RINAP 5/1 Ashurbanipal 004 composite (P514713)

object composite text
surface a
1. a-na-ku {disz}an-szar2-du3-a _lugal gal lugal_ dan-nu
2. _lugal szu2 lugal kur_ an-szar2{ki} _lugal_ kib-rat _limmu2_-tim
3. s,i-it lib3-bi {disz}an-szar2-pap-asz _lugal kur_ asz-szur{ki}
4. _szagina_ babila2{ki} _lugal kur eme-gi7_ u uri{ki}
5. _sza3-bala-bala_ {disz}{d}sin-pap-mesz-su _lugal szu2 lugal kur_ asz-szur{ki}
6. _dingir-mesz gal-mesz_ ina _ukken_-szu2-nu szi-mat _saga_-tim i-szim-mu szim-ti
7. uz-nu ra-pa-asz2-tu2 isz-ru-ku-u-ni kul-lat t,up-szar-ru-ti u2-sza2-hi-zu
8. ka-ra-szi ina _ukken_ lu-li-me zi-kir _mu_-ia u2-szar-ri-hu
9. u2-szar-bu-u2 _lugal_-u-ti du-un-nu zik-ru-u-tu
10. e-mu-qa-an s,i-ra-a-ti u2-szat-lim-u-ni ma-ta-a-ti
11. la ma-gi-re-ia ina _szu-min_-ia im-nu-u u2-szam-s,u-in-ni
12. ma-la lib3-bi-ia {lu2}sza2-an-gu-ti ih-szu-hu
13. na-dan zi-bi-ia i-t,ib _ugu dingir_-ti-szu2-un
14. esz-ret _dingir-mesz gal-mesz en-mesz_-ia u2-szak-lil
15. u2-szal-bi-sza2 _ku3-sig17 ku3-babbar_ {d}lah3-me anzu{muszen}-mesz
16. tim-me _mah-mesz_ ina _ka2_-szu2-un ul-ziz e2-szar2-ra e2-masz-masz
17. e2-gaszan-kalam-ma e2-hul2-hul2 ki-ma szi-t,ir _an_-e u2-ban-ni
18. mim-ma si-mat e2-kur sza2 _ku3-sig17 ku3-babbar_ e-pu-usz _ugu_ sza2 _lugal-mesz_
19. _ad-mesz_-ia u2-rad-di sat-tuk-ku gi-nu-u2
20. _ugu_ sza2 u4-me ul-lu-u-ti u2-sza2-tir-ma u2-kin
21. asz2-rat _dingir-mesz_ asz2-te-'a-a at-ta-la-ka al-ka-ka-te-szu2-un
22. {d}iszkur _szeg3-mesz_-szu2 u2-masz-sze-ra {d}e2-a u2-pat,-t,i-ra _idim-mesz_-szu2
23. 5(disz) _kusz3 sze-am_ isz-qu ina _ab-sin2_-ni-szu2 e-ri-ik szu-bul-tu2 5/6(disz) _kusz3_
24. _si-sa2 buru14_ na-pa-asz2 {d}nisaba ka-a-a-an u2-szah-na-bu
25. gi-pa-ru s,ip-pa-a-ti szu-um-mu-ha in-bu _masz2-ansze_ szu-te-szur
26. ina ta-lit-ti ina _bala_-ia _he2-nun_ t,uh-du
27. ina _mu-an-na-mesz_-ia ku-um-mu-ru _he2-gal2_-lu
28. 1(u) _ansze sze-pad-mesz_ 1(disz) _ansze gesztin-mesz 2(ban2) i3-mesz_ 1(disz) _gun sig2-mesz_
29. ina nap-har _kur_-ia _ki-lam_ nap-szu2 i-szam-mu ina x x x
30. szat-ti-szam-ma ina t,uh-di u mi-sza2-ri ar-te-'a ba-'u-u2-lat {d}en-lil2
31. ul-tu2 tam-tim e-liti a-di tam-tim szap-liti a?-bel-ma?
32. _lugal-mesz_ s,i-it _{d}utu_-szi u e-reb _{d}utu_-szi
33. isz-szu2-u-ni _gun_-su-nu ka-bit-tu2 _ug3-mesz muru2_ tam-tim
34. a-szib szad-de-e sza2-qu-te u2-szak-ni-sza2 a-na _{gesz}szudun_-ia
35. ina qi2-bit an-szar2 u {d}1(u)-5(disz) _lugal-mesz_ a-szib pa-rak-ki u2-na-asz2-sza2-qu
36. _giri3-min_-ia mal-ki _gal-mesz_ sza2 s,i-tasz u szi-la-an
37. a-na kit-ri-szu2-nu u2-pa-qu-u-ni
38. i-na mah-re-e ger-ri-ia a-na {kur}ma2-kan u3 {kur}me-luh-ha
39. lu-u al-lik {disz}tar-qu-u _man_ {kur}mu-s,ur u {kur}ku-u-si sza {disz}an-szar2-pap-asz
40. _man kur_ an-szar2{ki} _ad_ ba-nu-u-a _bad5-bad5_-szu2 isz-ku-nu i-be-lu _kur_-su
41. da-na-an an-szar2 {d}1(u)-5(disz) u _dingir-mesz gal-mesz en-mesz_-ia
42. im-szi-ma it-ta-kil a-na t,e3-em ra-ma-ni-szu2
43. _ugu lugal-mesz_ {lu2}qe-pa-a-ni sza2 qe2-reb {kur}mu-s,ur
44. u2-pa-qi2-du _ad_ ba-nu-u-a a-na da-a-ki ha-ba-a-ti
45. u e-kem {kur}mu-s,ur il-li-ka _edin_-usz-szu2-un
46. e-ru-um-ma u2-szib qe2-reb {iri}me-em-pi
47. _iri_ sza _ad_ ba-nu-u-a ik-szu-du a-na mi-s,ir _kur_-szu2
48. u2-ter-ru al-la-ku ha-an-t,u ina qe2-reb nina{ki}
49. il-li-kam-ma u2-sza2-an-na-a ia-a-ti _ugu_ ep-sze-e-ti
50. an-na-a-ti lib3-bi i-gug-ma is,-s,a-ru-uh ka-bat-ti
51. ad-ke-e-ma {lu2}e-mu-qi-ia _mah-mesz_ sza an-szar2 u {d}1(u)-5(disz)
52. u2-mal-lu-u qa-tu-u-a a-na na-ra-ru-ti ha-mat
53. sza _lugal-mesz_ {lu2}qe-pa-a-ni sza qe2-reb {kur}mu-s,ur _ARAD-mesz_
54. da-gil2 pa-ni-ia ur-ru-hi-isz ar-de-e-ma al-lik
55. a-di {iri}kar-ba-ni-ti {disz}tar-qu-u2 _man_ {kur}mu-s,ur u {kur}ku-u-si
56. qe2-reb {iri}me-em-pi a-lak ger-ri-ia isz-me-ma
57. a-na e-pesz _muru2 {gesz}tukul-mesz me3_ a-na mah-ri-ia
58. id-ka-a _erin2-mesz me3_-szu2 ina tu-kul-ti an-szar2 {d}en {d}ag
59. _dingir-mesz gal-mesz en-mesz_-ia a-li-kut _a2-min_-ia ina _me3 edin_ rap-szi
60. asz2-ku-na _bad5-bad5 erin2-hi-a_-szu2 {disz}tar-qu-u2 ina qe2-reb {iri}me-em-pi
61. isz-ma-a tah-te-e _erin2-hi-a_-szu2 nam-ri-ri an-szar2 {d}1(u)-5(disz)
62. is-hu-pu-szu-ma il-li-ka mah-hu-tisz2 me2-lam-me _lugal_-ti-ia
63. ik-tu-mu-szu2-ma sza2 u2-za-'i-i-nu-u-ni _dingir-mesz_ szu-ut _an ki_
64. {iri}me-em-pi u2-masz-szir-ma ana szu-zu-ub _zi_-ti3-szu2
65. in-na-bit a-na qe2-reb {iri}ni-i' _iri_ szu-a-tu
66. as,-bat _erin2-hi-a-mesz_-ia u2-sze-rib u2-sze-szib ina lib3-bi
67. _lugal-mesz {lu2}nam-mesz_ sza2 qe2-reb {kur}mu-s,ur u2-pa-qi2-du
68. _ad_ ba-nu-u-a sza la-pa-an ti-bu-ut {disz}tar-qu-u
69. pi-qit-ta-szu2-un u2-masz-szi-ru im-lu-u _edin_
70. u2-ter-ma a-szar pi-qit-ti-szu2-un
71. ina masz-kan2-i-szu2-nu ul-zi-is-su-nu-ti
72. {kur}mu-s,ur {kur}ku-u-su sza _ad_ ba-nu-u-a
73. ik-szu-du a-na esz-szu-ti as,-bat
74. _en-nun-mesz_-szu2 _ugu_ sza2 u4-me pa-ni u2-dan-nin
75. u2-rak-ki-sa rik-se-e-szu2
