_-ia
990. _{lu2}a kin_-szu2 la isz-pu-ra
991. la isz-a-lu szu-lum _lugal_-ti-szu2-un
992. ina pu-luh-ti _{gesz}tukul-mesz_ an-szar2 ka-szi-du-u-ti
993. is-sa-an-qa-am-ma isz-a-la szu-lum _lugal_-ti-ia
994. u3 {disz}a-bi-ia-te-e' _dumu_ {disz}te-e'-ri
995. la ha-sis t,a-ab-ti
996. la na-s,ir ma-mit _dingir-mesz gal-mesz_
997. da-bab sur-ra-a-te it-ti-ia id-bu-ub-ma
998. pi-i-szu2 it-ti {disz}na-at-ni
999. _lugal_ {kur}na-ba-a-a-ti isz-kun-ma
1000. e-mu-qi2-szu2-nu id-ku-u-ni
1001. a-na ti-ib _hul_-tim a-na mi-s,ir-ia
1002. ina qi2-bit an-szar2 {d}sin {d}utu {d}iszkur
1003. {d}en {d}ag {d}1(u)-5(disz) sza2 nina{ki}
1004. {d}szar-rat-kid-mu-ri {d}1(u)-5(disz) sza2 limmu2-dingir{ki}
1005. {d}masz {d}u-gur {d}nusku
1006. _erin2-hi-a_-ia ad-ke _edin_ {disz}a-bi-ia-te-e'
1007. usz-te-esz-sze-ra har-ra-nu
1008. {i7}idigna u {i7}buranun{ki}
1009. ina _illu_-szi-na gap-szi szal-mesz lu-u e-bi-ru
1010. ir-du-u2 ur-hi ru-qu-u-ti
1011. e-tel-lu-u2 hur-sza2-a-ni sza2-qu-u-ti
1012. ih-tal-lu-pu _{gesz}tir-mesz_ sza2 s,u-lul-szi-na rap-szu2
1013. bi-rit _gesz-mesz gal-mesz_ gi-is,-s,i
1014. _{gesz}gesztin-gir2-mesz_ har-ra-an {gesz}ed-de-ti
1015. e-te-et-ti-qu szal-mi3-isz
1016. mad-bar a-szar s,u-um-me lap-lap-ti
1017. sza _muszen an_-e la i-sza2-'u-u qe2-reb-szu2
1018. _ansze-edin-na-mesz masz-da3-mesz_
1019. la ir-te-'u-u2 ina lib3-bi
1020. 1(disz) _me danna_ qaq-qa-ru _ta_ nina{ki}
1021. _iri_ na-ram {d}isz-tar hi-rat {d}en-lil2
1022. _egir_ {disz}u2-a-a-te-e' _man_ {kur}a-ri-bi
1023. u3 {disz}a-bi-ia-te-e' sza2 it-ti e-mu-qi2
1024. {kur}na-ba-a-a-ti-a-a il-li-ka
1025. ir-du-u il-li-ku ina _{iti}sig4 iti_ {d}sin
1026. _dumu_ resz-tu-u a-sza2-re-du sza2 {d}en-lil2
1027. _u4 2(u) 5(disz)-kam_ sza2-da-hu sza2 {d}be-let-babila2{ki}
1028. ka-bit-ti _dingir-mesz gal-mesz_
1029. ul-tu2 {iri}ha-da-at-ta-a at-tu-musz
1030. ina {iri}la-ri-ib-da _e2 bad3_ sza2 _na4-mesz_
1031. ina _ugu_ gu-ub-ba-a-ni sza2 _a-mesz_
1032. at-ta-ad-di usz-man-ni
1033. _erin2-hi-a_-ia _a-mesz_ a-na masz-ti-ti-szu2-nu ih-bu-ma
1034. ir-du-u2 il-li-ku
1035. qaq-qar s,u-um-me a-szar lap-lap-ti
1036. a-di {iri}hu-ra-ri-na bi-rit {iri}ia-ar-ki
1037. u3 {iri}a-za-al-la ina mad-bar asz2-ru ru-u-qu
1038. a-szar u2-ma-am _edin_ la ib-ba-szu-u
1039. u3 _muszen an_-e la i-szak-ka-nu qin-nu
1040. _bad5-bad5_ {lu2}i-sa-am-me-e'