76. {iri}sa-a-a {iri}bi-in-t,i-t,i {iri}s,a-a'-nu sza ib-bal-ki-tu2
77. it-ti {disz}tar-qu-u isz-ku-nu pi-i-szu2-un
78. _iri-mesz_ sza2-a-tu-nu ak-szu-ud
79. _ug3-mesz_ a-szib lib3-bi-szu2-un a-ni-ir ina _{gesz}tukul-mesz_
80. _adda-mesz_-szu2-nu ina {gesz}ga-szi-szi a-lul
81. _kusz-mesz_-szu2-nu asz2-hu-ut, _bad3 iri_ u2-hal-lip2
82. {disz}lugal-lu-da3-ri sza2 _ad_-u-a ina {kur}mu-s,ur
83. isz-ku-nu-usz a-na _lugal_-ti
84. sza2 _hul_-tu ik-pu-du a-na _dumu-mesz kur_ asz-szur{ki}
85. ina qa-ti as,-bat u2-ra-a a-na _kur_ asz-szur{ki}
86. {disz}tar-qu-u a-szar in-nab-tu
87. ra-szub-bat _{gesz}tukul_ an-szar2 _en_-ia is-hup-szu-ma
88. il-lik nam-mu-szi-szu2
89. _egir_-nu {disz}ur-da-ma-ne2-e _dumu nin9_-szu2
90. u2-szib ina _{gesz}gu-za lugal_-ti-szu2
91. {iri}ni-i' {iri}u2-nu a-na dan-nu-ti-szu2 isz-kun
92. u2-pah-hi-ir il-lat-su
93. a-na mit-hu-s,i _erin2-hi-a dumu-mesz kur_ asz-szur{ki} sza2 qe2-reb {iri}me-em-pi
94. id-ka-a qa-bal-szu2 _ug3-mesz_ sza2-a-tu-nu e-si-ir-ma
95. is,-ba-ta mu-us,-s,a-szu2-un _{lu2}a_ szip-ri ha-an-t,u
96. a-na nina{ki} il-lik-am-ma iq-ba-a ia-a-ti
97. asz2-ni-ma a-na {kur}mu-s,ur {kur}ku-u-si usz-te-sze-ra har-ra-nu
98. {disz}ur-da-ma-ne2-e a-lak ger-ri-ia isz-me-ma
  n lines broken
99'. in-na-bit a-na {iri}ki-ip-ki-pi _iri_ szu-a-tu
100'. a-na si-hir-ti-szu2 ina tukul-ti an-szar2 u {d}1(u)-5(disz) ik-szu-da
101'. _szu-min_-a-a _ku3-babbar ku3-sig17_ ni-siq-ti _na4-mesz nig2-szu e2-gal_-szu2
102'. ma-la ba-szu-u lu-bul-tu bir-me _gada-mesz ansze-kur-ra-mesz gal-mesz_
103'. _ug3-mesz_ zik-ra u3 sin-nisz 2(disz) tim-me _mah-mesz_ pi-tiq za-ha-le-e
104'. eb-bi sza 2(disz) _lim_ 5(disz) _me gun ki-la2_-szu2-nu man-za-az _ka2_ e2-kur
105'. ul-tu man-zal-ti-szu2-nu as-suh-ma al-qa-a a-na _kur_ asz-szur{ki}
106'. szal-la-tu2 ka-bit-tu2 a-na la mi3-ni asz2-lu-la ul-tu qe2-reb
107'. {iri}ni-i' _ugu_ {kur}mu-s,ur u {kur}ku-u-si _{gesz}tukul-mesz_-ia
108'. u2-szam-ri-ir-ma asz2-ta-kan li-i-tu2 it-ti qa-ti
109'. ma-li-ti szal-mesz a-tu-ra a-na {iri}nina{ki} _iri en_-ti-ia
110'. ina szal-szi ger-ri-ia _ugu_ {disz}ba-'a-li _lugal_ {kur}s,ur-ri
111'. a-szib _muru2_ tam-tim lu-u al-lik
112'. asz2-szu2 a-mat _lugal_-ti-ia la is,-s,u-ru
113'. la isz-mu-u zi-kir _nundum_-ia
114'. {iri}hal-s,u-_mesz ugu_-szu2 u2-rak-kis a-na la a-s,e-e _ug3-mesz_-szu2
115'. u2-dan-nin ma-s,ar-tu2 ina tam-tim u na-ba-li
116'. ger-re-ti-szu2? u2-s,ab-bit a-lak-ta-szu2 ap-ru-us
117'. _a-mesz_ te-'u-u2-ta ba-lat, _zi_-ti3-szu2-nu a-na pi-i-szu2-nu
118'. u2-sza2-qir ina me-se-ri dan-ni sza2 la na-par-szu-di e-si-ir-szu2-nu-ti
119'. nap-szat-su-nu u2-si-iq u2-kar-ri
120'. a-na _{gesz}szudun_-ia u2-szak-ni-is-su-nu-ti
121'. _dumu-munus_ s,i-it lib3-bi-szu2 u _dumu-munus-mesz szesz-mesz_-szu2
122'. a-na e-pesz _{munus}agrig_-u-ti u2-bi-la a-di _igi_-ia
123'. _dumu_-szu2 sza ma-ti-ma _a-ab-ba_ la e-bi-ra isz-sza2-a
124'. a-na e-pesz _ARAD_-ti-ia _dumu-munus_-su u _dumu-munus-mesz szesz-mesz_-szu2
125'. it-ti ter-ha-ti ma-a'-as-si am-hur-szu2
126'. re-e-mu ar-szi-szu2-ma _dumu_ s,i-it lib3-bi-szu2
127'. u2-ter-ma a-ri-im-szu2 {iri}hal-s,u-_mesz_ sza2 _ugu_ {disz}ba-'a-li
128'. _lugal_ {kur}s,ur-ri u2-rak-ki-su ap-t,ur
129'. ina tam-tim u na-ba-li ger-re-ti-szu2 ma-la u2-s,ab-bi-tu2
130'. ap-ti ma-da-at-ta-szu2 ka-bit-tu2 am-hur-szu2
131'. szal-mesz a-tu-ra a-na nina{ki} _iri en_-u-ti-ia
132'. ma-al-ki _muru2_ tam-tim u _lugal-mesz_
133'. a-szib szad-de-e sza2-qu-u-ti
134'. da-na-an ep-sze-ti-ia an-na-a-ti
135'. e-mu-ru-ma ip-la-hu _en_-u-ti
136'. {disz}ia-ki-in-lu-u _lugal_ {kur}a-ru-ad-da
137'. {disz}mu-gal-lu _lugal_ {kur}tab_-iri_-a-a
138'. {disz}sa-an-di-szar-me {kur}hi-lak-ka-a-a
139'. sza a-na _lugal-mesz ad-mesz_-ia la kan-szu2
140'. ik-nu-szu2 a-na ni-ri-ia _dumu-munus-mesz_
141'. s,i-it lib3-bi-szu2-nu it-ti nu-dun-ne2-e
142'. ma-a'-di u3 ter-ha-ti ma-a'-as-si
143'. a-na e-pesz _{munus}agrig_-u-ti a-na nina{ki}
144'. u2-bi-lu-nim-ma u2-na-asz2-szi-qu _giri3-min_-ia
145'. e-li {disz}mu-gal-li _ansze-kur-ra-mesz gal-mesz_
146'. ma-da-at-tu szat-ti-szam u2-kin _edin_-usz-szu2
147'. ul-tu {disz}ia-ki-in-lu-u _lugal_ {kur}a-ru-ad-da
148'. il-li-ku a-na szim-ti
149'. {disz}a-zi-ba-al {disz}a-bi-ba-al {disz}a-du-ni-ba-al
150'. _dumu-mesz_ {disz}ia-ki-in-lu-u a-szib _muru2_ tam-tim
151'. ul-tu _muru2_ tam-tim e-lu-nim-ma
152'. it-ti ta-mar-ti-szu2-nu ka-bit-ti il-lik-u-nim-ma
153'. u2-na-asz2-szi-qu _giri3-min_-ia2
154'. {disz}a-zi-ba-al ha-disz ap-pa-lis-ma
155'. a-na _lugal_-u-ti {kur}a-ru-ad-da asz2-kun
156'. {disz}a-bi-ba-al {disz}a-du-ni-ba-al
157'. lu-bul-ti bir-me u2-lab-bisz _har ku3-sig17_ asz2-kun
158'. ina mah-ri-ia ul-zis-su-nu-ti
159'. {disz}gu-ug-gu _lugal_ {kur}lu-ud-di
160'. na-gu-u sza2 ne2-ber-ti _a-ab-ba_ asz2-ru ru-u-qu
161'. sza _lugal-mesz ad-mesz_-ia la isz-mu-u zi-kir _mu_-szu2
162'. ni-bit _lugal_-ti-ia ina _masz2-ge6_ u2-szab-ri-szu2-ma