1041. _{lu2}gesz-da_ sza2 {d}a-tar-sa-ma-a-a-in
1042. u3 {kur}na-ba-a-a-ta-a-a asz2-kun
1043. _ug3-mesz ansze-mesz ansze-a-ab-ba-mesz_ u _u8-udu-hi-a_
1044. hu-bu-us-su-nu ina la mi3-ni ah-bu-ta
1045. 8(disz) _danna_ qaq-qa-ru
1046. _erin2-hi-a_-ia lu it-tal-la-ku szal-t,isz
1047. szal-mi3-isz lu i-tu-ru-nim-ma
1048. ina {iri}a-za-al-li lu isz-tu-u _a-mesz_ nesz-be2-e
1049. _ta_ lib3-bi {iri}a-za-al-la
1050. a-di {iri}qu-ra-s,i-ti
1051. 6(disz) _danna_ qaq-qa-ru a-szar s,u-um-me
1052. lap-lap-ti ir-du-u il-li-ku
1053. {lu2}a'-lu sza2 {d}a-tar-sa-ma-a-a-in
1054. u3 {lu2}qid-ra-a-a sza2 {disz}u2-a-a-te-e'
1055. _dumu_ {disz}bir-{d}iszkur _man_ {kur}a-ri-bi al-me
1056. _dingir-mesz_-szu2 _ama_-szu2 _nin9-mesz_-szu2 _dam_-su
1057. qin-nu-szu2 _ug3-mesz_ {kur}qe2-ed-ri ka-la-mu
1058. _ansze-mesz ansze-a-ab-ba-mesz_ u s,e-e-ni
1059. ma-la ina tukul-ti an-szar2 u {d}1(u)-5(disz)
1060. _en-mesz_-ia ik-szu-da _szu-min_-a-a
1061. har-ra-an {kur}di-masz-qa u2-sza2-asz2-ki-na sze-pu-usz-szu2-un
1062. ina _{iti}ne iti mul-pan_
1063. ma-rat {d}sin qa-rit-tu
1064. _u4 3(disz)-kam_ nu-bat-tu2 sza2 _lugal dingir-mesz_ {d}marduk
1065. ul-tu2 {iri}di-masz-qa at-tu-musz
1066. 6(disz) _danna_ qaq-qa-ru mu-szi-tu ka-la-sza2
1067. ar-de-e-ma al-lik a-di {iri}hul-hu-li-ti
1068. ina {kur}hu-uk-ri-na _kur_-u2 mar-s,u
1069. {lu2}a'-lu sza2 {disz}a-bi-ia-te-e' _dumu_ {disz}te-e'-ri
1070. {kur}qid-ra-a-a ak-szu-ud
1071. _bad5-bad5_-szu2 asz2-kun asz2-lu-la szal-lat-su
1072. {disz}a-bi-ia-te-e' {disz}a-a-am-mu
1073. ina qi2-bit an-szar2 u {d}1(u)-5(disz) _en-mesz_-ia
1074. ina _muru2_ tam-ha-ri bal-t,u-us-su-un u2-s,ab-bit ina _szu-min_
1075. _szu-min_ u _giri3-min_ bi-re-tu2 _an-bar_ ad-di-szu2-nu-ti
1076. it-ti szal-lat _kur_-szu2-un
1077. al-qa-asz2-szu2-nu-ti a-na _kur_ an-szar2{ki}
1078. mun-nab-ti sza2 la-pa-an _{gesz}tukul-mesz_-ia in-nab-tu
1079. ip-la-hu is,-ba-tu2 {kur}hu-uk-ku-ru-na _kur_-u2 mar-s,u
1080. ina {iri}ma-an-ha-ab-bi {iri}ap-pa-ru
1081. {iri}te-nu-qu-ri {iri}s,a-a-a-u2-ra-an
1082. {iri}mar-qa-na-a {iri}sa-ra-te-in
1083. {iri}en-zi-kar-me {iri}ta-a'-na-a {iri}sa-ra-a-qa
1084. a-szar kup-pi nam-ba-'i sza2 _a-mesz_ ma-la ba-szu2-u
1085. _en-nun-mesz_ ina muh-hi u2-sza2-an-s,ir-ma
1086. _a-mesz ti-la zi_-ti3-szu2-nu ak-la
1087. masz-ti-tu u2-sza2-qir a-na pi-i-szu2-un
1088. ina s,u-um-me lap-lap-ti isz-ku-nu na-pisz-tu2
1089. si-it-tu-u-ti _ansze-gam-mal-mesz_ ru-ku-pi-szu2-nu u2-szal-li-qu
1090. a-na s,u-um-me-szu2-nu isz-ta-at-tu-u _usz2-mesz_ u _a-mesz_ par-szu2
1091. sza qe2-reb _kur_-e e-lu-u2
1092. e-ru-bu e-hu-zu mar-qi2-tu
1093. e-du ul ip-par-szid mul-tah-t,u ul u2-s,i ina _szu-min_-ia
1094. a-szar mar-qi2-ti-szu2-nu _szu-min_ ik-szu-us-su-nu-ti
1095. _ug3-mesz nita_ u _munus ansze-mesz ansze-a-ab-ba-mesz gu4-mesz_ u s,e-e-ni
1096. ina la mi3-ni asz2-lu-la a-na _kur_ an-szar2{ki}
1097. nap-har _kur_-ia sza2 an-szar2 id-di-na ka-la-mu
1098. a-na si-hir-ti-sza2 um-dal-lu-u a-na pat, gim-ri-sza2
1099. _ansze-a-ab-ba-mesz_ ki-ma s,e-e-ni u2-par-ri-is
1100. u2-za-'i-iz a-na _ug3-mesz kur_ an-szar2{ki}
1101. ina qa-bal-ti _kur_-ia _ansze-a-ab-ba-mesz_ ina 1(disz) _gin2_ 1/2(disz) _gin2_ kas-pi
1102. i-szam-mu ina _ka2_ ma-hi-ri
1103. {munus}asz2-tam-mu ina ni-id-ni _{lu2}lunga2_ ina ha-pe-e
1104. _{lu2}nu-{gesz}kiri6_ ina ki-szi-szu2 sza2 _u2-sar_
1105. im-da-na-ha-ru _ansze-a-ab-ba-mesz_ u a-me-lu-tu
1106. {disz}u2-a-a-te-e' a-di _erin2-hi-a_-szu2
1107. sza a-de-ia la is,-s,u-ru
1108. sza la-pa-an _{gesz}tukul-mesz_ an-szar2 _en_-ia
1109. ip-par-szi-du in-nab-tu ma-har {disz}na-at-na
1110. u2-szam-qit-su-nu-ti {d}er3-ra qar-du
1111. su-un-qu ina bi-ri-szu2-nu isz-sza2-kin-ma
1112. a-na bu-ri-szu2-nu e-ku-lu _uzu dumu-mesz_-szu2-nu
1113. ar-ra-a-ti ma-la ina a-de-e-szu2-nu szat,-ra
1114. ina pit-ti i-szi-mu-szu2-nu-ti an-szar2 {d}sin {d}utu
1115. {d}iszkur {d}en {d}ag {d}1(u)-5(disz) sza2 nina{ki}
1116. {d}szar-rat-kid-mu-ri {d}1(u)-5(disz) sza2 limmu2-dingir{ki}
1117. {d}masz {d}u-gur {d}nusku
1118. ba-ak-ru su-hi-ru _{gu4}amar udu-nim_
1119. ina _ugu 7(disz)-ta-am3_ mu-sze-ni-qa-a-te e-ni-qu-u-ma
1120. szi-iz-bu la u2-szab-bu-u ka-ra-sun2
1121. _ug3-mesz_ {kur}a-ri-bi 1(disz)-en a-na 1(disz)-en
1122. isz-ta-'a-a-lu4 a-ha-mesz
1123. ina _ugu_ mi-ne2-e ki-i ep-sze-e-tu2 an-ni-tu2 _hul_-tu2
1124. im-hu-ru {kur}a-ru-bu
1125. um-ma asz2-szu2 a-de-e _gal-mesz_ sza2 an-szar2 la ni-is,-s,u-ru
1126. ni-ih-t,u-u2 ina _mun_ {disz}an-szar2-du3-a
1127. _lugal_ na-ram lib3-bi {d}en-lil2
1128. {d}nin-lil2 ri-im-tu2 _{d}en-lil2-la2_-i-tu
1129. ka-dir-ti i-la-a-ti
1130. sza it-ti {d}a-num {d}en-lil2 szit-lu-t,a-at man-za-zu
1131. u2-na-kip _{lu2}kur2-mesz_-ia ina _si-mesz_-sza2 gasz-ra-a-te