163'. an-szar2 _dingir_ ba-nu-u-a u4-mu _masz2-ge6_ an-ni-tu2 e-mu-ru
164'. {lu2}rak-bu-szu2 isz-pu-ra a-na sza2-'a-al szul-mi3-ia
165'. {lu2}gi-mir-a-a _{lu2}kur2_ ek-s,u sza2 la ip-tal-la-hu
166'. _ad-mesz_-ia u3 ia-a-szi la is,-ba-tu _giri3-min lugal_-ti-ia
167'. ina tukul-ti an-szar2 {d}marduk _en-mesz_-ia ina {gesz}s,i-is,-s,i
168'. {gesz}szat qa-ti {gesz}szi-ga-ri u2-tam-me-eh-ma
169'. it-ti ta-mar-ti-szu2-nu ka-bit-ti u2-sze-bi-la
170'. a-di mah-ri-ia a-tam-ma-ra da-na-an an-szar2 u {d}szu2
171'. ina 4(disz)-e ger-ri-ia a-na {iri}qir-bit2 sza2 qe2-reb
172'. {iri}ha-re-e-ha-as-ta lu-u al-lik sza {disz}ta-an-da
173'. _{lu2}en-iri_-szu2-nu a-na _lugal-mesz ad-mesz_-ia la ik-nu-szu2
174'. a-na _{gesz}szudun_ u _ug3-mesz_ a-szi-bu-ti {iri}qir-bit2
175'. ka-a-a-an ih-ta-nab-ba-tu hu-bu-ut {kur}ia-mut-ba-li
176'. _iri_ szu-a-tu2 ina tukul-ti an-szar2 {d}en {d}suen? _dingir-mesz en-mesz_-ia
177'. ak-szu-ud asz2-lu-la szal-lat-su {disz}ta-an-da _{lu2}en-iri_-szu2-nu
178'. it-ti szal-lat _iri_-szu2 al-qa-a a-na _kur_ asz-szur{ki}
179'. _ug3-mesz_ {iri}qir-bit2 ma-la asz2-lu-lu u2-bil-ma
180'. qe2-reb {kur}mu-s,ur u2-sza2-as,-bit
181'. ina 5(disz)-szi ger-ri-ia _ugu_ {disz}ah-szi-ra _man_ {kur}man-na-a-a lu-u al-lik
182'. sza2 a-na _lugal-mesz ad-mesz_-ia la kit-nu-szu2 i-tap-pa-lu da-s,a-a-ti
183'. ad-ke _erin2-mesz me3_-ia a-na ka-sza2-ad {kur}man-na-a-a
184'. usz-te-sze-ra har-ra-nu al-lik-ma qe2-reb {iri}bad3-asz-szur
185'. usz-man-nu ad-di-ma asz2-ku-na ka-ra-szi {disz}ah-sze-e-ri
186'. a-lak ger-ri-ia isz-me-ma u2-ma-'e-e-ra um-man-szu2
187'. ina szat mu-szi ina szi-pir ni-kil-ti a-na e-pesz _me3_ it-bu-u-ni
188'. a-na mit-hu-us,-s,i _erin2-hi-a_-ia
189'. _erin2-mesz me3_-ia it-ti-szu2-un im-da-ha-s,u
190'. isz-ku-nu _bad5-bad5_-szu2-un
191'. ma-lak 3(disz) _danna a-sza3_ szal-ma-ti-szu2-nu u2-mal-lu-u _edin_ rap-szu2
192'. ina qi2-bit an-szar2 {d}sin {d}utu _dingir-mesz gal-mesz en-mesz_-ia sza u2-tak-ki-lu-in-ni
193'. qe2-reb {kur}man-na-a-a e-ru-ub-ma at-tal-lak szal-t,isz
194'. ina me-ti-iq ger-ri-ia {iri}a-a-u2-si-asz2 {iri}hal-s,u
195'. {iri}asz2-sza2-asz2 dan-na-su {iri}bu-su_-ud_ {iri}asz2-di-asz2
196'. {iri}ur-ki-ia-mu-un {iri}up-pi-isz {iri}si-hu-u-a {iri}na-zi-ni-ri
197'. 8(disz) _iri-mesz_ dan-nu-ti u3 a-di s,e-eh-ru-ti
198'. sza2 ni-ba la i-szu-u2
199'. a-di qe2-reb {iri}i-zir-ti ak-szu-ud ap-pul aq-qur
200'. ina {d}gesz-bar aq-mu _ug3-mesz ansze-kur-ra-mesz ansze-mesz_
201'. _gu4-mesz_ s,e?-e-ni ul-tu qe2-reb _iri-mesz_ sza2-a-tu-nu
202'. u2-sze-s,a-am-ma szal-la-tisz am-nu {disz}ah-sze-e-ri
203'. a-lak ger-ri-ia isz-me-ma u2-masz-szir
204'. {iri}i-zir-tu2 _iri lugal_-ti-szu2 a-na {iri}at-ra-a-na
205'. _iri_ tukul-ti-szu2 in-na-bit e-hu-uz
206'. mar-qi2-tu {iri}i-zir-tu2 {iri}ur-me-e-te
207'. {iri}uz-bi-a _iri-mesz_ dan-nu-ti-szu2 al-me
208'. _ug3-mesz_ a-szi-bu-ut _iri-mesz_ sza2-a-tu-nu
209'. e-si-ir-ma nap-szat-su-nu u2-si-iq u2-kar-ri
210'. na-gu-u2 szu-a-tu ak-szu-ud
211'. ap-pul aq-qur ina {d}gesz-bar aq-mu
212'. ma-lak 1(u) u4-me 5(disz) u4-me u2-szah-ri-ir-ma sza2-qu-um-ma-tu2
213'. at-bu-uk ina me-ti-iq ger-ri-ia _iri-mesz_
214'. sza2 li-mi-it {iri}pad-di-ra sza2 ina ter-s,i _lugal-mesz_
215'. _ad-mesz_-ia {kur}man-na-a-a e-ki-mu
216'. a-na i-di ra-ma-ni-szu2-nu u2-ter-ru
217'. ak-szu-ud ina {d}gesz-bar aq-mu asz2-lu-la szal-lat-sun2
218'. _iri-mesz_ sza2-a-tu-nu a-na mi-s,ir _kur_ an-szar2 u2-ter
219'. na-gu-u2 sza2 {iri}ar-si-ia-ni-isz
220'. sza bi-rit {iri}a-za-qa-ia-ni
221'. sza ha-ar-si sza2-di-i
222'. sza _sag_ {kur}ku-mu-ur-da-a-a
223'. sza qe2-reb {kur}man-na-a-a as-pu-un ina {d}gesz-bar aq-mu
224'. {disz}ra-a-a-di-sza2-di-i _{lu2}gal hal-s,u_-szu2-nu
225'. a-duk asz2-lu-la szal-lat-su na-gu-u sza2 {iri}e-ri-is-te-ia-na
226'. ak-szu-ud _iri-mesz_-szu2 as-pu-un ina {d}gesz-bar aq-mu
227'. asz2-lu-la szal-lat-sun2 ina ti-ib ta-ha-zi-ia na-gu-u-szu2
228'. u2-szah-rib u2-s,a-ah-hi-ir nap-har _kur_-szu2
229'. it-ti hu-ub-ti ma-a'-di szal-la-tu2 ka-bit-tu2
230'. szal-mesz a-tu-ra ak-bu-sa mi-s,ir _kur_ asz-szur{ki}
231'. {iri}bi-ir-ru-u-a {iri}lugal-iq-bi {iri}gu-si-ne2-e
232'. _iri-mesz_ mah-ru-u-ti sza2 mi-s,ir _kur_ asz-szur{ki}
233'. sza ina ter-s,i _lugal-mesz ad-mesz_-ia e-ki-mu
234'. {kur}man-na-a-a da-ad2-me sza2-a-tu-nu ak-szu-ud
235'. {kur}man-na-a-a _ta_ lib3-bi as-suh
236'. _ansze-kur-ra-mesz_ til-li u2-nu-ut _me3_-szu2-nu
  n lines broken
237'. ina _sila iri_-szu id-du-u pa-gar-szu2
238'. _egir_-nu {disz}u2-al-li-i _dumu_-szu2 u2-szib ina _{gesz}gu-za_-szu2
239'. da-na-an an-szar2 {d}en {d}ag {d}1(u)-5(disz) sza {iri}nina{ki}
240'. {d}1(u)-5(disz) sza {iri}limmu2-dingir{ki} _dingir-mesz gal-mesz en-mesz_-ia
241'. e-mur-ma ik-nu-sza2 a-na ni-ri-ia
242'. asz2-szu2 ba-lat, _zi_-ti3-szu2 up-na-a-szu2 ip-ta-a
243'. u2-s,al-la-a _en_-u-ti
244'. {disz}e-ri-si-in-ni _dumu usz_-ti-szu2
245'. a-na nina{ki} isz-pur-am-ma u2-na-asz2-sziq _giri3-min_-ia