1132. {d}1(u)-5(disz) a-szi-bat {iri}limmu2-dingir
1133. {d}gesz-bar lit-bu-szat me-lam-me na-sza2-a-ta
1134. _ugu_ {kur}a-ri-bi i-za-an-nun nab-li
1135. {d}er3-ra qar-du a-nun-tu ku-us,-s,ur-ma
1136. u2-ra-as-si-pa ga-re-ia
1137. {d}masz szil-ta-hu qar-ra-du _gal_-u _dumu_ {d}en-lil2 ga-asz2-ru
1138. ina us,-s,i-szu2 zaq-ti u2-par-ri-i' _zi_-tim _{lu2}kur2-mesz_-ia
1139. {d}nusku _sukkal_ na-a'-du mu-sza2-pu-u _en_-u-ti
1140. sza ina qi2-bit an-szar2 {d}nin-lil2 qa-rit-tu2 {d}be-let-{iri}limmu2-dingir
1141. _a2-min_-a-a il-lik-ma is,-s,u-ra _lugal_-u-ti
1142. me2-eh-ret _erin2-hi-a_-ia iz-ziz-ma u2-szam-qi2-ta ga-re-ia
1143. ti-bu-ut _{gesz}tukul-mesz_ an-szar2 u {d}1(u)-5(disz)
1144. _dingir-mesz gal-mesz en-mesz_-ia
1145. sza ina e-pesz _me3_ il-li-ku re-s,u-ti
1146. _erin2-hi-a-mesz_ sza {disz}u2-a-a-te-e'
1147. isz-mu-u-ma _ugu_-szu2 ib-bal-ki-tu
1148. szu-u2 ip-lah3-ma
1149. ul-tu _e2_ in-nab-tu u2-s,a-am-ma
1150. ina tukul-ti an-szar2 {d}sin {d}utu {d}iszkur
1151. {d}en {d}ag {d}1(u)-5(disz) sza2 nina{ki}
1152. {d}szar-rat-kid-mu-ri {d}1(u)-5(disz) sza2 {iri}limmu2-dingir
1153. {d}masz {d}u-gur {d}nusku
1154. _szu-min_ ik-szu-us-su-ma
1155. u2-ra-asz2-szu2 a-na _kur_ an-szar2{ki}
1156. ina ni-isz _szu-min_-ia sza2 a-na ka-szad _{lu2}kur2-mesz_-ia
1157. am-da-ha-ru an-szar2 u {d}nin-lil2
1158. ina {gesz}hu-ut-ne2-e ma-sze-ri s,i-bit _szu-min_-ia
1159. _{uzu}me-ze2_-szu2 ap-lu-usz
1160. ina la-ah-szi-szu2 at-ta-di s,er-re-tu2
1161. ul-li _ur-gi7_ ad-di-szu2-ma
1162. ina _abul_ s,i-it _{d}utu_-szi sza2 _muru2_ {iri}nina{ki}
1163. sza ne2-reb mas-naq-ti ad-na-a-te na-bu-u zi-kir-sza2
1164. u2-sza2-an-s,ir-szu2 {gesz}szi-ga-ru
1165. a-na da-lal2 ta-nit-ti an-szar2 {d}1(u)-5(disz)
1166. u3 _dingir-mesz gal-mesz en-mesz_-ia
1167. re-e-mu ar-szi-szu2-ma u2-bal-lit, nap-szat-su
1168. ina ta-a-a-ar-ti-ia {iri}u2-szu-u
1169. sza ina a-hi tam-tim na-da-ta szu-bat-su ak-szu-ud
1170. _ug3-mesz_ {iri}u2-szu-u sza2 a-na _{lu2}nam-mesz_-szu2-nu la sa-an-qu
1171. la i-nam-di-nu man-da-at-tu2
1172. na-dan szat-ti-szu2-un a-duk
1173. ina _sza3 un-mesz_ la kan-szu-u-ti szip-t,u asz2-kun
1174. _dingir-mesz_-szu2-nu _ug3-mesz_-szu2-nu asz2-lu-la a-na _kur_ an-szar2{ki}
1175. _ug3-mesz_ {iri}ak-ku-u la kan-szu-ti a-nir
1176. _adda-mesz_-szu2-nu ina {gesz}ga-szi-szi a-lul
1177. si-hir-ti _iri_ u2-szal-mi
1178. si-it-tu-ti-szu2-nu al-qa-a a-na _kur_ an-szar2{ki}
1179. a-na ki-s,ir ak-s,ur-ma
1180. _ugu erin2-hi-a_-ia ma-a'-da-a-ti
1181. sza an-szar2 i-qi2-sza2 u2-rad-di
1182. {disz}a-a-mu _dumu_ {disz}te-e-ri
1183. it-ti {disz}a-bi-ia-te-e' _szesz_-szu2
1184. i-zi-zu-ma it-ti _erin2-hi-a_-ia e-pu-szu2 _me3_
1185. ina _muru2_ tam-ha-ri bal-t,u-us-su ina _szu-min_ as,-bat
1186. ina nina{ki} _iri en_-ti-ia _kusz_-szu2 asz2-hu-ut,
1187. {disz}um-man-al-dasz _man_ {kur}elam-ma{ki}
1188. sza ul-tu2 ul-la an-szar2 u {d}1(u)-5(disz) _en-mesz_-ia
1189. iq-bu-u2 a-na e-pesz _ARAD_-ti-ia
1190. ina qi2-bit _dingir_-ti-szu2-nu s,ir-tu sza2 la in-nen-nu-u
1191. _egir_-nu _kur_-su _ugu_-szu2 ib-bal-kit-ma
1192. la-pa-an sah-masz-ti _ARAD-mesz_-szu2 sza2 u2-szab-szu2-u _ugu_-szu2
1193. e-disz-szi-szu2 ip-par-szid-ma is,-ba-ta _kur_-u2
1194. ul-tu _kur_-e _e2_ mar-qi2-ti-szu2
1195. a-szar it-ta-nap-rasz-szi-du
1196. ki-ma _sur2-du3{muszen}_ a-bar-szu-ma
1197. bal-t,u-us-su al-qa-asz2-szu2 a-na _kur_ an-szar2{ki}
1198. {disz}tam-ma-ri-tu2 {disz}pa-'e-e {disz}um-man-al-dasz
1199. sza _egir_ a-ha-mesz e-pu-szu be-lut {kur}elam-ma{ki}
1200. sza ina e-mu-qi2 an-szar2 u {d}1(u)-5(disz) _en-mesz_-ia
1201. u2-szak-ni-sza2 a-na _{gesz}szudun_-ia
1202. {disz}u2-a-a-te-e' _man_ {kur}a-ri-bi
1203. sza ina qi2-bit an-szar2 u {d}1(u)-5(disz) _bad5-bad5_-szu2 asz2-ku-nu
1204. ul-tu _kur_-szu2 al-qa-asz2-szu2 a-na _kur_ an-szar2{ki}
1205. ul-tu a-na na-sah _{udu}siskur-mesz_ e-lu-u
1206. ina e2-masz-masz szu-bat _en_-ti-szu2-un
1207. ma-har {d}nin-lil2 _ama dingir-mesz gal-mesz_
1208. hi-ir-tu na-ram-ti an-szar2
1209. e-pu-szu _garza-mesz e2_ a2-ki-it
1210. _{gesz}szudun_ {gesz}sza2 sza2-da-di u2-sza2-as,-bit-su-nu-ti
1211. a-di _ka2_ e2-kur isz-du-du ina _ki-ta_-ia
1212. al-bi-in ap-pi at-ta-'i-id _dingir_-us-su-un
1213. u2-sza2-pa-a dan-nu-us-su-un ina _ukken erin2-hi-a_-ia
1214. sza an-szar2 {d}sin {d}utu {d}iszkur
1215. {d}en {d}ag {d}1(u)-5(disz) sza2 nina{ki}
1216. {d}szar-rat-kid-mu-ri {d}1(u)-5(disz) sza2 limmu2-dingir{ki}
1217. {d}masz {d}u-gur {d}nusku sza2 la kan-szu-ti-ia
1218. u2-szak-ni-szu2 a-na _{gesz}szudun_-ia
1219. ina li-i-ti u3 da-na-a-ni
1220. u2-sza2-zi-zu-in-ni _edin {lu2}kur2-mesz_-ia
1221. {disz}1(u)-5(disz)-bad3 _lugal_ {kur}ur-ar-t,i
1222. sza _lugal-mesz ad-mesz_-szu2 a-na _ad-mesz_-ia
1223. isz-ta-nap-par-u-ni _szesz_-u2-tu2