246'. re-e-mu ar-szi-szu2 _{lu2}a kin_-ia sza2 szul-me u2-ma-'e-er _edin_-usz-szu2
247'. _dumu-munus_ s,i-it lib3-bi-szu2 u2-sze-bi-la ana e-pesz _{munus}agrig_-u-ti
248'. ma-da-at-ta-szu2 mah-ri-tu2 sza2 ina tar-s,i _lugal-mesz ad-mesz_-ia
249'. u2-szab-t,i-lu isz-szu-u-ni a-di mah-ri-ia
250'. 3(u) _ansze-kur-ra-mesz ugu_ ma-da-at-ti-szu2
251'. mah-ri-ti u2-rad-di-ma e-mid-su
252'. ina u4-me-szu2 {disz}bi-ri-is-ha-at-ri _{lu2}en-iri_ sza mad-a-a
253'. {disz}sar-a-ti {disz}pa-ri-hi
254'. 2(disz) _dumu-mesz_ {disz}ga-a-gi _{lu2}en-iri_ {kur}sa-hi
255'. sza is,-lu-u _{gesz}szudun en_-ti-ia
256'. 1(gesz2) 1(u) 5(disz) _iri-mesz_-szu2-nu dan-nu-ti ak-szu-ud asz2-lu-la szal-la-sun2
257'. sza2-a-szu2-nu bal-t,u-su-nu ina _szu-min_ as,-bat
258'. u2-bi-la a-na nina{ki} _iri en_-u-ti-ia
259'. {disz}an-da-ri-a _{lu2}en-nam_ {kur}ur-ar2-t,i
260'. sza a-na ka-sza2-ad {iri}up-pu-um-me u {kur}kul-li-im-me-ri
261'. ir-da-a il-li-ka qe2-reb mu-szi-ti
262'. _ug3-mesz_ a-szi-bu-ti {iri}kul-li-im-me-ri _ARAD-mesz_ da-gil2 pa-ni-ia
263'. ina szat mu-szi di-ik-ta-szu2 ma-a'-as-su i-du-ku
264'. la iz-zi-bu a-a-um-ma
265'. _sag-du_ {disz}an-da-ri-a ik-ki-su-nim-ma
266'. a-na nina{ki} ina mah-ri-ia u2-bil-u-ni
267'. ina 6(disz)-szi ger-ri-ia _ugu_ {disz}ur-ta-ki _man_ {kur}elam-ma{ki} lu-u al-lik
268'. sza _mun ad du3_-ia la ha-as-su la is,-s,u-ru ib-ru-ti
269'. ul-tu ina {kur}elam-ma{ki} su-un-qu isz-ku-nu ib-ba-szu2-u ne2-eb-re-tu
270'. {d}nisaba ba-lat, _zi_-tim _ug3-mesz_ u2-sze-bil-szu2-ma
271'. x x x x [...]
  n lines broken
272'. x x [...]
273'. {disz}ur-ta-ki ul asz2-du-ud ina lib3-bi-ia
274'. szu-ut _{lu2}mah-mesz_-szu2 sza2 su-lum-me-e
275'. isz-ta-nap-pa-ra ina mah-ri-ia
276'. a-na a-mar _lugal {kur}elam-ma{ki} {lu2}a kin_-ia
277'. u2-ma-'e-er ha-an-t,isz il-lik i-tu-ram-ma
278'. a-ma-a-te ka-a-a-ma-na-ti u2-sza2-an-na-a ia-a-te
279'. um-ma {kur}e-la-mu-u _gin7 zi_-ut _buru5-hi-a_
280'. ka-tim _kur_ uri{ki} ka-li-sza2 s,e-er babila2{ki}
281'. usz-man-nu sza2-kin-ma na-di ma-dak-tu2? a-na na-ra-ru-ti
282'. {d}en u {d}ag _dingir-mesz_-ia
283'. sza ap-tal-la-hu _dingir_-su-un
284'. _erin2-mesz me3_-ia ad-ke-e-ma as,-ba-ta har-ra-nu
285'. a-lak ger-ri-ia isz-me-ma
286'. hat-tu is-hup-szu2-ma i-tur a-na _kur_-szu2
287'. _egir_-szu2 as,-bat a-bi-ik-ta-szu2 asz2-kun
288'. at,-ru-us-su a-di mi-s,ir _kur_-szu2
289'. {disz}ur-ta-ku _lugal_ {kur}elam-ma{ki} sza la is,-s,u-ru ib-ru-ti
290'. ina u4-me la szim-ti-szu2 mu-u-tu u2-gar-ru-u
291'. ina ta-ne2-hi iq-tu-u2 i-zu-bu
292'. ina qaq-qa-ri ba-la2-t,i _giri3-min_-szu2 ul isz-kun
293'. ina _mu-an-na_-szu2 na-pisz-ta-szu2 iq-ti
294'. il-lik nam-mu-szi-szu2 {disz}en-ba-sza2 {lu2}gam-bu-la-a-a
295'. sza is,-lu-u2 _{gesz}szudun en_-ti-ia
296'. ina ni-szik _pesz2_ isz-ta-kan na-pisz-tu
297'. {disz}{d}ag-mu-kam-esz _{lu2}gu2-en-na_ la na-s,ir a-de-e
298'. isz-szi a-ga-nu-til?-la-a _a-mesz sa5-mesz_
299'. {disz}{d}marduk-mu-du3 {lu2}szu-ut _sag_-szu2? mu-szad-bi-ib-szu2
300'. sza _munus-hul_ u2-szak-pi-du a-na {disz}ur-ta-ki
301'. e-mid-su {d}marduk _lugal dingir-mesz_ szi-ir-ta-szu2 _gal_-tu2
302'. ina 1(disz)-et _mu-an-na_ me2-eh-ret a-ha-mesz
303'. isz-ku-nu na-pisz-tu2
304'. lib3-bi an-szar2 ag-gu ul i-nu-uh-szu2-nu-ti
305'. ul ip-szah-szu2-nu-ti ka-bit-ti {d}isz-tar sza u2-tak-kil-an-ni
306'. _bala_-e _lugal_-ti-szu2 isz-ki-pu
307'. be-lut {kur}elam-ma{ki} u2-szal-qu-u sza2-nam-ma
308'. _egir_ {disz}te-um-man tam-szil _gal5-la2_
309'. u2-szib ina _{gesz}gu-za_ {disz}ur-ta-ki
310'. a-na da-a-ki _dumu-mesz_ {disz}ur-ta-ki
311'. a-na _dumu-mesz_ {disz}um-man-al-da-sze _szesz_ {disz}ur-ta-ki
312'. isz-te-ne2-'a-a _munus-hul_
313'. {disz}um-man-i-gasz {disz}um-man-ap-pa {disz}tam-ma-ri-tu2
314'. _dumu-mesz_ {disz}ur-ta-ki _lugal_ {kur}elam-ma{ki}
315'. {disz}ku-dur2-ru {disz}pa-ru-u2
316'. _dumu-mesz_ {disz}um-man-al-da-sze _lugal_ a-lik pa-ni
317'. {disz}ur-ta-ki u3 1(gesz2) _numun lugal_ ina la mi3-ni
318'. _erin2-mesz {gesz}pan dumu_ ba-ne2-e sza2 {kur}elam-ma{ki}
319'. la-pa-an da-a-ki {disz}te-um-man
320'. in-nab-tu-nim-ma is,-ba-tu2 _giri3-min lugal_-ti-ia
321'. ina 7(disz)-e ger-ri-ia _ugu_ {disz}te-um-man
322'. _man_ {kur}elam-ma{ki} lu-u al-lik
323'. sza2 _ugu_ {disz}um-man-i-gasz {disz}um-man-ap-pa
324'. {disz}tam-ma-ri-tu _dumu-mesz_ {disz}ur-ta-ki _lugal_ {kur}elam-ma{ki}
325'. {disz}ku-dur2-ru {disz}pa-ru-u2
326'. _dumu-mesz_ {disz}um-man-al-da-sze _szesz_ {disz}ur-ta-ki
327'. _lugal_ {kur}elam-ma{ki}
328'. _{lu2}mah-mesz_-szu2 isz-ta-nap-pa-ra a-na sze-bu-li
329'. _ug3-mesz_ sza2-a-tu-nu sza2 in-nab-tu-nim-ma
330'. is,-ba-tu2 _giri3-min_-ia sze-bul-szu2-nu ul aq-bi-szu2
331'. ina _ugu_ me-re-he-e-ti ina _szu-min_ {disz}um-ba-da-ra-a
332'. u3 {disz}{d}muati-saga-iq isz-ta-nap-pa-ra _iti_-szam
333'. qe2-reb {kur}e-lam-ti usz-tar-ra-ah ina _ukken erin2-hi-a_-szu2
334'. at-kil a-na {d}1(u)-5(disz) sza u2-tak-kil-an-ni
335'. qi2-bit pi-i-szu er-hu ul am-gur2 ul a-din-szu2