1224. e-nen-na {disz}1(u)-5(disz)-bad3 da-na-nu ep-sze-e-tu2
1225. sza _dingir-mesz gal-mesz_ i-szi-mu-in-ni isz-me-e-ma
1226. ki-ma sza2 _dumu_ a-na _ad_-szu2 isz-ta-nap-pa-ra _en_-u-tu2
1227. u3 szu-u ki-i pi-i an-nim-ma
1228. isz-ta-nap-pa-ra um-ma lu-u szul-mu
1229. a-na _lugal en_-ia
1230. pal-hi-isz kan-szisz ta-mar-ta-szu2 ka-bit-tu2
1231. usz-ta-ne2-eb-ba-la a-di mah-ri-ia
1232. ina u4-me-szu2 _e2 usz_-u-ti te-ne2-e _e2-gal_ sza2 qe2-reb nina{ki}
1233. _iri_ s,i-i-ru na-ram {d}nin-lil2
1234. sza {disz}{d}sin-pap-mesz-su _man kur_ an-szar2{ki} _ad ad du3_-ia
1235. ud-di-szu a-na mu-szab _lugal_-ti-szu2
1236. _e2 usz_-u-ti szu-a-tu2 ina _hul2-mesz_ ri-sza2-a-ti
1237. la-ba-risz il-lik e-na-ha _e2-gar8-mesz_-szu2
1238. a-na-ku {disz}an-szar2-du3-a _lugal gal lugal_ dan-nu
1239. _lugal_ kisz-sza2-ti _lugal kur_ an-szar2{ki} _lugal_ kib-rat _limmu2_-tim
1240. asz2-szu2 qe2-reb _e2 usz_-u-ti szu-a-tu2 ar-ba-a
1241. an-szar2 {d}sin {d}utu {d}iszkur {d}en {d}ag
1242. {d}1(u)-5(disz) sza2 nina{ki} {d}szar-rat-kid-mu-ri
1243. {d}1(u)-5(disz) sza2 limmu2-dingir{ki} {d}gaszan-garza-mesz {d}masz {d}u-gur {d}nusku
1244. _dumu lugal_-u2-ti is,-s,u-ru
1245. s,u-lul-szu2-nu _du10-ga an-dul3_-la-szu2-nu sza sza2-la-me
1246. it-ru-s,u _ugu_-ia
1247. ul-tu ina _{gesz}gu-za ad du3_-ia u2-szi-bu
1248. e-te-ne2-ep-pu-szu2 be-lut _kur-kur_ u3 _ug3-mesz dagal-mesz_
1249. ka-a-a-an pu-us-su-rat ha-de-e
1250. sza ka-szad _{lu2}kur2-mesz_-ia u2-pa-sa-ru-in-ni qe2-reb-szu2
1251. ina ma-a-a-al mu-szi du-um-mu-qa _masz2-ge6-mesz_-u-a
1252. ina sza sze-e-ri ba-nu-u2 e-ger-ru-u-a
1253. masz-ta-ku szu-a-tu2 mu-szal-li-mu _en-mesz_-szu2 szu-u2-ma
1254. _dingir-mesz gal-mesz_ szi-mat-su i-szi-mu a-na _munus saga_
1255. an-hu-us-su ad-ke
1256. asz2-szu2 ru-up-pu-usz tal-lak-ti-szu2 a-na si-hir-ti-szu2 aq-qur
1257. _5(u)-am3_ ti-ib-ki masz-kan2 szi-kit-ti-szu2
1258. pi-tiq-tu ap-tiq tam-la-a usz-mal-li
1259. la-pa-an esz-re-e-ti _dingir-mesz gal-mesz_
1260. _en-mesz_-ia ap-lah3-ma tam-la-a szu-a-tu2
1261. szi-kit-ta-szu2 ul u2-szaq-qi2 ma-a'-disz
1262. ina _iti du10-ga ud sze-ga edin_ tam-le-e szu-a-tu2
1263. _usz8_-szu2 ad-di u2-kin _sig4_-su
1264. ina _kasz-sag_ u _gesztin_ ka-lak-ka-szu2 ab-{lu}lul
1265. am-ha-s,a szal-la-ar-szu2
1266. ina {gesz}s,u-um_-bi-mesz_ {kur}elam-ma{ki} sza2 ina qi2-bit _dingir-mesz gal-mesz_
1267. _en-mesz_-ia asz2-lu-la
1268. a-na e-pesz _e2_ ri-du-u-ti szu-a-tu2
1269. _ug3-mesz kur_-ia ina lib3-bi i-zab-bi-lu _sig4-hi-a_
1270. _lugal-mesz_ {kur}a-ri-bi sza ina a-de-ia ih-t,u-u
1271. sza ina _muru2_ tam-ha-ri bal-t,u-us-su-nu u2-s,ab-bi-tu2 ina _szu-min_
1272. a-na e-pesz _e2_ ri-du-u-ti szu-a-tu2
1273. {gesz}al-lu tup-szik-ku u2-sza2-asz2-szi-szu2-nu-ti
1274. u2-sza2-az-bi-la ku-dur2-ri
1275. la-bi-in _sig4-hi-a_-szu2 za-bi-lu tup-szik-ki-szu2
1276. ina e-le-li nin-gu-u-ti ub-ba-lu u4-um-szu2-un
1277. ina _hul2-mesz_ ri-sza2-a-te ul-tu2 _usz8_-szu2 a-di gaba-dib-bi-szu2 ar-s,ip
1278. _ugu_ sza2 mah-ri szu-bat-su u2-rap-pisz u2-szar-ri-ha ep-sze-te-e-szu2
1279. _gesz-ur3-mesz {gesz}eren-mah-mesz_ tar-bit {kur}si-ra-ra {kur}lab-na-na
1280. u2-szat-ri-s,a _ugu_-szu2 _{gesz}ig-mesz_ li-ia-a-ri sza2 e-re-si-na _du10-ga_
1281. me-ser _zabar_ u2-rak-kis u2-rat-ta-a _ka2-mesz_-szu2
1282. {gesz}tim-me _mah-mesz uruda_ nam-ru u2-hal-lip-ma
1283. hi-it-ti _ka2 e2_ hi-la-ni-szu2 e-mid
1284. _e2 usz_-u-ti szu-a-tu2 mu-szab _lugal_-ti-ia a-na si-hir-ti-szu2
1285. u2-szak-lil lu-le-e u2-mal-li _{gesz}kiri6-mah_ sza2 gi-mir _gesz-mesz_
1286. _gurun nig2-sa-sa-hi-a_ ka-la-mu az-qu-pa i-ta-te-e-szu2
1287. szi-pir ep-sze-e-te-szu2 ag-mur-ma _{udu}siskur-mesz_ tasz-ri-ih-ti
1288. aq-qa-a a-na _dingir-mesz en-mesz_-ia ina _hul2-mesz_ ri-sza2-a-te u2-szar-ri-szu2
1289. e-ru-ub qe2-reb-szu2 ina za-mar tak-ne2-e a-na _egir ud-mesz_ ina _lugal-mesz_
1290. _dumu-mesz_-ia sza2 an-szar2 u {d}1(u)-5(disz) a-na be-lut _kur_ u _ug3-mesz_ i-nam-bu-u zi-kir-szu2
1291. e-nu-ma _e2 usz_-u-ti szu-a-tu2 i-lab-bi-ru-u-ma in-na-hu
1292. an-hu-us-su lu-ud-disz _mu-sar_-u2 szi-t,ir _mu_-ia _ad_-ia
1293. _ad ad_-ia _numun_ da-ru-u sza2 _lugal_-u-ti li-mur-ma _i3-gesz_ lip-szu-usz
1294. _{udu}siskur bala_-qi2 it-ti _mu-sar_-e szi-t,ir _mu_-szu2 lisz-kun
1295. _dingir-mesz gal-mesz_ ma-la ina _mu-sar_-e an-ne2-e szat,-ru
1296. ki-ma ia-a-ti-ma lisz-ru-ku-usz da-na-nu u li-i-tu2
1297. sza _mu-sar_-u2 szi-t,ir _mu_-ia _ad_-ia _ad ad_-ia ib-ba-tu2
1298. it-ti _mu-sar_-i-szu2 la i-szak-ka-nu
1299. an-szar2 {d}sin {d}utu {d}iszkur {d}en {d}ag {d}1(u)-5(disz) sza2 nina{ki}
1300. {d}szar-rat-kid-mu-ri {d}1(u)-5(disz) sza2 {iri}limmu2-dingir {d}masz {d}u-gur {d}nusku
1301. de-e-ni it-ti ni-bit _mu_-ia li-di-nu-usz