336'. mun-nab-ti sza2-a-tu-nu
337'. {disz}te-um-man le-mut-tu2 isz-te-ne2-'a-a
  n lines broken
338'. um-ma {disz}te-um-man ki-a-am iq-bi
339'. sza {d}1(u)-5(disz) u2-sza2-an-nu-u mi-lik t,e3-me-szu2
340'. um-ma ul u2-masz-szar a-di al-la-ku
341'. it-ti-szu2 ep-pu-szu2 mit-hu-s,u-tu2
342'. szu-ut me2-re-eh-ti an-ni-te sza2 {disz}te-um-man
343'. iq-bu-u am-hur sza2-qu-tu2 {d}isz-tar
344'. a-zi-iz a-na tar-s,i-sza2 ak-mi3-is sza2-pal-sza2
345'. _dingir_-us-sa u2-sap-pa-a il-la-ka di-ma-a-a
346'. um-ma {d}be-let {iri}limmu2-dingir{ki} a-na-ku {disz}asz-szur-du3-a
  n lines broken
347'. 1(disz)-en {lu2}szab-ru-u u2-tu-ul-ma i-na-t,al _masz2-ge6_
348'. i-gi-il-ti-ma tab-rit mu-szi sza {d}1(u)-5(disz) u2-szab-ru-szu2
349'. u2-sza2-an-na-a ia-a-ti
350'. um-ma {d}1(u)-5(disz) a-szi-bat {iri}limmu2-dingir e-ru-ub-am-ma
351'. 1(u) 5(disz) u 2(gesz2) 3(u) tu-ul-la-a?-ta isz-pa-a-ti
352'. tam-ha-at _{gesz}pan_ i?-na i-di-sza2
353'. szal-pat nam-s,a-ru zaq-tu sza e-pesz ta-ha-zi
354'. ma-har-sza2 ta-zi-iz szi-i ki-ma _ama_
355'. a-lit-ti i-tam-ma-a it-ti-ka
356'. il-si-ka {d}1(u)-5(disz) sza2-qu-ut _dingir-mesz_ i-szak-kan-ka t,e3-e-mu
357'. um-ma ta-na-at,-t,a-la a-na e-pesz sza2-asz2-mi
358'. a-szar pa-nu-u-a szak-nu te-ba-ku a-na-ku
359'. at-ta ta-qab-bi-szi um-ma a-szar tal-la-ki
360'. it-ti-ki lul-lik be-let _gaszan-mesz_
361'. szi-i tu-sza2-an-nak-ka um-ma at-ta a-kan-na
362'. lu-u asz2-ba-ta a-szar masz-kan2-i-ka
363'. a-kul a-ka-lu szi-ti ku-ru-un-nu
364'. nin-gu-tu2 szu-kun nu-'i-id _dingir_-u2-ti
365'. a-di al-la-ku szip-ru szu-a-tu2 ep-pu-szu2
366'. u2-szak-sza2-du s,u-um-me-rat lib3-bi-ka
367'. pa-nu-u-ka ul ur-raq ul i-nar3-ru-t,a _giri3-min_-ka
368'. ul ta-szam-mat, zu-ut-ka ina _muru2_ tam-ha-ri
369'. ina ki-rim-mi-sza2 _du10-ga_ tah-s,i-in-ka-ma
370'. tah-te-na gi-mir la-a-ni-ka
371'. pa-nu-usz-sza2 {d}gesz-bar in-na-pi-ih
372'. szam-risz ta-at-ta-s,i a-na a-ha-a-ti
373'. e-li? {disz}te-um-man _lugal_ {kur}elam-ma{ki}
374'. sza ug-gu-ga-at pa-nu-usz-sza2 tasz-kun
375'. ina _{iti}kin_ szi-pir _{d}1(u)-5(disz)-mesz_ i-sin-ni an-szar2 _mah_
376'. _iti_ {d}sin {d}na-an-nar3 _an_-e u _ki_-tim
377'. at-kil a-na _esz-bar {d}nanna_-ri nam-ri
378'. u3 szi-pir {d}1(u)-5(disz) _gaszan_-ia sza la in-ne2-nu-u
379'. ad-ke _erin2-mesz me3_-ia mun-dah-s,e
380'. sza ina qi2-bit an-szar2 {d}sin u {d}1(u)-5(disz)
381'. it-ta-na-asz2-ra-bi-t,u ina qa-bal tam-ha-ri
382'. e-li {disz}te-um-man _lugal_ {kur}elam-ma{ki} ur-hu as,-bat-ma
383'. usz-te-szi-ra har-ra-nu el-la-mu-u-a {disz}te-um-man
384'. _lugal_ {kur}elam-ma{ki} ina e2-{disz}im-bi-i na-di mad-dak-tu2
385'. e-reb _lugal_-ti-ia sza2 qe2-reb {iri}|BAD.AN|{ki}
386'. isz-me-e-ma is,-bat-su hat-tu
387'. {disz}te-um-man ip-lah3-ma a-na _egir_-szu2 i-tur
388'. e-ru-ub qe2-reb {iri}szu-sza2-an
389'. _ku3-babbar ku3-sig17_ a-na szu-zu-ub _zi_-ti3-szu2
390'. u2-za-'i-iz a-na _ug3-mesz kur_-szu2
391'. re-s,e-e-szu2 a-lik _a2-min_-szu2 pa-nu-usz-szu2 u2-ter-ram-ma
392'. ug-dap2-pi-sza2 a-na mah-ri-ia
393'. {i7}u2-la-a-a a-na dan-nu-ti-szu2 isz-kun
394'. is,-bat pa-an masz-qe2-e
395'. ina qi2-bit an-szar2 {d}marduk sza2 u2-tak-kil-u2-in-ni
396'. ina _geszkim-mesz saga-mesz masz2-ge6 inim-gar_ szi-pir mah-he-e
397'. qe2-reb {iri}du6-tu-ba _bad5-bad5_-szu2-nu asz2-kun
398'. ina _adda-mesz_-szu2-nu {i7}u2-la-a-a as-ki-ir
399'. szal-ma-a-te-szu2-nu ki-ma _{gesz}dih3_ u _{gesz}kiszi16_
400'. u2-ma-al-la-a ta-mar-ti {iri}szu-sza2-an
401'. _sag-du_ {disz}te-um-man _lugal_ {kur}elam-ma{ki}
402'. ina qi2-bit an-szar2 {d}marduk _dingir-mesz gal-mesz en-mesz_-ia _ku5_-is ina _ukken erin2-hi-a_-szu2
403'. me2-lam-me an-szar2 u {d}1(u)-5(disz) {kur}elam-ma{ki}
404'. is-hu-up-ma ik-nu-szu2 a-na ni-ri-ia
405'. {disz}um-man-i-gasz sza2 in-nab-tu
406'. is,-ba-tu _giri3-min_-ia ina _{gesz}gu-za_-szu2 u2-sze-szib
407'. {disz}tam-ma-ri-tu _szesz_-szu2 szal-sza2-a-a
408'. ina {iri}hi-da-lu a-na _man_-u2-ti asz2-kun
409'. _{gesz}gigir-mesz_ {gesz}s,u-um-bi _ansze-kur-ra-mesz ansze-kunga-mesz_
410'. s,i-mit-ti ni-i-ri {gesz}til-li si-mat _me3_
411'. sza2 ina tukul-ti an-szar2 {d}1(u)-5(disz) _dingir-mesz gal-mesz en-mesz_-ia
412'. bi-ri-it {iri}szu-sza2-an {i7}u2-la-a-a
413'. ik-szu-da _szu-min_-a-a
414'. ina qi2-bit an-szar2 u _dingir-mesz gal-mesz en-mesz_-ia
415'. ul-tu qe2-reb {kur}elam-ma{ki} ha-disz u2-s,a-am-ma
416'. a-na gi-mir _erin2-hi-a_-ia sza2-lim-tu szak-na-at
417'. ina 8(disz)-e ger-ri-ia _ugu_ {disz}du-na-nu _dumu {disz}en-ba_-sza2
418'. a-na {kur}gam-bu-li lu-u al-lik
419'. sza2 a-na _lugal_ {kur}elam-ma{ki} it-tak-lu
420'. la ik-nu-szu2 a-na ni-ri-ia
421'. ta-ha-zi dan-nu {lu2}gam-bu-lu a-na si-hir-ti-szu2
422'. ki-ma _muru9_ ak-tum3 {iri}sza2-pi_-en iri_ dan-nu-ti-szu2
423'. sza qe2-reb _id2-mesz_ na-da-at szu-bat-su ak-szu-ud
424'. {disz}du-na-nu _szesz-mesz_-szu2 ul-tu2 qe2-reb _iri_ szu-a-tu
425'. bal-t,u-su-un u2-sze-s,a-a
426'. _dam_-su _dumu-mesz_-szu2 _dumu-munus-mesz_-szu2 {munus}sek-re-ti-szu2
427'. _{lu2}nar-mesz {munus}nar-mesz_ u2-sze-s,a-am-ma szal-la-tisz am-nu
428'. _ku3-babbar ku3-sig17 nig2-szu_ na-kam2-ti _e2-gal-mesz_-szu2
429'. u2-sze-s,a-am-ma szal-la-tisz am-nu
430'. {lu2}szu-ut _sag-mesz_ {lu2}man-za-az pa-ni-szu2 {lu2}kit-ki-tu-u
431'. mu-sza2-ki-le-szu2 u2-sze-s,a-am-ma szal-la-tisz am-nu
432'. gi-mir um-ma-a-ni ma-la ba-szu-u
433'. mar-kas _iri_ u _edin_ u2-sze-s,a-am-ma szal-la-tisz am-nu
434'. _gu4-mesz_ s,e-e-ni _ansze-kur-ra-mesz ansze-kunga-mesz_
435'. sza2 ni-ba la i-szu2-u u2-sze-s,a-am-ma szal-la-tisz am-nu
436'. _ug3-mesz kur_-szu2 zi-kir? sin-nisz _tur_ u _gal_
437'. e-du ul e-zib u2-sze-s,a-am-ma szal-la-tisz am-nu
438'. {disz}mas-si-ra-a _{lu2}gal {gesz}pan_ sza {disz}te-um-man _lugal_ {kur}elam-ma{ki}
439'. sza a-na kit-ri {kur}gam-bu-li ma-s,ar-tu2 {disz}du-na-nu
440'. asz2-bu qe2-reb {iri}sza2-pi-i-{d}en bal-t,u-us-su ina qa-ti as,-bat
441'. _sag-du_-su ak-kis2 it-ti pa-ni {disz}du-na-nu kit-ri la mu-sze-zib-i-szu2
442'. ar-pi-is _iri_ szu-a-tu ap-pul aq-qur ina _a-mesz_ usz-har-mit,
443'. a-di la ba-sze-e u2-sza2-lik na-gu-u2 szu-a-tu
444'. u2-szah-rib ri-gim a-me-lu-ti ap-ru-us-sa _edin_-usz-szu2
445'. ina tu-kul-ti an-szar2 {d}en {d}ag _dingir-mesz gal-mesz en-mesz_-ia
446'. _{lu2}kur2-mesz_-ia a-ni-ir
447'. szal-mesz a-tu-ra a-na nina{ki}
448'. _sag-du_ {disz}te-um-man _lugal_ {kur}elam-ma{ki}
449'. ina _gu2_ {disz}du-na-nu a-lul
450'. it-ti ki-szit-ti {kur}elam-ma{ki} szal-la-ti {kur}gam-bu-li
451'. sza ina qi2-bit an-szar2 ik-szu-da _szu-min_-a-a
452'. it-ti _{lu2}nar-mesz_ e-pisz nin-gu-ti
453'. a-na nina{ki} e-ru-ub ina _hul2-mesz_
454'. {disz}um-ba-da-ra-a {disz}{d}muati-saga-iq
455'. _{lu2}mah-mesz_ sza2 {disz}te-um-man _lugal_ {kur}elam-ma{ki}
456'. sza {disz}te-um-man ina _szu-min_-szu2-nu isz-pu-ra szi-pir me-re-eh-tu2 sza2 ina mah-ri-ia
457'. ak-lu-u u2-qa-'u-u pa-an szi-kin t,e3-e-me-ia
458'. ni-kis _sag-du_ {disz}te-um-man _en_-szu2-nu
459'. qe2-reb nina{ki} e-mu-ru-ma
460'. sza2-ne2-e t,e3-e-me is,-bat-su-nu-ti
461'. {disz}um-ba-da-ra-a ib-qu-ma ziq-na-a-szu2
462'. {disz}{d}muati-saga-iq ina _gir2 an-bar_ szib-bi-szu2
463'. is-hu-la ka-ra-as-su
464'. ni-kis _sag-du_ {disz}te-um-man ina _gaba abul muru2 iri_
465'. sza nina{ki} u2-mah-hi-ra mah-hu-risz
466'. asz2-szu2 da-na-an an-szar2 u {d}1(u)-5(disz) _en-mesz_-ia _ug3-mesz_ kul-lu-me
467'. ni-kis _sag-du_ {disz}te-um-man _lugal_ {kur}elam-ma{ki}
468'. {disz}ibila-a-a _dumu_ {disz}{d}muati-sa-lim _dumu dumu_ {disz}{d}marduk-a-asz
469'. sza la-pa-an _ad ad_ ba-ni-ia _ad_-szu2 in-nab-tu
470'. a-na {kur}elam-ma{ki} ul-tu {disz}um-man-i-gasz
471'. qe2-reb {kur}elam-ma{ki} asz2-ku-nu a-na _lugal_-u-ti
472'. {disz}ibila-a-a _dumu_ {disz}{d}muati-sa-lim
473'. is,-bat u2-sze-bi-la a-di mah-ri-ia
474'. {disz}du-na-nu {disz}sa-am-gu-nu
475'. _dumu-mesz {disz}en-ba_-sza2 {kur}gam-bu-la-a-a
476'. sza2 _ad-mesz_-szu2-un a-na _lugal-mesz ad-mesz_-ia
477'. u2-dal-li-pu-ma u3 szu-nu
478'. u2-nar3-ri-t,a e-pesz _lugal_-ti-ia
479'. qe2-reb bal-til{ki} u3 {iri}limmu2-dingir
480'. a-na da-lal2 ah-ra-a-te? u2-bil-szu-nu-ti
481'. sza {disz}man-nu-ki-pap-mesz {lu2}2(disz)-u sza2 {disz}du-na-nu
482'. u3 {disz}{d}muati-u2-s,al-li {lu2}sza2 _ugu iri_ {kur}gam-bu-li
483'. sza _ugu dingir-mesz_-ia iq-bu-u szil-la-tu _gal_-tu2
484'. qe2-reb {iri}limmu2-dingir _eme_-szu2-un asz2-lu-up
485'. asz2-hu-ut, _kusz_-szu2-un {disz}du-na-nu qe2-reb nina{ki}
486'. _ugu_ {gesz}ma-ka-a-s,i id-du-szum-ma
487'. it,-bu-hu-usz as-lisz
488'. si-it-ti _szesz-mesz_-szu2 sza2 {disz}du-na-nu
489'. u3 {disz}ibila-a-a a-ni-ir _uzu-mesz_-szu2-nu u2-nak-kis
490'. u2-sze-bil a-na ta-mar-ti ma-ti-tan
491'. {disz}{d}muati-i {disz}en-kar-ir
492'. _dumu-mesz {disz}{d}muati-mu-kam_-esz _{lu2}gu2-en-na_
493'. sza2 _ad_ ba-nu-szu2-un {disz}ur-ta-ki id-ka-a
494'. a-na mit-hu-s,i _kur_ uri{ki}
495'. _giri3-pad-da-mesz {disz}{d}muati-mu-kam_-esz sza2 ul-tu qe2-reb {kur}gam-bu-li
496'. il-qu-u-ni a-na _kur_ asz-szur{ki}
497'. _giri3-pad-da-mesz_ sza2-a-ti-na
498'. me2-eh-ret _abul muru2 iri_ nina{ki}
499'. u2-szah-szi-la _dumu-mesz_-szu2
500'. {disz}um-man-i-gasz sza2 t,a-ab-tu2 ma-a'-as-su e-pu-szu2-usz
501'. asz2-ku-nu-usz a-na _lugal_-ut {kur}elam-ma{ki}
502'. sza _saga_-ti3 la ha-as-su
503'. la is,-s,u-ru a-de-e ma-mit _dingir-mesz gal-mesz_
504'. ul-tu _szu-min {lu2}a kin-mesz {disz}{d}gesz-nu11-mu-gi-na_
505'. _szesz_ la ke-nu _{lu2}kur2_-ia im-hu-ru t,a-a-tu2
506'. e-mu-qi-szu2 it-ti-szu2-un isz-pu-ra a-na mit-hu-s,i _erin2-hi-a_-ia
507'. _erin2-mesz me3_-ia sza2 ina {kur}kar2-{d}dun-ia2-asz3
508'. it-ta-na-al-la-ku u2-kab-ba-su {kur}kal-du
509'. ina la i-de s,e-er {disz}un-da-si
510'. _dumu_ {disz}te-um-man _lugal_ {kur}elam-ma{ki}
511'. u3 {disz}za-za-az _{lu2}en-iri_ {kur}pil-la-ti
512'. {disz}pa-ru-u2 _{lu2}en-iri_ {kur}hi-il-mu
513'. {disz}at-ta-me-tu2 _{lu2}gal {gesz}pan_
514'. {disz}ne2-e-szu2 a-lik pa-ni _erin2-hi-a_ sza2 {kur}elam-ma{ki}
515'. a-na mit-hu-s,i it-ti _erin2-hi-a kur_ asz-szur{ki}
516'. u2-ma-'e-er-szu2-nu-ti asz2-kun-szu2-nu-ti t,e3-e-mu
517'. {disz}um-man-i-gasz a-na {disz}un-da-si ki-a-am iq-bi
518'. um-ma a-lik _ta kur_ asz-szur{ki} ter-ra
519'. tuk-te9-e _ad_ ba-ni-ka
520'. {disz}un-da-su {disz}za-za-az {disz}pa-ru-u {disz}at-ta-me-tu2 {disz}ne2-e-szu2
521'. it-ti _{lu2}a kin-mesz {disz}{d}gesz-nu11-mu-gi-na szesz_ nak-ri
522'. ur-hu is,-bat-u-nim-ma usz-te-sze-ra har-ra-nu
523'. _erin2-mesz me3_-ia ina {iri}man-gi-si sza2 qe2-reb {iri}su-man-dir
524'. _edin_-usz-szu2-un e-lu-nim-ma isz-ku-nu tah-ta-szu2-un
525'. sza {disz}un-da-si _dumu_ {disz}te-um-man _lugal_ {kur}elam-ma{ki}
526'. sza {disz}za-za-az {disz}par-ru-u {disz}at-ta-me-tu2
527'. _sag-du-mesz_-szu2-nu ik-ki-su-nim-ma
528'. u2-bil-u-ni a-di _igi_-ia
529'. szu-ut a-ma-a-ti an-na-a-te
530'. _{lu2}a kin_-ia u2-ma-'e-er s,e-er {disz}um-man-i-gasz
531'. {lu2}szu-ut _sag_-ia sza2 asz2-pu-ra ik-la-ma
532'. la u2-ter-ra tur-ti a-mat-ia
533'. an-szar2 {d}sin {d}utu {d}en {d}ag {d}u-gur
534'. _dingir-mesz_ ti-ik-le-ia di-in kit-ti
535'. it-ti {disz}um-man-i-gasz i-di-nu-in-ni
536'. {disz}tam-ma-ri-tu _edin_-usz-szu2 ib-bal-kit-ma
537'. sza2-a-szu2 ga-a-du kim-ti-szu2 u2-ra-sib ina _{gesz}tukul-mesz_
538'. {disz}tam-ma-ri-tu sza2 e-la sza2-a-szu2 ek-s,u
539'. u2-szib ina _{gesz}gu-za_ {kur}elam-ma{ki}
540'. ki-ma sza2-a-szu2-ma t,a-'a-a-tu2 im-hur
541'. ul isz-al szu-lum _lugal_-ti-ia
542'. a-na kit-ri {disz}{d}gesz-nu11-mu-gi-na
543'. _szesz_ la ke-e-nu il-lik-am-ma
544'. a-na mit-hu-s,i _erin2-hi-a_-ia ur-ri-ha _{gesz}tukul-mesz_-szu2
545'. ina su-up-pe-e sza2 an-szar2 u {d}1(u)-5(disz) u2-sap-pu-u
546'. ta-ne2-hi-ia im-hu-ru isz-mu-u zi-kir _nundum_-ia
547'. _ARAD-mesz_-szu2 _edin_-usz-szu2 ib-bal-ki-tu-ma
548'. a-ha-mesz u2-ra-si-bu _en hul_-ti3-ia
549'. {disz}in-da-bi-bi _ARAD_-su sza si-hu
550'. _ugu_-szu2 u2-szab-szu-u2 u2-szib ina _{gesz}gu-za_-szu2
551'. {disz}tam-ma-ri-tu _lugal_ {kur}elam-ma{ki}
552'. sza2 me-re-eh-tu2 iq-bu-u
553'. _ugu_ ni-kis _sag-du_ {disz}te-um-man
554'. sza2 ik-ki-su a-hu-ru-u _erin2-hi-a_-ia
555'. u3 _szesz-mesz_-szu2 qin-nu-szu2 _numun e2 ad_-szu2
556'. it-ti 1(gesz2) 2(u) 5(disz) _nun-mesz_ sza2 {kur}elam-ma{ki} a-li-kut _a2-mesz_-szu2
557'. sza2 la-pa-an _{gesz}tukul-mesz_ an-szar2 u {d}1(u)-5(disz) ip-par-szu-nim-ma
558'. a-na da-lal2 _dingir_-ti-szu2-nu _gal_-ti it-ti {disz}{d}marduk-man-pap {lu2}szu-ut _sag_-ia
559'. sza ib-szi-mu-szu2 ina da-na-ni mi-ra-nu-usz-szu2-un ina _ugu_ lib3-bi-szu2-nu
560'. ip-szi-lu-nim-ma is,-ba-tu _giri3-min lugal_-ti-ia
561'. {disz}tam-ma-ri-tu2 a-na e-pesz _ARAD_-ti-ia ra-man-szu2 im-nu-ma
562'. a-na kat3-a-ri-szu2 u2-s,al-la-a _en_-u-ti
563'. szu-ut 1(disz)-en szu-ut _sag_-ia an-szar2 {d}sin {d}utu {d}en {d}ag
564'. _dingir-mesz_ tik-le-ia 1(disz) _lim-a-a_ ri-bi-ia i-ri-bu-u-ni
565'. {disz}tam-ma-ri-tu _ug3-mesz_ ma-la it-ti-szu2
566'. qe2-reb _e2-gal_-ia ul-zi-is-su-nu-ti
567'. {disz}in-da-bi-bi sza2 _egir_ {disz}tam-ma-ri-tu
568'. u2-szi-bu ina _{gesz}gu-za_ {kur}elam-ma{ki}
569'. da-na-an _{gesz}tukul-mesz_-ia i-de-e-ma
570'. sza u2-szam-ri-ru _ugu_ {kur}elam-ma{ki}
571'. _dumu-mesz kur_ asz-szur{ki} sza2 asz2-pu-ru
572'. a-na kit-ri {disz}{d}muati-en-mu-mesz
573'. _dumu {disz}{d}marduk-a-szum2-na_ sza _gin7_ ib-ri u tap-pe2-e
574'. na-s,ar _kur_-szu2 it-ta-na-al-la-ku it-ti-szu2
575'. sza2 {disz}{d}muati-en-mu-mesz ina pi-ir-s,a-a-ti ina szat mu-szi
576'. us,-s,ab-bi-tu ik-lu-u2 ina ki-li
577'. {disz}in-da-bi-bi _lugal_ {kur}elam-ma{ki}
578'. ul-tu _e2_ s,i-bit-ti u2-sze-s,a-asz2-szu2-nu-ti
579'. ki-i s,a-bat ab-bu-ut-ti qa-be2-e _munus saga_-ti-szu2
580'. la ha-t,e-e mi-s,ir _kur_-szu2
581'. ina _szu-min {lu2}a kin_-szu2 sza2 t,u-u2-bi u su-lum-me-e
582'. u2-sze-bi-la a-di mah-ri-ia
583'. {disz}ia-u-ta-a' _dumu_ {disz}ha-za_-dingir_
584'. _lugal_ {kur}qa-ad-ri e-pisz _ARAD_-ti-ia
585'. asz2-szu2 _dingir-mesz_-szu2 im-hur-an-ni-ma
586'. u2-s,al-la-a _lugal_-u2-ti
587'. _mu dingir-mesz gal-mesz_ u2-sza2-az-kir2-szu2-ma
588'. {d}a-tar-sa-ma-in u2-ter-ma a-din-szu2
589'. _egir_-nu ina a-de-ia ih-t,i-ma
590'. _mun_ la is,-s,ur-ma
591'. is,-la-a _{gesz}szudun en_-ti-ia
592'. a-na sza2-'a-al szul-mi3-ia _giri3-min_-szu2 ip-ru-us-ma
593'. ik-la-a ta-mar-ti _ug3-mesz_ {kur}a-ri-bi
594'. it-ti-szu2 u2-sza2-bal-kit-ma
595'. ih-ta-nab-ba-tu hu-bu-ut _kur_ mar-tu{ki}
596'. _erin2-hi-a_-ia sza2 ina mi-s,ir _kur_-szu2 asz2-bu
597'. u2-ma-'e-e-ra s,e-ru-usz-szu2
598'. _bad5-bad5_-szu2-un asz2-kun _un-hi-a_ {kur}a-ri-bi
599'. ma-la it-bu-u-ni u2-ra-si-bu ina _{gesz}tukul-mesz_
600'. _e2 edin_ kul-ta-ri mu-sza2-bi-szu2-nu
601'. _izi_ u2-sza2-hi-zu ip-qi2-du a-na {d}gesz-bar
602'. _gu4-mesz_ s,e-e-ni _ansze-mesz ansze-gam-mal-mesz_
603'. a-me-lu-tu2 isz-lu-lu-u-ni ina la mi3-ni
604'. se-he-ep _kur_ ka-la-mu a-na si-hir-ti-sza2
605'. un-da-al-lu-u? a-na pat, gim-ri-sza2
606'. _ansze-gam-mal-mesz_ ki-ma s,e-e-ni u2-par-ri-is
607'. u2-za-'i-iz a-na _ug3-mesz kur_ asz-szur{ki}
608'. qa-bal-ti _kur_-ia _ansze-gam-mal_ ina _gin2_ ina 1/2(disz) _gin2_ kas-pi
609'. i-szam-mu ina _ka2_ ma-hi-ri
610'. {munus}asz2-tam-mu ina ni-id-ni _{lu2}lunga2_ ina {dug}ha-be2-e
611'. _{lu2}nu-{gesz}kiri6_ ina ki-i-si im-da-na-ha-ru
612'. _ansze-gam-mal-mesz_ u3 a-me-lu-ti
613'. si-it-ti {lu2}a-ri-bi sza2 la-pa-an _{gesz}tukul-mesz_
614'. ip-par-szi-du u2-szam-qit {d}er3-ra qar-du
615'. su-un-qu ina bi-ri-szu2-un isz-sza2-kin-ma
616'. a-na bu-ri-szu2-nu e-ku-lu _uzu-mesz dumu-mesz_-szu2-un
617'. ar-ra-a-ti ma-la ina a-de-szu2-un szat,-ru
618'. ina pi-it-ti i-szim-szu2-nu-ti an-szar2 {d}sin {d}utu
619'. {d}en u {d}ag {d}1(u)-5(disz) sza2 nina{ki} {d}1(u)-5(disz) sza2 {iri}limmu2-dingir{ki}
620'. _dingir-mesz gal-mesz en-mesz_-ia2
621'. {disz}ia-u-ta-a' ma-ru-usz-tu2 im-hur-szu2-ma
622'. e-disz-szi-szu2 in-na-bit
623'. {disz}a-bi-ia-te-e' _dumu_ {disz}te-e'-ri
624'. a-na {iri}nina{ki} il-li-kam-ma u2-na-sziq _giri3-min_-ia2
625'. a-de-e a-na e-pesz _ARAD_-ti-ia it-ti-szu2 asz2-kun
626'. ku-um {disz}ia-u-ta-a' asz2-kun-szu2 a-na _lugal_-u-ti
627'. _ku3-sig17 igi-min-mesz {na4}babbar-dili_ gu-uh-lu _ansze-gam-mal-mesz_
628'. _ansze-nita2-mesz_ bit-ru-ti man-da-at-ti szat-ti-szam-ma
629'. u2-kin s,e-ru-usz-szu2
630'. {disz}am-mu-la-di-in _lugal_ {kur}qa-ad-ri sza2 ki-ma sza2-a-szu2 ik-ki-ru
631'. ih-ta-nab-ba-tu hu-bu-ut _kur_ mar-tu{ki}
632'. ina zi-kir _mu_-ia sza2 an-szar2 {d}sin {d}utu {d}en {d}ag
633'. {d}1(u)-5(disz) sza2 nina{ki} {d}1(u)-5(disz) sza2 {iri}limmu2-dingir{ki} u2-szar-bu-u2
634'. {disz}ka-ma-as-hal-ta-a _lugal_ {kur}ma-'a-a-bi
635'. _ARAD_ da-gil2 pa-ni-ia
636'. ina _me3_ isz-ku-nu _bad5-bad5_-szu2
637'. {disz}am-mu-la-di si-it-ti _ug3-mesz_-szu2
638'. sza2 la-pa-an da-a-ki i-szi-tu-u-ni u2-s,ab-bit ina _szu-min_
639'. _szu-min_ u _giri3-min_ bi-re-tu2 _an-bar_ id-di-ma
640'. a-na {iri}nina{ki} a-di mah-ri-ia u2-sze-bi-la
641'. {disz}na-at-nu _lugal_ {kur}na-ba-a-a-ti sza a-szar-szu2 ru-u-qu
642'. isz-ma-a da-na-an an-szar2 {d}marduk sza2 u2-tak-kil-u-in-ni
643'. sza ma-ti-ma a-na _lugal-mesz ad-mesz_-ia _{lu2}a kin_-szu2 la isz-pu-ra
644'. la isz-a-lu4 szu-lum _lugal_-ti-szu2-un
645'. e-nen-na ia-ti _{lu2}a kin_-szu2 sza2 szul-me
646'. isz-pu-ram-ma u2-na-asz2-sziq _giri3-min_-ia
647'. a-na sza2-kan a-de-e su-lum-me-e e-pesz _ARAD_-ti-ia
648'. u2-s,a-na-al-la-a be-lu-u-ti
649'. a-na-ku ha-disz ap-pa-lis-szu-ma
650'. pa-ni-ia _saga-mesz ugu_-szu2 asz2-kun
651'. _gun_ man-da-at-tu szat-ti-szam-ma u2-kin _edin_-usz-szu2
652'. ina u4-me-szu2-ma _bad3 muru2 iri_ sza nina{ki}
653'. sza {disz}{d}sin-pap-mesz-su _man kur_ asz-szur{ki} _ad ad_ ba-ni-ia _du3_-szu2
654'. ina _a-mesz_ t,ah_-tu_-ti ra-a-di gap-szu-ti
655'. sza szat-ti-szam-ma ina _bala_-ia {d}iszkur u2-sad-di-ra ina _kur_-ia
656'. tem-me-en-szu2 ir-bu-ub-ma i-qu-pa re-sza2-a-szu2
657'. _bad3_ szu-a-tu2 sza la-ba-risz _du_-ku e-na-hu _usz8_-szu2
658'. mi-qit-ta-szu2 ad-ke ak-szu-da a-sur-ru-szu2
659'. ina esz-qi2 _na4 kur_-i tem-me-en-szu2 u2-dan-nin
660'. e-li sza mah-ri _bad3_ szu-a-tu2
661'. u2-kab-bir asz2-pu-ka szad-du-isz3
662'. ul-tu _usz8_-szu2 a-di gaba-dib-be2-e-szu2 ar-s,ip u2-szak-lil
663'. _ugu_ sza u4-me pa-ni u2-dan-ni-na tem-me-en-szu2
664'. _mu-sar_-u szi-t,ir _mu_-ia u ta-nit-ti qar-ra-du-ti-ia2
665'. sza ina tukul-ti an-szar2 {d}sin {d}utu {d}en {d}ag
666'. {d}1(u)-5(disz) sza2 nina{ki} {d}1(u)-5(disz) sza2 {iri}limmu2-dingir {d}masz {d}nusku {d}u-gur
667'. ina _kur-kur_ at-tal-la-ku asz2-ku-nu da-na-nu u li-i-tu2
668'. asz2-t,ur-ma a-na ah-rat u4-me e-zib
669'. a-na _egir_ u4-me ina _lugal-mesz dumu-mesz_-ia
670'. sza an-szar2 u {d}1(u)-5(disz) a-na be-lut _kur_ u _ug3-mesz_ i-nam-bu-u2 zi-kir-szu2
671'. e-nu-ma _bad3_ szu-a-tu2 i-lab-bi-ru-ma in-na-hu
672'. an-hu-us-su lu-ud-disz _mu-sar_-u szi-t,ir _mu_-ia
673'. li-mur-ma _i3-mesz_ lip-szu-usz _{udu}siskur_ liq-qi2
674'. a-na asz2-ri-szu2 lu-ter
675'. ki-i sza a-na-ku _mu-sar_-u szi-t,ir szu-me {disz}{d}sin-pap-mesz-su ab _ad du3_-ia
676'. a-mu-ru _i3-mesz_ ap-szu-szu2 _{udu}siskur_ aq-qu-u it-ti _mu-sar_-e
677'. szi?-t,ir? _mu_-ia asz2-ku-nu at-ta ki-i ia-a-ti-ma
678'. _mu-sar_-a-a a-mur-ma _i3-mesz_ pu-szu-usz _{udu}siskur bala_-qi2
679'. it-ti _mu-sar_-e szi-t,ir _mu_-ka szu-kun
680'. _dingir-mesz gal-mesz_ ma-la ina _mu-sar_-e an-ne2-e szat,-ru
681'. _lugal_-ut-ka lik-tar-ra-bu li-is,-s,u-ru _bala-mesz_-ka
682'. sza _mu-sar_-u2 szi-t,ir _mu_-ia u szu-me _ad ad du3_-ia
683'. ib-ba-tu ina mim-ma szi-pir ni-kil-ti u2-hal-la-qu
684'. it-ti _mu-sar_-e szi-t,ir _mu_-szu2 la i-szak-ka-nu
685'. _dingir-mesz gal-mesz_ sza2 _an_-e u _ki_-tim
686'. _lugal_-us-su lis-ki-pu
687'. _mu_-szu2 _numun_-szu2 ina _kur_ lu-hal-li-qu